Umuryango WIBENA Impact washyizeho gahunda zizafasha urubyiruko n’abagore kwivana mu bukene

Yanditswe na Ndahayo Emmanuel
Kuya 25 Kanama 2020 saa 08:23
Yasuwe :
0 0

Umuryango Nyarwanda utegamiye kuri Leta, WIBENA Impact, watangiye gahunda ndende zigamije gufasha urubyiruko n’abagore muri Afurika gutera imbere, nka kimwe mu byiciro imibare igaragaza ko byasigaye inyuma mu iterambere ugereranyije n’abagabo.

Ni gahunda ndende, izashingira ku mirongo migari WIBENA Impact igenderaho, irimo guteza imbere uburezi bushingiye ku bumenyi, kwigisha indangagaciro z’ubuyobozi, guteza imbere abagore n’urubyiruko, guharanira uburinganire hagati y’ibitsina byombi, uburenganzira bwa muntu n’ubutabera kuri bose no kurwanya ihindagurika ry’ibihe harindwa ibidukikije.

Ni intego uyu muryango uvuga ko ushaka gusangiza Abanyafurika bose, mu rwego rwo gufasha abatuye uyu mugabane kurushaho gusangira amahirwe awubonekaho ashobora kuwuteza imbere.

Uyu muryango uvuga ko uburezi bwa Afurika bukwiye kuvugururwa, bugashingira ku bumenyi aho kuba ku mpapuro gusa.

Umuyobozi Ushinzwe Gahunda mu Karere muri Wibena Impact, René Yves Uwayo, yagize ati “Iyo ufite ubumenyi nta we ushobora kubugutwara, twizera ko ubumenyi ari yo nzira izageza Afurika ku iterambere.”

Yavuze intego z’u Rwanda na Afurika muri rusange zo gushingira ubukungu ku bumenyi, zumvikanisha impamvu hakwiriye impinduka mu bumenyi butangwa kuri ubu, bukarushaho kujyanishwa n’igihe.

Yavuze ko Umuryango WIBENA Impact uri gukora ubukangurambaga, mu rwego rwo gushishikariza abo bireba bose barimo na leta, gushyira imbaraga nyinshi mu kuvugurura ubumenyi muri rusange.

Muri urwo rugendo kandi Wibena Impact irategura amahugurwa agamije kuzamura ibyiciro by’abasigaye inyuma mu iterambere, barimo abagore n’urubyiruko.

Ni amahugurwa azigisha ubumenyi ngiro, akazahera ku bantu 120 bo mu Karere ka Nyarugenge, aho bazigishwa umwuga biyumvamo ndetse bakazanafashwa kubona ibikoresho bizabafasha kuwubyaza umusaruro.

Uwayo yagize ati “Ni imishinga igamije gutanga amahugurwa y’ubumenyi ngiro ku bantu bababaye kurusha abandi mu Karere ka Nyarugenge. Ni abantu 120 bazatoranywa mu mirenge igize ako karere, hanyuma, tuzabagezaho ibikoresho bakeneye bizatuma batangira kwiyinjiriza amafaranga”.

Avuga ku ngingo yo guteza imbere abagore n’urubyiruko, Uwayo yavuze ko ibi byiciro by’abantu biri mu byasigaye inyuma mu iterambere, aho imibare igaragaza ko mu bihe bya Coronavirus, ubushomeri bwiyongereye bukagera 22.1% buvuye kuri 13% mbere yayo.

Abagera kuri 25% by’abatakaje imirimo yabo ni abagore, 27.1% ni urubyiruko mu gihe abagabo bari 19% gusa.

Uwayo agaragaza ko hagikenewe imbaraga mu kurushaho gufasha ibi byiciro kuzamuka.

Yavuze ko iterambere ridashoboka abantu batuzuzanya, ari nayo mpamvu mu byo bitaho harimo ubwuzuzanye hagati y’ibitsina byombi. Ibi bizajyana no gufasha buri wese kubona amahirwe amugenewe ndetse no kugera ku nzozi yifuza, atazitiwe n’igitsina yavukanye.

Yakomeje ati “Reka abantu bakumirwe no kutagira ubushobozi, ariko ntibibe ari ibintu byashyizweho n’abantu.”

Ibi ngo bizatuma umutungo usangirwa mu buryo bwiza, aho buri wese azabona ibyo akwiye, ntihabeho abakene cyane mu gihugu kirimo n’abakire mu buryo bukabije cyane.

Mu gusigasira ubuzima bwiza, Uwayo avuga ko ari ngombwa ko nk’umuryango ugamije iterambere, bakwiriye kwiga ku kibazo cy’ihindagurika ry’ibihe no gufata neza ibidukikije kuko ari ho abantu bavoma ubuzima.

Yavuze ko kandi ari ingenzi kurinda ibidukikije mu rwego rwo kurengera ibisekuru by’ahazaza, “bishobora kuzumva inkura mu mateka kuko zitazaba zigihari.”

Umuryango Wibena Imapct uhuza inshingano zose hamwe ngo zitange umusaruro.

Yagize ati “Urebye imishinga yacu, ifite aho ihurira. Ufashe nk’urugero rw’amahugurwa tuzatanga, dushobora kwigisha inshingano za kiyobozi, tugakora ubukangurambaga burwanya ibiyobyabwenge cyangwa ihohotera, ubwo rero buri kimwe cyuzuzanya n’ikindi.”

Yavuze WIBENA Impact ikora isuzuma rihoraho, aka ya mvugo ya Steve Young igira iti ’ihame ni ukwigenzura ubwawe, ni ukwiteza imbere, kwivugurura uyu munsi kurusha uko wari umeze ejo".

Ubukangurambaga bugamije impinduka

Mu rwego rwo kurushaho guteza imbere urubyiruko, Umuryango WIBENA Impact ufite gahunda nini yo gukora ubuvugizi kuri Leta bugamije kuyishishikariza kurugabanyiriza imisoro.

WIBENA Impact ivuga ko n’ubwo imisoro itavanwaho burundu ku rubyiruko, ishobora kugabanywa cyangwa hakabaho igihe cy’idohorwa ku bucuruzi buto rukora mu rwego rwo kuruha amahirwe yo kubaka ubushobozi buzarufasha kwishyura imisoro mu gihe kirekire.

Usibye kugabanya imisoro, hari imishinga uyu muryango uteganya gukora mu rwego rwo kwita ku bidukikije irimo nko kuzatera ibiti mu cyumweru cy’ubucukuzi, kizihizwa mu mpera z’umwaka.

Aha kandi izanarushaho kwigisha abakora mu bucukuzi uburyo bwiza bwo kurinda ibidukikije byegereye aho bakorera, dore ko umwuga w’ubucukuzi iyo ukozwe nabi, wangiza cyane ibidukikije handuzwa imigezi, amashyamba n’ibindi.

Uwayo yagize ati “Nureba ubucukuzi bw’amabuye y’agaciro ku Isi hose, uzabona ko ari kimwe mu bintu byanduza ibidukikije cyane nk’amazi, gutema ibiti mu buryo budakurikije amabwiriza no kwanduza ubutaka. Kandi nanone ntitwahagarika ubucukuzi bw’amabuye y’agaciro kuko bufatiye runini ubukungu. Nko mu Rwanda ni urwego rwa kabiri rwinjiza amadevize menshi nyuma y’ubukerarugendo, ariko hari uburyo bwo kubukora neza hitabwa ku bidukikije muri rusange.”

Mu rwego rw’uburezi, WIBENA Impact ivuga ko iteganya kwibanda ku guteza imbere uburezi bushingiye ku kumenya amateka y’umugabane wa Afurika, aho kwibanda cyane ku kumenya ibindi bihugu, kuko “utazi iyo ava atanamenya iyo ajya”.

Uwayo yagize ati “Twizera ko uburezi ari uburenganzira bwa buri Munyafurika. Twifuza ko Abanyafurika bamenya amateka yabo kuko igihugu kitazi amateka yacyo kizimira mu rugendo hagati. Iyo urebye muri Afurika, twiga cyane amateka yo hanze kurusha ayacu, ibyo bituma dukunda ibihugu byo hanze kurusha uko dukunda ibihugu byacu. Mu gihe rero udakunze aho uri, ntuzanahakorera ibikorwa by’iterambere rirambye.”

WIBENA Impact ni umwe mu miryango wafashije abaturage kubona ibyo kurya mu bihe bya Guma mu rugo, aho watanze ibiribwa mu bice bya Nyarugenge, Nyakabanda, Kimisagara na Kicukiro.

Ufite intego yo kugera mu bihugu byose bya Afurika kuko akenshi usanga ibibazo byinshi bisangiwe n’umugabane wose, ibi rero bikazawuha amahirwe yo kugera ku ntego zawo zo kuzamura imibereho y’Abanyafurika muri rusange.

Kuri ubu, uyu muryango watangiye ibiganiro byifashisha ikoranabuhanga, bikavuga ku ngingo zitandukanye. Nko muri uku kwezi, ibiganiro byagarutse ku ngingo ivuga ku “Urubyiruko n’impano”, byitabiriwe n’abantu bakomeye barimo n’umuhanzi Mani Martin.

Ibi biganiro kandi byakuruye imbaga y’abarenga 23 000 baturutse hirya no hino ku Isi.

Uyu muryango ufasha ibyiciro by’abababaye kurusha abandi, ukabafasha kubaka ubuzima no gutera imbere. Ku bantu bafite imishinga y’iterambere ishobora guhindura ubuzima bwa benshi, WIBENA impact ibaha ikaze, aho bashobora kuyigeraho mu buryo bworoshye, banyuze ku mbuga nkoranyambaga zayo cyangwa bakayigana ku cyicaro gikuru giherereye mu nyubako ya Centenary House mu Mujyi wa Kigali.

Ku bifuza kuwutera inkunga, WIBENA Impact yiteguye gukorana na bo, aho umuntu ku giti cye, ikigo, imiryango runaka n’abandi benshi, bashobora kuyegera bakerekwa imishinga bateramo inkunga. Bijyanye n’inshingano nini uyu muryango ufite, kuwutera inkunga ni ugufasha urubyiruko, abagore n’abandi bafite imishinga uyu muryango uri guteza imbere.

Ibikorwa bya WIBENA Impact wanabisanga ku mbuga nkoranyambaga zirimo urubuga rwayo rwa https://www.wibenaimpact.org/ ndetse na Twitter na Facebook ku izina rya Wibena impact

WIBENA Impact bafite intego yo kuteza imbere ibyiciro by'abasigajwe inyuma birimo urubyiruko n'abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .