00:00:00 IGIHE NETWORK KN KINYARWANDA EN ENGLISH FR FRANCAIS

Umutego mutindi RDC yashatse gutega u Rwanda

Yanditswe na Iradukunda Serge
Kuya 2 August 2022 saa 07:35
Yasuwe :

Nta washidikanya ko Félix Antoine Tshisekedi akijya ku butegetsi muri Repubulika Iharanira Demokarasi ya Congo, benshi mu Banyarwanda biruhukije batangira kumva ko noneho nyuma y’igihe baba bagiye kubana neza n’iki gihugu cy’igituranyi bakozanyijeho rikaka haba ku butegetsi bwa Mobutu, ubwa Laurent-Désiré Kabila ndetse n’umuhungu we, Joseph Kabila.

Ibikorwa bya mbere Félix Antoine Tshisekedi yakoze akigera ku butegetsi byatumye arushaho kwigarurira imitima y’Abanyarwanda, bati “ntureba”, mureke Kabila wari waratubushabushe.

Nta washidikanya ko mu myaka ibiri ishize, iyo uza kubaza Umunyarwanda igihugu abona gifitanye umubano uzira kidobya n’igihugu cye mu karere yari kukubwira RDC.

Ntawe uzibagirwa amafoto yafatiwe i Goma na Rubavu muri Kamena 2021 ubwo Perezida Tshisekedi yasuraga u Rwanda, ndetse akambukana na Perezida Kagame na we agasura Goma.

Ni ubwa mbere inzego z’umutekano z’u Rwanda n’iza RDC zagaragaye zikorana nk’impanga ku buryo byari bigoye kubatandukanya.

Ibi byaje bikurikira ibindi bihe by’umubano mwiza hagati y’u Rwanda na RDC kuko mu myaka ibiri ishize, Perezida Kagame na Tshisekedi bahuye inshuro icyenda. Icyo gihe cyose, bagaragaraga bafatanye ukuboko, baganira, baseka, ku maso hagaragara akanyamuneza.

Mu mezi make ashize ubwo Umutwe wa M23 wuburaga imirwano, Leta ya Congo ikabyutsa ibirego by’uko ufashwa n’u Rwanda, benshi mu Banyarwanda barumiwe bati na Tshisekedi araduhindutse koko.

Ibintu byarushijeho kudogera muri Kamena 2022, ubwo Perezida Félix Tshisekedi, yeruraga agashinja u Rwanda ko rufasha Umutwe wa M23.

Muri Nyakanga 2022, uyu mugabo yongeye gutangaza amagambo akomeye kuri iki gihugu cy’igituranyi yijeje ubucuti bw’akadasohoka avuga ko nibiba ngombwa azagishozaho intambara.

Ni iki cyahinduye Perezida Tshisekedi?

Kimwe mu bibazo Abanyarwanda benshi bakibaza kugeza ubu ni icyahinduye Perezida Tshisekedi kugeza aho yerura akavuga ko ashobora gushoza intambara ku gihugu yise icy’abavandimwe.

Mu kiganiro IGIHE yagiranye n’inararibonye muri Politiki, Tito Rutaremara yavuze ko mu mboni ze hari impamvu nyinshi zatumye Perezida Tshisekedi ahinduka.

Tito Rutaremara yavuze ko kimwe mu bintu byatumye Perezida Tshisekedi ahinduka ari igitutu yashyizweho nyuma yo kugaragaza ko afite ubushake bwo kurandura imitwe yitwaje intwaro mu Burasirazuba bwa RDC ndetse akerekana ko azafatanya n’ibihugu byo mu Karere birimo n’u Rwanda.

Yavuze ko ibi byatumye hari abanyepolitiki bo muri RDC n’abo ku rwego rw’Isi batangira kwishyiramo Perezida Tshisekedi kubera inyungu bafite mu mitwe yitwaje intwaro.

Ati “Ubwo yavugaga ko azarwanya imitwe y’iterabwoba ndetse agatangira kubikora abantu barahagurutse. Iriya mitwe yose ya Mai Mai iba irinze ibirombe, ibirombe ni iby’abanyapolitiki, abo banyapolitiki niho bakura amafaranga yo kugura abaturage bo muri biriya bice kugira ngo babatore no kugura ab’i Burayi kugira ngo babavuge neza. Buriya imikorere y’i Burayi irimo ibibazo, hari icyo bita ‘lobby’ buriya muri Amerika n’i Burayi wemerewe guha umudepite cyangwa umusenateri amafaranga kugira ngo ajye akuvuga neza.”

Mu mboni za Tito Rutaremara, avuga ko Perezida Tshisekedi yarushijeho kujya ku gitutu bitewe n’uko amatora y’Umukuru w’Igihugu yegereje.

Yavuze ko uyu mugabo yahisemo guhinduka kugira ngo yinjire mu bihe by’amatora avuga rumwe n’abanyepolitiki bo muri RDC basanzwe barishyizemo u Rwanda ndetse n’abo ku rwego mpuzamahanga bafite inyungu mu mitwe yitwaje intwaro ikorera mu burasirazuba bw’iki gihugu.

Ati “Amatora muri RDC ari ejo bundi, mu busesenguzi nkora buriya hari abaje babwira Perezida Tshisekedi bati ko utari kuvuga rumwe na bariya banyepolitiki kandi bamwe aribo baje mugafatanya kugira ngo ugere ku butegetsi bizagenda bite kandi amatora ari ejo bundi?”

Rutaremara yavuze ko kubura imirwano kwa M23 yari imaze iminsi yijujutira ko RDC idashyira mu bikorwa amasezerano bagiranye byabaye nk’amata abyaye amavuta ku banyepolitike bo muri Congo kuko babonye kubigereka ku Rwanda byaba urwitwazo.

Yashatse kugwisha u Rwanda mu mutego

Tito Rutaremara yavuze ko ubwo Ingabo za Repubulika Iharanira Demokarasi ya Congo zarasaga ku butaka bw’u Rwanda inshuro ebyiri ndetse zigakurikizaho gushimuta abasirikare barwo zashakaga kurugwisha mu mutego.

Ati “Babigize urwitwazo barasa mu Rwanda, u Rwanda ruraceceka rusaba ko hakorwa iperereza, barongera bararasa rurengera ruraceceka, noneho baragenda bashimuta abasirikare b’u Rwanda bashaka ko narwo rurasa ndetse rujyeyo rurwane, ubundi havuke ibibazo by’umutekano basubike amatora.”

Yavuze ko ibi byose u Rwanda rwabirebye rurabyihorera noneho abanyepolitiki bo muri Congo bahitamo guhembera urwango n’ubwicanyi ku Banyarwanda bari muri RDC n’abaturage b’iki gihugu bavuga Ikinyarwanda.

Ibi ngo babikoze bumva ko u Rwanda ruzajyayo kuko rwavuze ko rutazareberera Jenoside n’ubwicanyi.

Ati “Noneho bafashe umurongo wo kuvuga ngo ubwo Abanyarwanda banze kudutera reka twice Abanyarwanda bari muri RDC wenda bazaza kubatabara, uwo babonye bagatwika, biraba abanyepolitiki babyenyegeza bazi ko tuzajyayo kuko twavuze ko ahazaba Jenoside tutazajya tureberera, na bo babikora gutyo u Rwanda narwo rurabimenya ruti reka icyo bashaka tukibime.”

Ibi bikorwa by’ubushotoranyi byarakomeje kugeza n’aho ku wa 17 Kamena 2022, Umusirikare wa Repubulika Iharanira Demokarasi ya Congo yinjiye ku butaka bw’u Rwanda anyuze ku mupaka uri mu Karere ka Rubavu atangira kurasa ku nzego z’umutekano, biza kurangira na we arashwe mu rwego rwo kwitabara.

Nubwo u Rwanda rwanze kugwa muri uyu mutego wa RDC, inzego z’ubuyobozi zatangaje ko mu gihe ubu bushotoranyi buzakomeza zitazareberera kuko na zo zifite inshingano zo kurinda ubusugire bw’igihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .