Umunyamakuru Phocas Ndayizera yasabye urukiko kugirwa umwere

Yanditswe na Prudence Kwizera
Kuya 14 Ukwakira 2020 saa 10:24
Yasuwe :
0 0

Umunyamakuru Phocas Ndayizera n’abo bareganwa 12, basubiye imbere y’Urugereko rwihariye rw’Urukiko Rukuru mu Rwanda ruri i Nyanza ruburanisha ibyaha Mpuzamahanga n’ibyambukiranya imipaka, bavuga ku cyifuzo cy’ubushinjacyaha bwabasabiye gufungwa burundu nibaramuka bahamwe n’ibyaha baregwa.

Uko ari 13 bashinjwa ibyaha birimo kugambirira kugirira nabi ubutegetsi buriho cyangwa kubuhirika hakoreshejwe intambara cyangwa izindi mbaraga; kugambana no gushishikariza abandi gukora icyaha cy’iterabwoba; ubwinjiracyaha bwo gukoresha binyuranyije n’amategeko ikintu giturika cyangwa ikindi kintu gihumanya ahantu hakoreshwa na rubanda n’icyaha cyo kujya mu mutwe w’abagizi ba nabi.

Ubushinjacyaha buvuga ko uyu mugambi abaregwa bateguraga wari ukuriwe na Cassien Ntamuhanga. Uyu araburanishwa nk’uwatorotse ubutabera.

Iburanisha ryo kuri uyu wa Gatatu ryabaye hifashishijwe uburyo bw’iyakure buzwi nka ‘video conference’ kubera icyorezo COVID-19 cyugarije Isi, abaregwa bose bari muri Gereza ya Mageragere iri mu Mujyi wa Kigali.

Phocas Ndayizera ni we wahawe ijambo bwa mbere avuga ku byaha ashinjwa. Yahereye ku nyandiko zimushinja ibyaha yasinyiye mu bugenzacyaha, avuga ko yabikoreshejwe ku gahato atazi ibyanditseho.

Yasobanuye ko amajwi yagaragajwe n’ubushinjacyaha nk’ikimenyetso kimushinja ari ‘nk’ikinamico’ kuko nta kuri kurimo kandi byumvikana ko atafatiwe ku minara y’itumanaho, ahubwo yacuriwe muri studio.

Yavuze ko ayo majwi yumvikana agaragaza ko Ntamuhanga Cassien yavuganaga n’uwitwa Tembo ariko mu by’ukuri ayo majwi atandukanye kuko umwe yumvikana ari muri studio naho undi amajwi ye akumvikana nk’ayanyuze ku minara.

Yavuze ko aho abishingira ari uko ayo majwi y’abavugana bombi yumvikana mu buryo butandukanye kuko rimwe ryumvikana nk’iryaturutse mu kanwa ako kanya irindi rikumvikana nk’iryaturutse ku munara.

Ikindi ngo ni uko hajemo umuntu wa gatatu kandi ari babiri bavugana, agaragaza ko uwo wundi wajemo yiswe Tembo ari uwa gatatu kandi nyamara ubushinjacyaha buvuga ko ari we wa wavuganaga na Ntamuhanga. Ibyo akabishingiraho agaragaza ko amajwi yagaragajwe ari amahimbano.

Agaruka ku bo bareganwa, yavuze ko uwo azi ari Karangwa Eliaquim gusa naho abandi yabamenyeye mu rukiko bityo ntaho ahuriye nabo.

Yagaragaje ko ibyaha aregwa byahinduriwe inyito, hongerwamo n’ibindi ndetse ibindi bikurwamo, bityo ibimenyetso by’ubushinjacyaha nta shingiro bifite.

Ndayizera yavuze ko ubushinjacyaha bushaka kumuhuza na Ntamuhanga Cassien bwifashishije ibimenyetso byo mu rundi rubanza yaburanye mbere (Ntamuhanga) kandi we ntaho ahuriye narwo, bityo asaba ko ibimenyetso byagaragajwe bitahabwa agaciro.

Yavuze ko dosiye ikubiyemo ibyaha baregwa yakozwe n’ubushinjacyaha igaragaza ko yakozwe mbere y’uko bamwe mu bo bareganwa bafatwa kandi amazina yabo ayirimo, akibaza ukuntu abantu bakorerwa dosiye batarafatwa, bityo ko bigaragara ko ari impimbano.

Abareganwa n’Umunyamakuru Phocas Ndayizera ni Karangwa Eliaquim; Niyonkuru Emmanuel alias Elungu; Niyihoze Patrick alias Nick; Byiringiro Garnon alias Bingo; Bikorimana Bonheur; Bizimana Terence; Munyensanga Martin alias Corbon; Mushimiyimana Yves; Nshimyumuremyi Jean Claude alias Kayima; Rutaganda Bosco; Nshiragahinda Erneste na Ukurikiyimfura Théoneste.

Umunyamakuru Phocas Ndayizera na bagenzi be basubiye imbere y'urukiko

Ndayizera yavuze no kuri video yagaragajwe n’ubushinjacyaha nk’ikimenyetso aho hiyambajwe umuhanga mu gusobanura imikorere y’ibiturika, avuga ko hari ibidasobanutse birimo kuko batagaragaje uburyo imigozi ikoreshwa cyangwa hakoreshwa wireless mu kubituritsa, bityo icyo kimenyetso nta gaciro gifite.

Umwunganira mu mategeko yasobanuye ko dosiye ya Ndayizera idafite ukuri kuko agifatwa yabajijwe ku bijyanye n’itangazamakuru ariko nyuma bamurega iterabwoba. Yavuze ko bitumvikana uburyo iyo dosiye ya mbere ijyanye n’itangazamakuru itagaragazwa kandi bayisabye ubugenzacyaha burayibima.

Yakomeje avuga ko uwo yunganira yagaragaje uburyo yafashwemo ajyanwa ahantu hatazwi akahamara icyumweru kirenga, bityo kuba ashinjwa guhindura imvugo bitahabwa agaciro kuko ibyo yemereye mu bugenzacyaha yabikoreshejwe ku gahato.

Yavuze ko mu bimenyetso byose ubushinjacyaha bwagaragaje nta hantu na hamwe bwerekanye ko Ndayizera yigeze ajya mu mugambi wo kugirira nabi ubutegetsi ahubwo bwagaragaje ko wacuzwe na RNC. Ibyo ngo bigaragaraza ko uwo yunganira ntaho ahuriye nabyo, bityo akwiye kugirwa umwere.

Amajwi yazanywe nk’ikimenyetso yanenzwe ubuziranenge

Uwunganira Ndayizera mu mategeko yavuze ko amajwi (audio) yazanywe n’ubushinjacyaha nk’ikimenyetso mu rubanza, nta gaciro akwiye guhabwa kuko butagaragaje nimero za telefone zavugiweho ahubwo ari amajwi bwazanye butagaragaza aho yafatiwe. Kuri iyi ngingo yavuze ko bagombaga kugaragaza nimero z’abantu bavuganaga bakerekana ko zibabaruyeho kandi ari izabo.

Yakomeje avuga ko mu byo ubushinjacyaha bwavuze ntaho bwagaragaje ko nta tumanaho ryigeze riba hagati ya Ntamuhanga na Ndayizera, bityo ntaho bahuriye mu ikorwa ry’ibyaha.

Kuri raporo yakozwe ku biturika bivugwa ko byafatanwe abaregwa, Umunyamategeko wunganira Phocas Ndayizera yavuze ko iyo raporo ikwiye kwerekwa urukiko hakarebwa n’ubuhanga bw’uwayikoze (kuko bwavugaga ko izakorerwa mu mahanga kuko mu Rwanda nta babishoboye bahari) ndetse hakagaragazwa ukuri kabyo kuko hari indi raporo ishobora kuba ihari igaragaza ko bidaturika.

Yavuze ko anenga ibinti bine bikubiye muri iyo raporo yiswe iy’abahanga aribyo: icya mbere ni uko yvuze ko bitungwa n’urwego rwa gisirikare gusa aho kwerekana ubukana bwabyo; icya kabiri ni uko raporo yivuguruza ikavuga ko video itagaragaza uko biturika kandi aribyo ubushinjacyaha bwaregeye; icya gatatu ni uko abo bahanga batabasha gusobanura amazina y’ibice bigize ibyo biturika bityo bigatuma bakemanga ubuhanga bwabo; icya kane ni uko ubushinjacyaha bwavuze ko ibyo biturika bikoreshwa na wireless ariko abahanga bagasobanura ko bikoresha insiga, ibyo basanga ari ukuvuguruzanya.

Ikindi yagaragaje ko ubushinjacyaha bwivugurujeho ni aho bwavuze ko ibiturika byafatiwe mu Karere ka Muhanga mu nzu yari yakodeshejwe ariko ku rundi ruhande bukavuga ko Phocas Ndayizera yafashwe agiye kubizana biturutse hanze y’igihugu.

Uwunganira Phocas Ndayizera yasobanuye mu rubanza ubushinjacyaha bwagaragaje imihindagurikire y’inyito y’ibyaha bityo urukiko rukwiye kuzabyitaho.

Yavuze ko uwo yunganira mu mategeko akwiye kugirwa umwere kuko nta kimenyetso na kimwe kimushinja cyagaragajwe.

Nyuma ya Ndayizera, Karangwa Eliaquim ni we wahawe umwanya. Uyu aregwa nk’umutekinisiye wagombaga guhuza uburyo bwo guturitsa ibisasu.

Ku bimenyetso byazanywe n’ubushinjacyaha, yavuze ko video yerekanywe aho umuhanga asobanura uko intambi zituritswa, nta gikoresho cye na kimwe kirimo.

Yavuze ko abahanga basobanuye ko imigozi y’intambi atari insinga ahubwo ari ibitembo (amatiyo) bityo bidashobora gutwara umuriro w’amashanyarazi. Ashingiye kuri ibi yavuze ko ibyo ubushinjacyaha bubarega byo guturitsa ibisasu nta shingiro bifite.

Karangwa yavuze ko afatwa yahatiwe n’ubugenzacyaha kwemera ibyaha no gushinja Ndayizera ndetse bujya kwiha ku ngufu ibikoresho bye yari asanzwe akoresha mu kazi.

Yavuze ko hari aho ubushinjacyaha bwivuguruza bukavuga ko bari kuzatera ibisasu ariko bwagera aho bukavuga ko Karangwa yari kuzaturitsa ibisasu, akibaza ukuntu yari guhuza ibisasu byamaze guterwa.

Yavuze ko ubutumwa bugufi ashinjwa bwagaragaye muri telefone ye atari we wabwanditse kuko bigaragara ko itariki bwandikiweho yari afunzwe kandi telefone ye yari ifitwe n’ubugenzacyaha. Yavuze kandi ko yasabye ko ibikoresho bye byafashwe byazanywa mu rukiko bikerekanwa aho kwerekana impapuro gusa, ariko bikaba bitarakozwe.

Ati “Bizanywe nibwo twahabwa ubutabera bwuzuye bushingiye ku bimenyetso aho gushingira ku mafoto.”

Ku isaha ya 12:00 urukiko rwategetse ko urubanza rusubikwa rukazasubukurwa kuri uyu wa Kane tariki ya 15 Ukwakira 8:30.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .