Umuryango WaterAid wibukije abatuye Bugesera ko kugira ubwiherero biri mu bihesha umuntu agaciro

Yanditswe na Iradukunda Serge
Kuya 20 Ugushyingo 2019 saa 11:51
Yasuwe :
0 0

Umuryango Mpuzamahanga ukora ibikorwa by’isuku n’isukura, WaterAid Rwanda, wibukije abatuye mu Murenge wa Nyarugenge mu Karere ka Bugesera ko kuba umuntu afite ubwiherero buboneye ari kimwe mu bimuhesha agaciro mu bandi.

Ku wa 19 Ugushyingo 2019 nibwo abakozi ba Water Aid Rwanda bifatanyije n’abaturage bo mu Bugesera kwizihiza Umunsi Mpuzamahanga w’Ubwiherero, baboneraho no kubibutsa ko kugira ubwiherero bwiza biri mu bibahesha agaciro.

Umuyobozi ushinzwe Ubuvugizi n’Ubushakashatsi muri Water Aid, Mukeshimana Vestine, yavuze ko uretse kutagira ubwiherero biteza indwara bikanatesha umuntu agaciro mu bandi.

Yagize ati “Kutagira ubwiherero buboneye bitera indwara uretse no kurwara harimo no guta agaciro, umuntu wiyubashye ntiyituma ku gasozi. Ntibikwiye ko twabona umubyeyi wituma ahantu abantu bose bamureba ntibiduha ishema.”

Yongeyeho mu rwego rwo kwihesha agaciro abishoboye bakwiye gufasha abatishoboye kubona ubwiherero buboneye.

Ati “Mureke rero twese duhaguruke dukore uko dushoboye n’abadafite ubushobozi duturanye dushyire hamwe imbaraga nk’uko byakozwe muri iki cyumweru tubunganire ariko ako gaciro kari mu kugira aho umuntu yiherera tukagire, ubwiherero rero ni kimwe mu byongera agaciro ku muntu.”

Mu cyumweru cyo kwitegura Umunsi Mpuzamahanga w’Ubwiherero, Umuryango Water Aid wubakiye ubwiherero ingo 328 zo mu Karere ka Nyamagabe na 76 zo mu ka Bugesera.

Umwe mu bubakiwe ubwiherero na Water Aid, Gahongayire Epiphanie, yavuze ko ubwo yari asanganywe yaterwaga ipfunwe ryo kubukoresha.

Ati “Ukuntu nari mbayeho ntibyari byiza kuko kujyamo kwari ukubanza ngakebaguza ngo ndebe ko mfite umutekano, nta muntu undeba ubundi nkabona kwinjiramo ariko nyuma yo kubona ubu ndishimye. Nzajya mbujyamo nisanzuye.”

Ikibazo cyo kutagira ubwiherero cyane cyane mu bihugu bikiri mu nzira y’amajyambere gihangayikishije Isi, kuko abarenga miliyoni 670 ku Isi yose batabufite.

Umuyobozi w’Akarere ka Bugesera wungirije ushinzwe Imibereho myiza y’Abaturage, Imanishimwe Yvette, yabwiye abaturage ko kugira ubwiherero buboneye ari inshingano zabo.

Ati “Kugira ubwiherero bwujuje ibisabwa ni inshingano zacu nk’abaturage beza, ntibikwiye ko twagira umuturage udafite ubwiherero.’’

Yongeyeho ko abadafite ubushobozi bazajya bafashwa ariko anenga abatubwubaka ku bwende.

Yakomeje ati “Wenda birashoboka ko waba udafite ubwiherero bitewe n’amikoro ariko n’utayafite turamusindagiza kugira ngo ave mu cyiciro kimwe ajye mu kindi ariko birababaje cyane ku muntu ubishoboreye yarangiza akazategereza ko bamwubakira ubwiherero, akazategereza umufatanyabikorwa, akazategereza akarere.”

Umuryango wa Water Aid watangiye gukorera mu Rwanda mu 2010 aho ufatanya na leta mu bikorwa byo kugeza amazi meza ku baturage n’isuku n’isukura. Ukorera mu Turere twa Bugesera na Nyamagabe ariko ufite intego yo kugeza amazi meza n’ibikorwa by’isuku n’isukura kuri bose.

Umuyobozi ushinzwe Ubuvugizi n’Ubushakashatsi muri Water Aid, Mukeshimana Vestine, yavuze ko kugira ubwiherero buboneye biri mu bihesha umuntu agaciro
Umuyobozi w’Akarere ka Bugesera wungirije ushinzwe Imibereho myiza y’Abaturage, Imanishimwe Yvette, yibukije abaturage ko kugira ubwiherero buboneye ari inshingano zabo
Water Aid ifatanya na Leta y'u Rwanda mu bikorwa bitandukanye by'isuku n'isukura
Ubwiherero Gahongayire Epiphanie yakoreshaga mbere y'uko yubakirwa ubundi na Water Aid Rwanda
Umuyobozi ushinzwe Ubuvugizi n’Ubushakashatsi muri Water Aid, Mukeshimana Vestine, atera igipande ku bwiherero buri kubakirwa umuturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza