00:00:00 IGIHE NETWORK KN KINYARWANDA EN ENGLISH FR FRANCAIS

Umunyarwandakazi muri 20 bafite imishinga yahawe ibihembo muri COP27

Yanditswe na Ntabareshya Jean de Dieu
Kuya 12 Ugushyingo 2022 saa 04:44
Yasuwe :

Umushinga wo gutunganya amazi no kuyakwirakwiza watangijwe n’umukobwa w’umunyarwanda washinze sosiyete yitwa Iriba Water Group Ltd, waje mu mishinga 20 y’urubyiruko irengera ibidukikije muri Afurika, yahembwe mu nama y’Umuryango w’Abibumbye yiga ku mihindagurikire y’ibihe, COP27.

Iriba Water Group yatangijwe mu 2015, nyuma y’uko Ishimwe Yvette yisanze mu gace katagiraga amazi meza mu Ntara y’Iburasirazuba bimufungura amaso atangiza umushinga wo gufasha abaturage kubona amazi meza.

Nubwo yatangiriye mu Karere ka Kayonza, ubu hirya no hino uhasanga ibikorwa bye byo gukwirakwiza amazi mez.

Nko muri Kigali amazi ya Iriba arazwi cyane by’umwihariko ku bakorera mu magaraje no ku mihanda uhasanga utuzu aho acururizwa.

Ibi byafashije na ba bandi batari kubasha kubona amafaranga yo kugura amazi yo kunywa atunganywa n’inganda zitandukanye bari ku rugendo mu gihe abaturage bo mu byaro na bo bafashwa kubona amazi meza.

Ishimwe Yvette yari afite inzozi zo kugeza uyu mushinga we hirya no hino muri Afurika kuko ibice byinshi bikunze kugira ikibazo cy’amazi meza bigendanye n’imiterere y’ibihugu bya Afurika n’ubukungu butaratera imbere.

Uyu mukobwa si ubwa mbere ahemberwa ko yatinyutse agatangiza uyu mushinga usa n’aho ari mugari kuko no mu 2018 yahawe igihembo n’uwari Umwamikazi w’ Bwongereza, Queen Elizabeth II nk’umukobwa witeje imbere.

Mu nama Mpuzamahanga yita ku kurengera ibidukikije iri kubera mu Misiri ya COP 27 urubyiruko rufite imishinga ibugangabunga ibidukikije yahembwe asaga miliyoni ebyiri z’amadorali ya Amerika.

Imishinga 20 yahembwe ni iyageze ku cyiciro cya nyuma kuko yatoranyijwe muri 50 ivuye mu irenga 3000 yari yageze mu irushanwa.

Umuyobozi Mukuru wa Banki Nyafurika itsura Amajyambere, Dr Akinwumi Adesina yavuze ko mu gushaka ibisubizo by’ibyo Afurika ikeneye urubyiruko rukwiye kuba ku ruhembe.

Ati “Urubyiruko rukwiye kuba imbere mu guharanira buri kimwe cyose cyabugabunga ibidukikije. Nta muntu muto utashobora kugira uruhare mu kubungabunga ibidukikije. Aba bana bacu bagomba kuba kimwe mu bisubizo. Bafite ubuhanga n’ubushake, barategura ahazaza kandi hagomba kuba igisubizo ku kubungabunga ibidukikije muri Afurika.”

Abahembwe basabwe gukomeza kugira uruhare rukomeye mu gukemura ibibazo bihangayikishije umugabane wa Afurika binyuze mu bitekerezo byabo n’umutungo kamere Afurika ifite.

Imishinga yahembwe ihagarariye umugabane wa Afurika aho 50% by’abahembwe bagomba kuba abagore bafite udushya mu nzego zitandukanye ariko imishinga ikorwa ibugangabunga ibidukikije.

Muri iyi mishinga yahembwe harimo 80% irebana n’ubuhinzi, hakabamo irebana no gutunganya imyanda no kuyibyaza umusaruro, kubungabunga amazi n’isukura, ingufu zisubira n’ibindi.

Imishinga yatsinze harimo Flushh yo muri Namibia, Green Impact Technologies, Malawi, AgriTech Analytics muri Kenya, Baramoda mu Misiri, Cassavita yo muri Cameroon, Ecobarter muri Nigeria, Farmer Lifeline Technologies muri Kenya na Grocircular Agro Services yo muri Nigeria.

Hari kandi Iriba Water Group Ltd yo mu Rwanda, Mpatsa Engineering Company Limited muri Malawi, Viva Organica ya Botswana, Voltx for Engineering & Industries mu Misiri, West African Feeds yo muri Ghana, Kisumeo Organics Limited muri Kenya, Agroexpert farming muri Sénégal, Eurl Algerienne Des Industries Technologiques muri Algeria, Lono wo muri Côte d’Ivoire, Pazelgreen Technologies muri Nigeria, Akatale On Cloud wo muri Uganda na Multi-Tech Sustainable Solutions (MTTS) muri Cameroon.

Ishimwe Yvette watangije Iriba Water Group Ltd

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .