Umuturage, kurandura ubukene, iterambere ry’imijyi: Imihigo ya ba Meya bashya batowe

Yanditswe na Evariste Nsengimana
Kuya 28 Nzeri 2019 saa 11:40
Yasuwe :
0 0

Kuri uyu wa Gatanu uturere twa Musanze, Muhanga, Karongi na Nyamasheke twabonye ba meya bashya batarimo umugabo umwe nyuma y’amatora yo gusimbuza abaherutse kwegura no kweguzwa mu ntangiriro z’uko kwezi.

Aba bayobozi bashya batowe bafite inshangano zikomeye zo kwihutisha iterambere no gukemura bimwe mu bibazo byugarije uturere batorewe kuyobora, cyane ko bamwe mu bo basimbuye bashinjwaga kunanirwa kuzuza inshingano, kurya ruswa n’ibindi.

Aya matora akaba yasize andi mateka kuko ku nshuro ya mbere abagore 10 babaye ba Meya kuri 30 bose bayobora uturere. Ni ukuvuga ko 30% bya ba Meya ari abagore.

Mu kiganiro IGIHE yagiranye n’abayobozi bashya batorewe kuyobora utwo turere, bavuze ko bagiye kwegera abaturage, bagakemura ibibazo bafite, kwihutisha iterambere ry’uturere n’ibindi ariko basaba abo bahasanze, abaturage n’abikorera kubigiramo uruhare.

Iterambere ry’Umujyi n’ubukerarugendo i Muhanga

Mu Karere ka Muhanga Kayitare Jacqueline, yatorewe kukayobora asimbuye Uwamariya Beatrice wandikiye Inama Njyanama ayisaba kwegura ku mirimo ye ku mpamvu ze bwite.

Kayitare yabwiye IGIHE ko kuba ako karere ari kamwe mu dufite imijyi yunganira Kigali ari amahirwe akomeye kandi atanga inshingano zikomeye kuko bikwiye kuva mu magambo bigashyirwa mu bikorwa.

Ati “Tugiye gufatanya n’abo dusanzwe tugashyira mu bikorwa iyo gahunda kuko yamaze gushyirwaho. Tuzagerageza gukora n’inzego za Leta zibifite mu nshingano n’abafatanyabikorwa nk’abikorera, Sosiyete sivile, imiryango ishingiye ku myemerere n’abanya-Muhanga muri rusange.”

Kayitare yavuze ko bazagerageza guhuza izo nzego Umujyi wa Muhanga ukaganwa n’abakerarugendo cyane ko uri hagati na hagati y’igihugu ku buryo bitanga amahirwe ko abantu bose bashobora kuhagana.

Ati “Mu bufatanye tuzakorana n’abikorera kuzana ibyangombwa bituma amahoteli aboneka, kugira ngo abashoramari boroherezwe kubona aho bashyira ibikorwa byabo kugira ngo bibe ari ibiteza imbere akarere na bo ubwabo.”

Yakomeje agira ati “Abatuye mu cyaro cyane ko hari n’andi mahirwe y’amabuye y’agaciro, tuzayabyaza umusaruro abe amahirwe yo guteza imbere aho ubwo bucukuzi bukorerwa. Tuzagerageza kubegereza ibikorwa remezo yaba amazi cyangwa amashanyarazi, tuzamure serivisi z’ubuzima n’urwego rwa serivisi ku buryo buri wese azajya yishimira inzego z’ibanze.”

Kayitare yasabye abaturage gufatanya mu guhindura no gukemura ibibazo bafite birimo iby’abana b’inzererezi, abatagira amacumbi, ababana n’amatungo, abana bata ishuri n’ibindi kugira ngo bikemuke kuko ubushake n’ubushobozi bihari.

Kayitare Jacqueline watorewe kuyobora Akarere ka Muhanga

Guhoza ikirenge mu baturage, kubatega amatwi no kubakura mu bukene i Karongi

Mu Karere ka Karongi, Mukarutesi Vestine niwe watorewe kukayobora asimbuye Ndayisaba François wakayoboraga, we n’abamwungirije bandikiye Njyanama basaba kwegura ku mpamvu zabo bwite.

Mukarutesi yabwiye IGIHE ko imigabo n’imigambi afitiye Akarere ishingiye ku iterambere ry’abagatuye, cyane cyane kubegera aho babarizwa.

Ati “Ni ukugira ubufatanye n’inzego zose dukorana uhereye ku mudugudu kuko buriya umuturage aba afite umudugudu abarizwamo. Imbaraga, ibirenge byacu tuzabishyira ku mudugudu hahandi hari umuturage kuko iyo niyo ntego yacu ya mbere yo kugira ngo umuturage wacu agire aho ava n’aho agera mu iterambere n’imibereho myiza.”

Mukarutesi yavuze ko hamwe n’abandi bayobozi b’aka Karere bazafatanya n’abaturage kwesa imihigo kashyizeho igamije kubateza imbere, bakubakira ku byo abo asimbuye bari bamaze kukagezaho.

Ati “Ikindi ni ugukemura ibibazo by’abaturage kuko iyo umuturage afite ikibazo ntabwo ashobora kwibonamo ubuyobozi ngo yishime abe yagera kuri rya terambere.”

Yavuze ko azaharanira ko abaturage babonera serivisi ku gihe kandi akareshya ishoramari muri ako karere gakikijwe n’ikiyaga cya Kivu kandi gakunze kugendwa n’abakerarugendo.

Ubuyobozi Mukarutesi asimbuye, Nyanama y’aka Karere yavuze ko mu mpamvu zatumwe bwegura harimo kunanirwa kuzuza inshingano zirimo kudakemura ibibazo by’abaturage.

Mukarutesi ati “Tuzatega amatwi inama tuzagirwa na Njyanama kugira ngo tugire ibyo tunoza kuko umutwe umwe ntiwigira inama wifasha gusara..Tujya inama ku buryo bwo gushyira mu bikorwa ibyo twateguye ndizera ntashidikanya ko tuzabigeraho.”

Mukarutesi wasimbuye Ndayisaba François muri Karongi

Ubuhinzi bw’icyayi no kurandura ubukene ku isonga i Nyamasheke

Mu Karere ka Nyamasheke, Mukamasabo Appolonie niwe watorewe kuba umuyobozi wako mushya asimbuye Kamali Aimé Fabien wakayoboraga, wegujwe ashinjwa kunanirwa kuzuza inshingano yatorewe.

Mukamasabo yabwiye IGIHE ko imigabo n’imigambi afitiye Akarere n’abagatuye irimo kuvugurura ubuhinzi bw’ibihingwa ngandurarugo na ngengabukungu.

Ati “By’umwihariko ubuhinzi bw’icyayi kuko aricyo kirimo guteza imbere abaturage kuko bakora ku mafaranga umunsi ku wundi. Dufite gahunda rero yo kongera icyayi mu Karere ka Nyamasheke kugira ngo tubashe gukura abaturage bacu mu bukene.”

Mukamasabo yavuze ko anafite intego yo kuvugurura no gukurikirana imikorere ya koperative zitandukanye zikorera muri ako Karere kugira ngo zibashe gutera imbere n’abanyamuryango badasigaye.

Ati “Ibindi ni ugukomeza iby’isuku n’isukura n’ibindi bijyanye n’umutekano w’abaturage kugira ngo tubashe kugira isuku n’isukura mu Karere kacu, umuturage akaba asa neza.”

Mukamasabo yavuze ko bazanakomeza gushyira imbaraga mu gushishikariza abashoramari kongera ibikorwa remezo muri ako Karere.

Ati “Icyo nshyize imbere ni ugukura abaturage mu bukene. Nzabakura mu bukene nongera umusaruro w’icyayi aho numva umuzenguruko w’ishyamba rya Nyungwe, tuzawongeraho icyayi abaturage bakabasha kubona akazi bakanakora ku mafaranga umunsi ku wundi.”

Mukamasabo Appolonie, niwe watorewe kuyobora Akarere ka Nyamasheke

Iterambere ry’umuturage muri Musanze

Mu Karere ka Musanze, Nuwumuremyi Jeannine w’imyaka 49 y’amavuko yatorewe kuba Umuyobozi mushya wako asimbuye Habyarimana Jean Damascène wegujwe na Njyanama imushinja kutuzuza inshingano n’ibindi.

Akimara gutorwa, Nuwumuremyi Jeannine yavuze ko mu migabo ye n’imigambi azita cyane ku iterambere ry’umuturage.

Yagize ati "Icyo dushyize imbere ni ugufatanya muri byose, turebera hamwe iterambere ry’umuturage yaba mu butabera, ubukungu n’imibereho myiza yabo. Mbijeje ko nzaba mpari igihe cyose kugira ngo turwanire iterambere ry’umuturage n’igihugu muri rusange".

U Rwanda rufite intego yo kugira ubukungu buciriritse mu 2035 kandi rukaba rwateye imbere mu 2050 mu gihe ubukungu bwaba bwihuta ku 10%, ku buryo umunyarwanda yazaba yinjiza $12 476 ku mwaka, ni ukuvuga asaga miliyoni 10 Frw ku mwaka. Ibyo biracyazitiwe n’umubare w’abakiri mu bukene ungana na 38.2 % nkuko byagaragajwe n’Ubushakashatsi bwa Gatanu ku mibereho y’ingo mu Rwanda (EICV5).

Nuwumuremyi Jeannine watorewe kuyobora Akarere ka Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza