Umuryango w’Abanyarwanda batanu wirukanywe muri Uganda wamburwa imitungo yose

Yanditswe na N.Kubwimana Janvière
Kuya 30 Mutarama 2020 saa 05:54
Yasuwe :
0 0

Umuryango w’abantu batanu bagizwe na Manishimwe Elias na Iradukunda Aimerance n’abana babo batatu, birukanywe muri Uganda, nyuma y’imyaka isaga itatu babayo, bamburwa n’imitungo yose bari bafite bataha mu Rwanda amara masa.

Uyu Manishimwe n’umugore we bagiye muri Uganda mu 2017 baturutse mu Karere ka Kayonza, Umurenge wa Rwinkwavu, berekeza mu Karere ka Gakumiro, mu gace kitwa Bunyoro mu isantere ya Karama muri Uganda, ari naho baje baturutse.

Mu gitondo cyo kuri uyu wa Kane, nibwo bageze ku mupaka wa Cyanika, bakirwa n’inzego z’umutekano, aho bagiye gushakirwa uko basubizwa aho bakomoka.

Uyu muryango uvuga ko wagiye muri Uganda, ari umuntu ubajyanyeyo kubaha akazi ko kumuhingira, gusa ngo bagezeyo arabatoroka babura aho berekeza, batangira kubaho mu buzima bwo kwirwanaho kuko ngo nta buryo bwo gusubira inyuma bari bafite.

Bakomeje bavuga ko aho bari batuye hari abandi banyarwanda bagenzi babo, gusa ngo babaho mu bwihebe kuko batotezwa cyane, aho ngo ntawuhingayo ari umunyarwanda ngo asarure, ndetse kuri ubu uwahaguze isambu arayakwa ntagire aho abariza.

Mu buhamya bwa Iradukunda yagize ati "Njye n’umugabo wanjye twagiye mu gihugu cya Uganda mu 2017, tujyanywe n’umugabo witwa Mufumbira, ngo tujye dukora mu mirima ye, tugezeyo araducika turaburana, dutangira kubaho dushakisha icyadutunga kuko nta buryo bwo gutaha twari dufite".

Akomeza avuga ko muri ako gace ka Bunyoro, bari batuyemo batunguwe no gusanga Umunyarwanda ari ikizira, ku buryo ngo niyo agerageje guhinga bikera bisarurwa b’abanya -Uganda, kuko ngo batahinze ku butaka bw’igihugu cyabo, kugeza n’ubwo babatera mu rugo bakabakubita ngo bajye iwabo mu Rwanda.

Ati "Aho mu Bunyoro nta munyarwanda uhaba ngo agoheke, urahinga wagira amahirwe byeze abanya-Uganda, bakabisarura ngo aho wahinze si ku butaka bw’u Rwanda”.

“Muri uyu mwaka wa 2020 bwo byabaye ibindi, ubu bari basigaye babaririza aho ingo z’abanyarwanda ziri, bakarara baturaririye batera amabuye ku nzu turimo, ntibanatinyaga kwinjira mu nzu bakadukubita ngo dutahe iwacu. icyari gisigaye ni ukutwica pe”.

Manishimwe, umugabo wa Iradukunda, avuga ko nyuma yo kubona ko iherezo ry’umunyarwanda uri muri Uganda ari ribi cyane, nibwo bahisemo gufata umwanzuro wo gutaha, gusa ngo aho bafatiye iki cyemezo batunguwe no kubona babatse ibyabo bari bamaze kugurisha bagataha amara masa.

Akomeza asobanura ko binjira mu modoka yagombaga kubacyura, binjiranyemo imitwaro 65 y’amashilingi ya Uganda ariko bakaza kubiba byose n’ibikapu bari batwayemo imyenda yabo barabitwara.

Ati "Tubonye ko iherezo ry’umunyarwanda muri Uganda ari ribi, twagurishije ibyo twari dufite, dutega imodoka iducyura, tugeze Kisoro baratubwira ngo dusohoke mu modoka, ngo nta modoka ijya iharenga. Bumvise tuvuga ikinyarwanda, haza abagabo bane baratubwira ngo ku mupaka ntawukihaca basigaye bicana, ngo uwinjiyeyo wese baramurasa".

"Batweretse inzira ducamo, tugeze ahantu hari ishyamba, baratubwira ngo tubahe ibyo dufite byose nitwanga baratwica, ngo n’ubundi bamaze kuhicira benewacu bane, batwatse imitwaro itanu twari dusigaranye, kuko andi imitwaro 60 bayatwamburiye mu modoka".

Akomeza avuga ko nyuma yaho haje umupolisi wo muri Uganda akavugana n’abo bagabo babamburaga, amaze kugenda ngo babaka andi imitwaro 12, ngo niko uwo mupolisi avuze, ngo nibatayabona barabica.

Nshimiyimana avuga ko yahamagaye abantu yasize aho avuye bamwoherereza ayo mafaranga, ngo nibwo babaherekeje bageze ahantu hari umuhanda w’igitaka, babona abantu babaturuka imbere, abari babaherekeje bariruka babasiga aho.

Manishimwe n'umuryango we birukanywe muri Uganda bambuwe n'imitungo yabo yose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza