00:00:00 IGIHE NETWORK KN KINYARWANDA EN ENGLISH FR FRANCAIS

Umusore w’imyaka 25 wigaga muri Ines Ruhengeri yaburiwe irengero

Yanditswe na Igizeneza Jean Désiré
Kuya 16 Mutarama 2023 saa 08:44
Yasuwe :

Ibyumweru bibiri birihiritse Ineza Bruce Junior umunyeshuri wo mu Ishuri Rikuru ry’Ubumenyingiro, INES Ruhengeri aburiwe irengero na n’ubu ababyeyi be bakaba nta makuru y’aho yaba aherereye bafite.

Uyu musore w’imyaka 25 wiga mu mwaka wa gatatu mu bijyanye n’ibyo gupima ubutaka (Land survey) ngo yabuze ubwo yavaga iwabo mu Karere ka Kamonyi ajya ku ishuri ku itariki ya 2 Mutarama 2023 kuva ubwo ngo ntibongeye kumuca iryera.

Umubyeyi wa Kayisenge Olive yabwiye IGIHE ko yaherekeje umuhungu we amugeza aho bategera imodoka, amubwira ko atagomba gukura telefoni ku murongo. Mu masaha ya saa munani ngo yongeye kumuhamagara aramubura agira ngo ni ibisanzwe ajya mu mirimo ariko nyuma akomeje kugerageza bikomeza kuba uko.

Ati “Twakomeje kugerageza nimero ye turamubura tunahamagara abana bakunda kugendana batubwira ko bamuheruka ubwo bajyaga mu biruhuko bya Noheli. Batubwiye ko na bo bakomeje kumuhamagara baramubura .”

Uyu mubyeyi ngo yasabye abo bana kujya kurebera aho yari asanzwe aba bamubwira ko yari aherutse kwimuka ko batazi aho yimukiye.

Byatumye uyu mubyeyi we ajya i Musanze muri Ines Ruhengeri bamubwira ko bazamufasha gushakisha ndetse bajya no gutanga ikirego mu Rwego rw’Ubugenzacyaha, RIB.

Ngo bakomeje gushakisha baza kumenya ko uyu musore ngo yabaga muri Susa agace kari hafi ya Ines Ruhengeri ariko bakomeza kumubura ndetse ngo na RIB yababwiye ko yarebye mu bigo binyurwamo n’abantu by’igihe gito kugira ngo bajyanwe mu bigo ngororamuco (transit center) bareba ko wenda yaba yarajyanyweyo baramubura.

Munezero Arsène usanzwe yigana na Ineza na we yavuze ko bamuheruka ubwo bari bagiye mu biruhuko by’iminsi mikuruko, ko kugeza ubu nta makuru y’aho aherereye babashije kubona.

Umuvugizi wa RIB, Dr. Murangira B. Thierry yatangarije IGIHE ko nyina wa Ineza Bruce Junior yatanze amakuru ku wa 12 Mutarama 2023 avuga ko umwana we wari waje ku ishuri bamubuze ku wa 02 Mutarama 2023.

Ati “Ubugenzacyaha mu Karere ka Musanze bwakiriye ayo makuru, ubu bukaba buri gushakisha aho Ineza Bruce Junior yaba aherereye.”

RIB isaba umuntu wese waba afite amakuru yafasha kumenya aho Ineza Bruce Junior yaba aherereye yakwegera Sitasiyo ya RIB ya Muhoza agatanga amakuru cyangwa agahamagara kuri 166.

Ineza Bruce Junior wigaga muri Ines Ruhengeri amaze ibyumweru bibiri aburiwe irengero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .