Umutekano n’ubuhahirane muri EAC: Ikiganiro na Bazivamo Christophe

Yanditswe na Evariste Nsengimana, Karirima A. Ngarambe
Kuya 22 Werurwe 2019 saa 09:47
Yasuwe :
0 0

Intego nyamukuru y’Umuryango wa Afurika y’Iburasirazuba (EAC) ni ukwagura ubufatanye muri Politiki, ubukungu, umuco n’imibereho myiza by’abaturage hagamijwe kunoza imibereho yabo, bongererwa ubushobozi, umusaruro, ubucuruzi n’ishoramari.

Abakurikiranira hafi ibya Politiki mpuzamahanga, bavuga ko umubano hagati y’ibihugu bihuriye mu muryango runaka udashoboka mu gihe hari ibitagenda neza hagati yabyo.

Mu kiganiro IGIHE yagiranye n’Umunyamabanga wa EAC, ushinzwe Imari n’Ubutegetsi, Bazivamo Christophe, yavuze ko umutekano ari yo nkingi ya mwamba hagati y’ibihugu bihuriye muri uwo muryango, ku buryo udahari ntacyo wakwigezaho.

Bazivamo yari yitabiriye imurikagurishwa ry’ubukerarugendo riheruka kubera mu Budage ahagarariye EAC, aho yavuze ko buwinjiriza amafaranga agera ku 10% by’umusaruro wa buri mwaka, bukanagira uruhare rwa 20% by’imirimo ihangwa.

Bazivamo yavuze ko muri EAC kimwe n’ahandi, umutekano ufatiye runini urwego rw’ubukerarugendo kuko iyo udahari, abateganyaga kuhagenda babireka.

Ati “Umutekano ni ikintu gikomeye no mu rwego rw’ubukerarugendo, gifite ingufu nyinshi cyane, iyo uhari, abakerarugendo baraza, iyo hagize agakoma gato kakawuhungabanya na bo bahindura gahunda bakajya ahandi aho kugira ngo baze muri ibi bihugu byacu.”

Ibyo ngo bituma abayobozi ba EAC baharanira ko ibihugu biwugize bibana neza mu bwumvikane no gutuma habaho urujya n’uruza rw’abantu muri ibyo bihugu, bakishyira bakiza.

Bazivamo avuga ko umuryango ushyira imbaraga muri gahunda zo gufungura imipaka hagati y’ibihugu kuko bituma abantu bakagenderana, bakamenyerana, bagakorana mu nama zitandukanye, bikubaka ukwishyikirana bikanagabanya amakimbirane ashobora kuvuka.

Uyu muryango ngo mu guharanira umutekano no kwishyira ukizana, utegura inama za gisivile iz’abashinzwe umutekano, iz’abashinzwe abinjira n’abasohoka n’izindi ziganisha ku iterambere rusange n’izijyanye no kubungabunga amahoro n’umutekano.

Ati “Habanza kubaho guhura kw’abashinzwe ibya tekinike bagategura ibigomba kumvikanwaho n’ibyo abantu bagomba kuzuzanyamo, noneho bikagenda ari uruhererekane kugezaho habaho n’inama z’abaminisitiri bashinzwe umutekano cyangwa abashinzwe ingabo.”

Bazivamo yasobanuye ko kubaka EAC ahanini bishingiye ku bucuruzi n’iterambere ry’abaturage birimo n’urujya n’uruza rw’abaturage, guhererekanya amafaranga n’ibindi.

Ku bijyanye n’uburezi, Bazivamo yavuze ko abanyeshuri bakwiye guhabwa uburenganzira bwo kwiga aho bashaka muri EAC kandi bagatanga amafaranga amwe ndetse n’abarimu bagahererekanywa ntawe uhejwe.

Abacuruzi ku isonga mu guhuza ibihugu

Bazivamo yavuze ko mu gihe hari ukutumvikana hagati y’ibihugu, abacuruzi babikoramo bakwiye gufata iyambere mu kugarura ubwumvikane hagati yabyo.

Ati “Iyo hagize ikibazo gihungabanya umutekano nibo baba aba mbere mu gushishikariza ibihugu byabo mu rwego rwa politiki, kunoza umubano hagati y’ibihugu bagiranye amakimbirane kugira ngo bwa bucuruzi bungukiramo abantu ku giti cyabo n’ibihugu bwongere bukorwe.”

Bazivamo yasobanuye ko umutekano ariyo nkingi y’imigendekere myiza muri gahunda zose zirimo iz’uburezi, ubucuruzi, urujya n’uruza, ubuhahirane n’ibindi.

Uruhare rwa EAC mu gukemura amakimbirane

EAC ifite komite zigize Inteko Ishinga Amategeko yayo zirimo ishinzwe gukumira no gukemura amakimbirane hagati y’ibihugu bigize umuryango.

Iyi nteko yagiye ifasha gukemura amakimbirane. Nko mu bibazo byabaye mu Burundi, yahuje Guverinoma y’icyo gihugu, imitwe ya Politiki, abavuye mu buyobozi bwacyo kugira ngo baganire banashakire umuti ibibazo cyari gifite.

Ati “Iyo habaye ibiganiro nk’ibyo nubwo bidahita bikemuka ngo bijye ku murongo ariko biba byashishikarije abantu kumva ko hari urwego rubakurikirana noneho buri wese akagerageza kugenda akora ashaka kunoza kubera ko aba afite ibyo atinya.”

Uruhare rw’itangazamakuru

Bazivamo yavuze ko itangazamakuru ari umuyoboro ugeza amakuru ku bantu benshi, yaba ay’ukuri cyangwa ibihuha kandi abantu bakayumva vuba.

Ati “Iyo abanyamakuru bacu bagira inkuru bakazikabiriza cyane cyane mu bijyanye n’umutekano, mu buryo bumwe cyangwa ubundi baba birukana abakerarugendo kuko nta mukerarugendo wifuza kujya ahantu hari ikibazo.”

Umuryango wa EAC washinze ugizwe n’ibihugu bitandatu ari byo; u Rwanda, Uganda, u Burundi, Kenya, Tanzania na Sudan y’Epfo.

Umunyamabanga wa EAC, ushinzwe Imari n’Ubutegetsi, Bazivamo Christophe, yavuze ko umutekano ariyo nkingi ya mwamba hagati y’ibihugu bihuriye muri uwo muryango

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza