Umushinga wo kwimura ibitaro bya CHUK waheze he?

Yanditswe na Evariste Nsengimana
Kuya 19 Ukwakira 2018 saa 08:12
Yasuwe :
0 0

Imyaka hafi itanu igiye gushira hatangajwe umushinga wo kwimura ibitaro bya Kaminuza bya Kigali (CHUK), bigakurwa mu mujyi rwagati, gusa kugeza uyu munsi nturatangira gushyirwa mu bikorwa.

Mu Ukuboza 2013 nibwo uwari Umuyobozi w’Umujyi wa Kigali, Ndayisaba Fidèle, yatangaje ko CHUK igomba kwimuka mu Karere ka Nyarugenge, ikajyanwa i Masaka mu Karere ka Kicukiro.

Hari nyuma yo kwimurira mu Rwampara, ikigo nderabuzima cya Gitega, bivugwa ko inyubako zitari zijyanye n’igihe, n’abarwayi bashobora guhura n’ingorane mu kugezwayo mu buryo bworoshye.

Umujyi wa Kigali, wavugaga mu gice cyubatsemo CHUK hari kugenda hazamo umubyigano utewe n’ibikorwa bishya bihavuka birimo iby’ubucuruzi.

Nubwo hashize imyaka igera kuri itanu ibi bitangajwe, nta gahunda igaragara yo kwimura ibi ibitaro.

Habarurema Gaspard ushinzwe itumanaho muri Minisiteri y’Ubuzima n’ikigo cyayo, RBC, yabwiye IGIHE ko bikiri mu nyigo iri gukorwa n’Abashinwa.

Ati “Bagomba kubanza kwagura ibitaro bya Masaka, byakuzura, bakubaka n’ibitaro by’Akarere ka Kicukiro, nyuma bakabona kwimurirayo abarwayi.”

Yavuze ko ari umushinga mugari, ushobora kuzatwara nk’imyaka itanu uhereye uyu munsi.

Ibitaro bya Masaka bisanzwe biterwa inkunga na Leta y’u Bushinwa, ni nabwo bufite mu nshingano, umushinga wo kubyagura, kugira ngo haboneka ibikorwa remezo ibitaro bya CHUK bizakoreramo igihe bizaba byimuriweyo.

Habarurema ati “Uzi ko birya bitaro byubatswe ku nkunga y’Abashinwa. Hari itsinda ryabo riri kwiga uko bizagurwa, ntirirarangiza kwiga uko bizagurwa n’ibyo bazongeramo. Nta ngengo y’imari iramenyekana.”

Abarwayi ba Nyarugenge bazivuriza he?

Umuyobozi Mukuru wa CHUK, Dr Théobald Hategekimana, yabwiye IGIHE ko igihe bizimukira i Masaka, abarwayi bo mu Karere ka Nyarugenge bazakomeza kwivuriza ku by’Akarere ka Nyarugenge biri kubakwa i Nyamirambo.

Minisiteri y’Ubuzima ivuga ko abarwayi bazakomeza kwivuriza muri CHUK, ari abazaba boherejwe n’ibitaro by’Uturere, birimo n’ibya Nyarugenge.

CHUK ni bimwe mu bitaro bikomeye biri mu gihugu, ndetse byakira n’umubare munini w’abantu kuko byakira 70 % by’abarwayi baba boherejwe kuvurirwa mu bitaro bikuru, abenshi bakoresha ubwisungane mu kwivuza.

CHUK izimurirwa i Masaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza