Hatangajwe imishinga icumi ihiga iyindi mu cyiciro cya gatatu cy’amarushanwa ya iAccelerator

Yanditswe na Muhonzire Sylvine
Kuya 26 Ukuboza 2020 saa 08:04
Yasuwe :
0 0

Irushanwa rya iAccelerator rifasha urubyiruko guhanga ibisubizo by’ibibazo bibangamiye sosiyete, ku nshuro yaryo ya gatatu ryatoranyije abantu 10 bafite imishinga ihiga iyindi. Abatsinze bazabanza kujya mu mwiherero mu mwaka utaha wa 2021 mbere y’uko batoranywamo batatu ba mbere.

Gahunda ya ‘Innovation Accelerator’ (iAccelerator) itegurwa na Imbuto Foundation ifatanyije n’Ikigega cya Loni cyita ku Baturage (UNFPA), Ikigo cya Koreya y’Epfo gitsura Amajyambere (KOICA) na Minisiteri y’Urubyiruko n’Umuco.

Kuri iyi nshuro yaryo ya gatatu, ba nyir’imishinga 10 ba mbere batoranyijwe ku itariki 22 Ukuboza 2020, bazagira amahirwe yo kujya mu mwiherero mu mwaka wa 2021, uzabategura ndetse ukanabaha ubumenyi ku guhitamo imishinga myiza izavamo itatu ya mbere.

Aya marushanwa yatangijwe ku mugaragaro tariki 13 Ugushyingo 2020, aho buri munyarwanda wese uri hagati y’imyaka 18 na 30, yari yemerewe kwiyandikisha.

Ku ikubitiro hiyandikishije abagera kuri 690, batoranywamo 40 baje kuvamo 10 biciye mu kanama nkemurampaka, aho buri wese yahabwaga iminota itanu yo gusobanura uko umushinga we uzatanga ibisubizo ku rubyiruko.

Kuri iyi nshuro hibanzwe ku bintu bibiri by’ingenzi birimo, imishinga izatanga ibisubizo ku gufasha ingimbi n’abangavu ndetse n’urubyiruko rufite ubumuga, kubona amakuru n’ubufasha ku bijyanye n’ubuzima bw’imyororokere.

Hari kandi imishinga izafasha mu kumenyekanisha ibibazo urubyiruko ruhura nabyo bijyanye n’ubuzima bwo mu mutwe, hamwe n’uburyo byakemuka binyuze mu gushaka ubufasha ndetse n’inzira byanyuramo kugira ngo bikemuke.

Imishinga yatoranyijwe n’akanama nkemurampaka kagizwe na Dr. Damascene Iyamuremye, Umuyobozi mu Kigo cy’igihugu cy’Ubuzima (RBC) ushinzwe iIbijyanye n’Ubuzima bwo mu mutwe, Joel Murenzi, Uhagarariye Ishami rishimwe guteza imbere urubyiruko muri Imbuto Foundation, Daphrose Nyirasafari, Ukuriye ishami rishinzwe ubuzima bw’imyororokere muri UNFPA ndetse na Oswald Tuyizere, Umuyobozi w’ishami rishinzwe guteza imbere Ubukungu muri NCPD.

Mu mishinga icumi ya mbere yatoranyijwe, hazavamoitatu ihiga iyindi, aho ba nyirayo bazahembwa amafaranga ibihumbi 10$ azabafasha mu mishinga yabo, ndetse banahabwe amahugurwa n’ubumenyi byo kubafasha mu ishyirwa mu bikorwa by’imishinga yabo.

Imishinga 10 yatsinze ni iyi ikurikiria

Habimana Amadoullah: Umushinga we ni ugukora amashusho y’ibishushanyo azwi nka cartoon, azifashishwa mu kwigisha ndetse no guha amakuru abana bafite ubumuga, ku bijyanye n’ubuzima bw’imyororokere.

Confiance Cyubahiro, Eric Niyongira na Nadine Umurungi: Umushinga wabo witwa “Kundwa Typing Application and Booklet” uzafasha abawukoresha kongera ubumenyi mu kwandika bakoresheje mudasobwa, binyuze mu mikino bazajya bakina bandika ku bijyanye n’amakuru y’ubuzima bwimyororokere.

Nkurunziza Yvette:umushinga we witwa ’Intambwe’, uzaba ufite aho ukorera, aho urubyiruko ruzajya rujya rukiga byinshi ku bijyane n’ubuzima bw’imyororokere, ndetse n’uburyo bakwiyitaho ndetse bakita no ku bandi.

Umubyeyi Aimee Laetitia: We afite umushinga wo gukora porogaramu yo kwigisha igamije gusakaza amakuru ajyanye n’ubuzima bw’imyororokere mu bantu bafite ubumuga mu gihugu hose.

Mfitumukiza Jerome na Ntirenganya Jean Bosco: Aba bazatangiza urubuga rwo kuri interineti hamwe n’uburyo buzashyirwa muri telefone, bizajya bitanga amakuru y’ingirakamaro ndetse n’ubufasha ku bantu bafite ubumuga.

Umurerwa Josiane na Hirwubaruta Dan: Umushinga wabo ni ugukora gahunda izajya itangira ubufasha kuri telefoni, yitwa “VUGUKIRE”, izafasha abayikoresha kubona ubuvuzi n’abajyanama ku bijyane n’ibibazo by’ubuzima bwo mu mutwe.

Rukundo Janvier, Irasubiza Elie na Ishimwe Ivan: Umushinga wabo uzajya ukorera kuri murandasi, aho bazajya batanga amakuru ku buzima bwo mu mutwe mu rubyiruko, cyane cyane ay’ubuzima bw’imyororokere n’ubuzima bwo mu mutwe.

Sam Muhanguzi na Eric Nshizirungu: Umushinga wabo ni ugukora akanyamakuru gato kazajya gatanga inkuru zicukumbuye, ndetse n’inkuru zakozweho ubushakashatsi bwimbitse, bigamije guhindura icyo abantu batekereza ku buzima bwo mu mutwe.

Habiyambere Emmanuel na Hafashimana Oreste: Umushinga wabo ni igitangazamakuru, cyitwa “Menya Wirinde” kizibanda ku kongera ubumenyi ku bijyanye n’ubuzima bwo mu mutwe, kizanafasha kandi gutanga amakuru ndetse n’ubufasha ku byerekeranye n’ubuzima bw’imyororokere ku rubyiruko.

Marie Odile Ndayishimiye Uwineza na Charline Mugeniwayesu:Umushinga wabo ni ugufasha gutanga amakuru ajyanye n’ubuzima bw’imyororokere ndetse n’ubuzima bwo mu mutwe binyuze mu bikorwa bishimisha abantu, birimo gukora ibijyanye n’ubugeni, imitako yo kwirimbisha ku mubiri, ndetse no gukora ibyo kurya byoroheje.

Abatsinze mu cyiciro cya gatatu cya iAccelerator

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .