00:00:00 IGIHE NETWORK KN KINYARWANDA EN ENGLISH FR FRANCAIS

Umuvunyi Mukuru yibukije ko kwibuka Jenoside ari inshingano yizeza ubufasha mu gusana urwibutso rwa Musha

Yanditswe na Ishimwe Deborah
Kuya 4 June 2022 saa 10:16
Yasuwe :

Urwego rw’Umuvunyi rwashyikirije inkunga ingana na miliyoni y’amafaranga y’u Rwanda, Umurenge wa Musha azifashishwa mu gutunganya neza urwibutso rwa Jenoside rwa Musha, yizeza ubundi bufasha mu bikorwa biteganyijwe.

Umuvunyi mukuru Nirere Madeleine n’abandi bakozi bakorera urwego rw’umuvunyi kuri uyu wa Gatanu basuye urwibutso rwa Jenoside yakorewe Abatutsi muri Mata 1994 rwa Musha mu karere ka Rwamagana.

Ni mu gikorwa cyo kwibuka inzirakarengane zazize Jenoside yakorewe Abatutsi mu Murenge wa Musha, aho abarokotse Jenoside bagaragaje ibyishimo batewe no kuba babonye abaza kubafata mu mugongo .

Mukabalisa Pauline warokotse Jenoside yakorewe Abatutsi muri uyu murenge wa Musha, yagarutse ku mateka y’ibyo yabonye mu gihe cya jenoside anaboneraho kongera gushimira ingabo za FPR zari ziyobowe na Perezida Paul Kagame zabohoye u Rwanda zikanahagarika Jenoside.

Ati "Mu byukuri mu gihe cya jenoside iyo umuntu yabonaga umunsi wije ntiyizeraga ko uri buke. Nakabaye nanjye ndi mu baguye aha kuri Kiliziya ya Musha ariko kubera intege nke nari mfite ntabwo nabashije kuhagera kuko ku itariki 9 Mata 1994, ubwo abandi barimo bahunga niwo munsi nabyayeho ari na wo munsi umugabo wanjye bamwiciyeho ubwo yageragezaga kuza ku kiliziya."

Mukabalisa avuga ko nubwo yanyuze mu buzima busharira, icyizere cyo kubaho gihari kubera ubuyobozi bwiza bw’u Rwanda.

Ati "Mboneyeho gushimira ingabo za FPR zadutabaye kuko kuri njye FPR ni ubuzima. Ndashimira kandi Leta y’ubumwe yakuye amoko mu Banyarwanda ubu tukaba tubana nk’abanyarwanda twese."

Komiseri ushinzwe kwibuka mu karere ka Rwamagana, Makombe Aimable, yashimiye urwego rw’umuvunyi kuba rwaje kubafata mu mugongo anavuga ko hakenewe inkunga yo gusana urwibutso kugira ngo amateka ya Musha arusheho gusigasirwa.

Ati "Aha hahungiye abantu baturutse mu mirenge igera ku icyenda, abo bose baburiye ubuzima aho bari bizeye amakiriro, abo bose imibiri yabo ishyinguyemo aha, ariko by’umwihariko uru rwibutso nirwo duheruka gushyinguramo abantu benshi kuko rushyinguyemo abantu barenganga 5800 biciwe muri iyi kiliziya twakuye mu birombe bicukurwamo amabuye y’agaciro aho babajyanye nyuma yo kubica.”

Yakomeje agira ati “Uru rwibutso rukwiye gusanwa rukubakwa neza kuko aribyo byatuma amateka y’aka gasozi atazimangatana kuko ni urwibutso rwegereye kiliziya yafatwaga nk’ahantu h’Imana ikaza kwicirwamo abantu b’Imana.”

Umuvunyi mukuru, Nirere Madeleine, yihanganishije ababuriye ababo mu murenge wa Musha, abasaba gukomeza kwiyubaka ndetse no gufasha abarokotse kuko kwibuka ari inshingano ya buri wese.

Ati “Igikorwa cyo kwibuka abazize jenoside ni igikorwa tugomba guhuriraho nk’Abanyarwanda atari n’inzego gusa kuko ni ngombwa ko abazize jenoside basubizwa agaciro tunongera gushimangira ko uburenganzira bwa muntu ari ntagereranywa kuko nta muntu wemerewe kuvutsa undi ubuzima.”

Yasabye abarokotse jenoside gukomeza kwiyubaka no kubakira ku cyizere cyo kubaho kuko cyamaze kwiyubaka ndetse bagakomereza muri uwo murongo.

Abitabiriye iki gikorwa bifatanyije mu kunamira inzirakarengane z’Abatutsi 23,262 baruhukiye muri uru rwibutso rwa Jenoside yakorewe Abatutsi mu 1994 rwa Musha. Mu karere ka Rwamagana habarurwa imibiri ibihumbi 80 000 iruhukiye mu nzibutso 11 zibarurwa muri aka karere.

Umuvunyi Mukuru Nirere Madeleine na Visi Meya bashyira indabo ku mva zishyinguyemo inzirakarengane zishwe muri Jenoside
Hatanzwe inkunga ya miliyoni imwe y'amafaranga y'u Rwanda yo gusana uru rwibutso
Pauline Mukabalisa yatanze ubuhamya bw'uburyo umunsi yabyariyeho ni wo umugabo we yiciweho
Umuvunyi Mukuru wungirije Ushinzwe gukumira no kurwanya akarengane, Yankulije Odette, yumva amateka asharira Abanya-Musha banyuzemo muri Jenoside yakorewe Abatutsi
Abakozi b'Urwego rw'Umuvunyi basuye urwibutso rwa Jenoside rwa Musha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .