Umunyarwanda yatsindiye isoko ryo kugemurira amagi ingabo za Loni muri Congo

Yanditswe na Akayezu Jean de Dieu
Kuya 21 Ukwakira 2019 saa 09:45
Yasuwe :
0 0

Umworozi w’umunyarwanda, Musabyimana Jean Baptiste, wororera inkoko mu Karere ka Bugesera yabonye isoko ryo kugemurira amagi agera ku bihumbi magana ane ingabo za Loni zishinzwe kugarura amahoro mu Burasirazuba bwa Congo (Monusco).

Musabyimana ayobora Ikigo Agri-Business Solution Ltd, gifatanya ubworozi bw’inkoko no gutunganya ibiryo byazo. Yabitangiye mu 2016, ahereye ku nkoko ibihumbi 10 ariko kuri ubu amaze kugira izisaga ibihumbi 70.

Izi nkoko afite kuri ubu zishobora gutera amagi ibihumbi 60, amenshi akayagurisha mu bihugu bituranye n’u Rwanda cyane cyane muri Repubulika Iharanira Demokarasi ya Congo.

Igi rimwe arigurisha nibura amafaranga 70, bivuze ko nibura ku munsi ashobora kwinjiza miliyoni 4.2 Frw.

Umwaka ushize yahawe isoko ryo kugemurira ingabo za Loni ziri muri Congo amagi ibihumbi 400.

Yabwiye The New Times ko kugira ngo yemererwe kugemura ibintu muri Loni, byabaye ngombwa ko abakozi b’uyu muryango bafata nibura umwaka bagenuzura ibikorwa by’ubworozi bwe, aho bagiye bohereza amagi i Burayi kugira ngo bayagerageze muri laboratwari zabo bemeze niba koko ari meza kandi yizewe.

Ni Umunyarwanda wa mbere uhawe isoko ryo kugemura ibikomoka ku nkoko muri Loni.

Yavuze ko “Ubushobozi bwo kugemura ibikomoka ku nkoko muri Loni tubukesha ubwiza bw’ibyo dukora twirinda gukoresha imiti ishobora kugira ingaruka ku buzima bw’abantu.”

Yakomeje avuga ko bigaragaza iterambere ry’urwego rw’ubworozi by’umwihariko ubw’inkoko mu Rwanda.

Musabyimana avuga ko yatangije ishoramari rya miliyoni $1 ariko kuri ubu amaze kugera kuri miliyari $4. Intego ye ni ukuzamura urwego rw’ubworozi bw’inkoko mu Rwanda rukarushaho kuba urubyara inyungu kuri we n’abandi bashoramo imari.

Uyu mugabo ukoresha abakozi 50 bahoraho n’abandi 15 badahoraho, avuga ko kugeza ubu amaze guhugura abandi borozi b’inkoko bagera ku munani mu gihugu hose.

Yakomeje agira ati “Nshaka kugira nibura inkoko ibihumbi 200, ariko ikinshimisha ni uko uyu mwaka utaha dushobora kuzaba dufite nibura aborozi b’inkoko 20, bakora ubucuruzi kandi uru rwego rwose dushyizemo no gutunganya ibiryo by’inkoko n’imiti bashobora kubona inyungu muri uru rwego.”

Ubwo yafunguraga Inama Mpuzamahanga yiga ku iterambere ry’ubworozi bw’inkoko no kongera umusaruro w’ibizikomokaho, Minisitiri w’Ubuhinzi n’Ubworozi, Dr Mukeshimana Geraldine, yatangaje ko umwaka ushize u Rwanda rwabonye miliyoni 12 z’amadorali ya Amerika, rwavanye mu gucuruza amagi hanze yarwo.

Imibare y’Ikigo cy’Igihugu gishinzwe guteza imbere Ubuhinzi n’Ubworozi, RAB, igaragaza mu Rwanda habarurwa inkoko zigera kuri miliyoni esheshatu zirimo amoko y’izitanga inyama, izitanga amagi [nazo zirimo amoko atandukanye] n’izindi.

RAB ivuga ko mu myaka icumi ishize umusaruro w’ibikomoka ku nkoko birimo amagi n’inyama wiyongereye aho nk’amagi yari toni ibihumbi bitanu mu gihe kuri ubu amagi asigaye asarurwa ku mwaka angana na toni ibihumbi 40.

Ni mu gihe umusaruro w’amagi wavuye kuri toni 3000 ugera kuri toni 8500. Nibura 30% by’uyu musaruro byoherezwa ku isoko ryo hanze mu gihe 70% ari ugurishwa imbere mu gihugu.

Ikigo Agri-Business Solution Ltd cya Musabyimana gikora ubworozi bw'inkoko no gutunganya ibiryo byazo
Musabyimana yabonye isoko ryo kugemura amagi muri Loni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza