00:00:00 IGIHE NETWORK KN KINYARWANDA EN ENGLISH FR FRANCAIS

Umutungo kamere; umukiro watindahaje Congo: U Rwanda rukaba urwitwazo

Yanditswe na Ndahayo Emmanuel
Kuya 6 June 2022 saa 07:39
Yasuwe :

Repubulika Iharanira Demokarasi ya Congo (RDC) tubona aha hirya mu Burengerazuba bw’u Rwanda, ni igihugu gikize. Munsi y’ubutaka bwayo, hari umutungo kamere ufite agaciro ka miliyari ibihumbi 24$, hafi kungana n’ubukungu bwose bwa Leta Zunze Ubumwe za Amerika, igihugu cya mbere gikize ku Isi, aho bwanganaga na 25% by’ubukungu bwose bw’Isi mu 2019.

Nyamara ibi bitera agahinda iyo wumvise ko iyi Congo ari kimwe mu bihugu bikennye ku Isi, aho abarenga 70% by’abaturage batuye munsi y’umurongo w’ubukene.

Iyo bigeze mu Burasirazuba bw’icyo gihugu, ibintu birushaho kudogera. Nko muri Kivu zombi, ikitwa ibikorwaremezo nk’imihanda ni inkuru mbarirano zo mu bitabo. Aha ni hamwe mu hantu hari ubutaka bwera ku Isi, aho abaturage bashobora kweza imyaka badakeneye ifumbire, ariko ibi byose ntacyo bimariye abaturage kuko uyu musaruro udashobora kugera ku masoko kubera ibikorwaremezo biciriritse.

Bitewe n’uko hejuru ya 90% by’abatuye muri iki gice cya Congo batize, birumvikana ko imirimo myinshi ihakorerwa ari iy’amaboko, wakuramo ubuhinzi budashobora gukiza ubukora, bigatuma ubucukuzi bw’amabuye y’agaciro ari bwo busigara ari ishyiga ry’inyuma mu bukungu bwa Kivu ya Ruguru n’iy’Epfo. Habarurwa ko abarenga miliyoni ebyiri bakora aka kazi.

Gucukura amabuye y’agaciro mu Burasirazuba bwa Congo ntabwo ari ibintu byoroshye. Icya mbere ni uko benshi mu bakora aka kazi k’ingufu bagakoresha amaboko yabo, buri wese agacukura uko ashoboye umusaruro ukajyanwa kuri site zitandukanye, mbere y’uko ugurishwa ku bacuruzi bawambutsa imipaka bawujyana mu mahanga. Byashoboka cyane ko telefoni, cyangwa ikindi gikoresho uri gukoresha usoma iyi nkuru, gikozwe n’amabuye yanyuze muri iyi nzira.

Bitewe n’uko nta mabwiriza agenga uyu murimo, bituma nta buryo buhamye buriho bwo gusaranganya ubu bukungu, ari nayo mpamvu ushaka kuryaho, agomba kwikoreramo. Ibi nibyo byabaye intandaro y’imitwe irenga 120 iri mu Burasirazuba bwa Congo, aho myinshi yaturutse ku makimbirane y’ibirombe n’ibindi byatumaga begura intwaro, bagashaka ikirombe bacukura, bakakigenzura bityo bakabona amaramuko.

Imitwe yitwaje intwaro ifatanya n'ingabo za Leta ya Congo mu bucuruzi butemewe bw'amabuye y'agaciro

Ubucuruzi bumeze gutya nibwo butunze imitwe y’iterabwoba nka FDLR, aho usanga igice kinini cy’inyungu yayo kiboneka binyuze mu kugurisha amabuye bacukuye, cyangwa se bakishyurirwa kurinda ibindi birombe, cyangwa nanone bakishyuza imisoro mu gace bagenzura.

Nk’ubu uyu mutwe ubarirwa ko winjiza arenga miliyoni 32$ ku mwaka, uretse ko hari abavuga ko amafaranga ya nyayo ashobora kuba ayakubye inshuro nyinshi. Kugira ngo aya mafaranga aboneke, FDLR ifatanya n’Ingabo za Leta ya Congo, FARDC, ndetse n’Ingabo ziri mu butumwa bwo kugarura amahoro muri icyo gihugu, Monusco.

Mu bihe bitandukanye, Ingabo za Monusco zakunze gukekwaho kugira uruhare mu bucuruzi bw’amabuye y’agaciro atemewe, nk’aho imodoka zabo zakunze gusangwamo ayo mabuye, ubundi indege zawo zikayatwara, hakabaho nubwo habonetse amafaranga yari agiye mu bikorwa byo kugura ayo mabuye. Mu 2018, imodoka ya Monusco yakoze impanuka itwaye arenga miliyoni 1,2$ agiye kwifashishwa mu kugura amabuye y’agaciro, ndetse ikaba yari itwaye imifuka yuzuyemo amabuye y’agaciro.

Monusco nta ruhare igira mu kugabanya imitwe yitwaje intwaro muri Congo

Monusco; Igisubizo cyakongeje umuriro

Mu 1999, nyuma y’uko bigaragaye ko hari kuvuka imitwe myinshi mu Burasirazuba bwa Repubulika Iharanira Demokarasi ya Congo, Umuryango w’Abibumbye wafashe icyemezo cyo kohereza ingabo muri icyo gihugu mu rwego rwo kubungabunga umutekano.

Kugeza ubu, arenga miliyari 8$ amaze gushorwa muri ibyo bikorwa, birimo abasirikare barenga ibihumbi 20, ibituma ubu butumwa buza mu bufite ingabo nyinshi ku Isi. Gusa aho kugira ngo umutekano uboneke, imitwe y’iterabwoba n’inyeshyamba irushaho kwiyongera muri Congo, aho yabarirwa muri 40 ahagana mu 2010, ubu ikaba imaze kwikuba gatatu mu myaka 12 gusa, aho irenga 120.

Birumvikana ko uwashidikanya ku kamaro k’ubu butumwa ataba yibeshye, ndetse ibintu byarushijeho kujya habi mu ntangiriro z’umwaka ushize, ubwo abaturage biraraga mu mihanda bakamagana uwo Muryango, bawushinja kutuzuza inshingano wahawe, ari nabyo bituma ibibazo by’umutekano muke birushaho kwiyongera.

None niba Monusco ntacyo imaze mu kugarura amahoro muri Congo, izindi nyungu ihafite ni izihe?

Icya mbere ni uko Monusco nayo idashirwa amakenga mu bucuruzi bw’uyu mutungo kamere wa Congo, kuko ibikoresho byayo byagaragaye muri ibyo bikorwa inshuro nyinshi. Ikindi ni uko ubu bucuruzi bworoha mu gihe hari amakimbirane, kuko ari bwo gutwara ayo mabuye birushaho koroha kubera ko nta bugenzuzi bwimbitse buba bukorwa.

Monusco iregwa gutiza umurindi iki kibazo kuko kenshi yakunze kuvuga ko iri mu bikorwa byo guhangana n’umutwe wa FDLR uri mu yikomeye muri Congo, ariko ukabikora wirinda kunenga Ingabo za Leta ya Congo, kandi bizwi neza ko zikorana na FDLR muri ubu bucuruzi, nk’uko raporo y’Umuryango International Alert yabigaragaje.

Ibi bituma ubushobozi bwa Monusco bwo guhashya FDLR bushidikanywaho, kuko niba ifatanya na FARDC, iyi nayo ikaba ifatanya na FDLR, birumvikana ko ntacyo byatanga mu buryo bufatika.

Ku rundi ruhande, ibikorwa nk’ibi ni ingenzi ku nshingano za Monusco, kuko byerekana ko iri kugerageza gukemura ibibazo by’umutekano, nk’uko biri mu nshingano zayo. Icyakora iyo urebye ubushobozi bw’imitwe irwanira mu Burasirazuba bwa Congo, ukabugereranya n’ubwa Monusco, ntabwo byumvikana uburyo ikibazo cy’umutekano kirushaho kugira ubukana mu Burasirazuba bwa Congo, aho gucogoza.

Mu 2018, imodoka ya Monusco yakoze impanuka, imifuka yarimo amabuye y'agaciro inyanyagira hasi, hasangwamo n'amafaranga yari gukoreshwa mu kugura andi mabuye y'agaciro

U Rwanda rwahinduwe insina ngufi

Nta buryo na bumwe wasobanura ko mu gihe cy’imyaka 20, Monusco, ifatanyije na Leta ya RDC, bananiwe guhashya imitwe itandukanye iri muri Repubulika Iharanira Demokarasi ya Congo, urebeye nko ku ngengo y’imari ishorwa muri ibyo bikorwa.

Ikindi ni uko bitumvikana uburyo ingabo za Congo ubwazo, ku bufatanye n’imitwe iri muri icyo gihugu, zigira uruhare mu bikorwa bitemewe by’ubucuruzi bw’amabuye y’agaciro ari muri icyo gihugu.

Iyo u Rwanda rushinjwe gucukura amabuye y’agaciro ya Congo, biba biri mu rwego rwo kwerekana ko ari rwo nyirabayazana, bityo yaba Monusco na FARDC, bigakomeza kubona urwitwazo rwo kutuzuza inshingano zabyo.

Inshuro nyinshi, u Rwanda rwagiye rufata amabuye y’agaciro yagejejwe mu gihugu mu buryo bw’uburiganya, agasubizwa muri Congo, ibyerekana ko Leta y’u Rwanda idafite umugambi wo gucuruza amabuye yaturutse mu bindi bihugu.

Benshi mu bashinja u Rwanda gucuruza amabuye y’agaciro rwavanye muri Congo, babishingira ku musaruro w’ayo rucuruza ku masoko mpuzamahanga urushaho kugenda wiyongera. Icyakora ibi ntibikwiriye gutungurana kuko u Rwanda rurushaho kongera ishoramari ryinjira muri iki cyiciro, bityo umusaruro ukazamuka.

U Rwanda rufite intego y’uko mu 2024, ruzaba rwinjiza miliyari 1.5$ aturutse mu mabuye y’agaciro rucuruza ku isoko mpuzamahanga, avuye kuri miliyoni 800$ mu 2020.

U Rwanda rwabashije guteza imbere urwego rw'ubucukuzi y'amabuye y'agaciro, ari naho rukura amafaranga rwinjiza
U Rwanda rufite intego yo kwinjiza miliyari 1.5$ aturutse mu mabuye y'agaciro mu 2024

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .