Umutekano w’abanyarwanda waje ku isonga n’amanota 95,44% mu bipimo by’imiyoborere

Yanditswe na Iradukunda Serge
Kuya 11 Ukuboza 2020 saa 11:57
Yasuwe :
0 0

Urwego rw’Igihugu rw’Imiyoborere, RGB, rwashyize hanze ubushakashatsi bwa karindwi bugaragaza ibipimo by’imiyoborere mu Rwanda buzwi nka ‘Rwanda Governance Scorecard (RGS), bugaragaza ko buri nkingi mu munani bugenderaho yazamutse ugereranyije n’ibyari byagaragajwe n’ubushakashatsi buheruka.

Ni ku nshuro ya karindwi ubu bushakashatsi bukozwe. RGS ni icyegeranyo cy’ibipimo by’Imiyoborere mu Rwanda gikorwa na RGB buri mwaka hagamijwe kugaragaza ishusho y’uko imiyoborere ihagaze mu gihugu mu byiciro bitandukanye no kugaragaza ingamba mu gushyiraho politiki mu nzego zitandukanye z’igihugu.

Umuhango wo gushyira hanze ubu bushakashatsi wabaye kuri uyu wa 11 Ukuboza witabirwa n’abayobozi mu nzego za Leta zitandukanye, iz’abikorera, sosiyete sivile, amashuri makuru ndetse n’ibigo by’ubushakashatsi.

Ubu bushakashatsi bushyizwe hanze ku nshuro ya karindwi, nk’uko bisanzwe bwakozwe hagendewe ku nkingi umunani arizo, iyubahirizwa ry’amategeko, uburenganzira mu bya politiki n’Ubwisanzure bw’abaturage, imiyoborere abaturage bagizemo uruhare kandi idaheza, kuzamura imibereho myiza y’abaturage, kurwanya ruswa no gukorera mu mucyo, imitangire ya serivisi n’imiyoborere mu bukungu n’ubucuruzi.

Ugureranyije ubu bushakashatsi n’ubwari busanzwe, buri nkingi muri izi umunani yagiye izamuka.

Inkingi y’umutekano yakomeje kuza ku isonga aho ifite amanota 95,44% mu mwaka wa 2020, yavuye kuri 94,29% yariho mu 2019, iyubahirizwa ry’amategeko iri kuri 87,86% ivuye kuri 84,70 % umwaka ushize; uburenganzira mu bya politiki n’ubwisanzure bw’abaturage bwagize amanota 85,76 % bivuye kuri 85,17 %; imiyoborere abaturage bagizemo uruhare kandi idaheza yagize 81,96% ivuye kuri 73 % yariho umwaka ushize.

Inkingi yo kuzamura imibereho myiza y’abaturage yagize amanota 73,32% bivuye ku kigero 68,53%; kurwanya ruswa no gukorera mu mucyo biri kuri 86,28% bivuye kuri 84,28% umwaka ushize; ireme ry’imitangire ya serivisi ryagize amanota 78,31 % bivuye kuri 70,54 % naho imiyoborere mu bukungu n’ubucuruzi bigira amanota 78,14% rivuye kuri 76,43% umwaka ushize.

Umutekano ukomeje kuza ku isonga mu bipimo by'imiyoborere y'abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .