Umunyamakuru Phocas Ndayizera na bagenzi be basubiye mu rukiko: Uko iburanisha ryagenze

Yanditswe na Prudence Kwizera
Kuya 24 Nyakanga 2020 saa 10:11
Yasuwe :
0 0

Urugereko rwihariye rw’Urukiko Rukuru mu Rwanda ruburanisha ibyaha Mpuzamahanga n’ibyambukiranya imipaka, kuri uyu wa Gatanu tariki ya 24 Nyakanga 2020 rwasubukuye urubanza ruregwamo Umunyamakuru Phocas Ndayizera na bagenzi be 12.

Ni iburanisha ryabaye hifashishijwe uburyo bw’iyakure buzwi nka ‘video conference’ kubera icyorezo COVID-19 cyugarije Isi, abaregwa bose bari muri gereza ya Mageragere iri mu Mujyi wa Kigali.

Uko ari 13 bashinjwa ibyaha birimo kugambirira kugirira nabi ubutegetsi buriho cyangwa kubuhirika hakoreshejwe intambara cyangwa izindi mbaraga; kugambana no gushishikariza abandi gukora icyaha cy’iterabwoba; ubwinjiracyaha bwo gukoresha binyuranyije n’amategeko ikintu giturika cyangwa ikindi kintu gihumanya ahantu hakoreshwa na rubanda, n’icyaha cyo kujya mu mutwe w’abagizi ba nabi.

Ubushinjacyaha buvuga ko uyu mugambi abaregwa bateguraga wari ukuriwe na Cassien Ntamuhanga. Uyu araburanishwa nk’uwatorotse ubutabera.

Mu iburanisha riheruka kuri uyu wa Kane ubushinjacyaha bwazanye amajwi (audio) nk’ikimenyetso gishya mu rubanza, buvuga ko yafashwe mu kiganiro Ntamuhanga Cassien yagiranye na Nsengimana Jean Claude alias Tembo kuri telefone bacura imigambi yo gukora ibyaha birimo iterabwoba haturitswa ibisasu.

Hagaragajwe kandi amashusho (video) y’abahanga bo mu kigo cya gisirikare cy’u Rwanda basobanura uburyo ibiturika bivugwa ko byafatanywe abaregwa bishobora kwangiza ahantu biturikirijwe. Abo bahanga bagaragaje ko ibyo biturika byifashishwa n’igisirikare iyo gishaka kurimbura ahantu cyangwa bigakoreshwa mu nganda zicukura amabuye y’agaciro.

Abaregwa barimo Umunyamakuru Phocas Ndayizera na Karangwa Eliaquim bavuze ko ayo amajwi n’amashusho batayemera kuko ntaho bahuriye nayo basaba urukiko kutayaha agaciro nk’ibimenyeso bibashinja.

Ibiranisha ryo kuri uyu wa Gatanu ryatangiye 9:00 urukiko ruvuga ko batinze gutangira kubera ko ikoranabuhanga ryabanje kugorana.

Niyonkuru Emmanuel ni we wahawe ijambo bwa mbere atangira kuvuga ku majwi n’amashusho byerekanywe mu rukiko ejo ku wa Kane.

Yavuze ko amajwi yumviswe n’amashusho yerekanywe ntacyo bimurebaho kuko atavugwamo ndetse n’abumvikana bavugana atabazi nk’uko yabivuze kuva agitabwa muri yombi. Yasobanuye ko yaba Phocas Ndayizera, Karangwa Eliaquim na Nsengimana Jean Claude alias Tembo atabazi bityo atigeze agirana imigambi nabo.

Ku bijyanye n’amafaranga avugwa mu majwi yafashwe yavuze ko ‘nta mafaranga yigeze yohererezwa’.

Niyihoza Patrick ni we wakurikiyeho avuga ko nta byinshi yavuga birenze ibyo yavuze agitangira kwiregura. Yavuze ko amajwi n’amashusho byagaragajwe mu rukiko ejo atabizi kandi atumvikanamo cyangwa ngo agaragaremo.

Urukiko rwamubajije icyo avuga ku butumwa bugufi bwasanzwe muri telefone ye bivugwa ko hari aho bukuriye n’amajwi yumviswe mu rukiko, avuga ko ubwo butumwa bugufi ntabwo azi kuko atigeze abwandika.

Umunyamakuru Phocas Ndayizera na bagenzi be basubiye mu rukiko

Byiringiro Garnon ni we wisobanuye bwa gatatu avuga ko amajwi yumviswe ejo ntacyo amurebaho kuko atigeze avugwamo. Yavuze kandi ko mu mashusho yerekanywe atamureba kuko nta giturika yigeze afatanwa.

Ku mafaranga ibihumbi 25, Ubushinjacyaha buvuga ko yohererejwe na Ntamuhanga Cassien, yavuze ko ntayo yigeze amwoherereza, avuga ko ayo yohererejwe yayahawe n’umuntu witwa Ethienne uko mu kigo Wasac nk’igihembo kuko yakoze akazi ko gucukura imiyoboro y’amazi.

Yavuze ko abumvikana mu majwi bitwa Ntamuhanga Cassien wavuganaga n’uwiswe Nsengimana Jean Claude alias Tembo atabazi kandi atigeze avugana nabo na rimwe.

Ku byo aregwa ko yaba yarakoze ubutasi aneka ahazaterwa ibisasu harimo Gacuriro na Nyabugogo, yabihakanye avuga ko ‘nta butasi yigeze akora’.

Bikorimana Bonheur ni we wakurikiyeho avuga ku majwi (audio) na raporo y’abahanga isobanura imikorere y’ibiturika bivugwa ko byafatanywe abaregwa. Yavuze ko ayo majwi atamureba kuko atavuzwemo kandi atigeze akorana na Ntamuhanga Cassien cyangwa Nsengimana Jean Claude alias Tembo kandi ntaho ahuriye nabo.

Ku byo aregwa birimo gukora ubutasi bw’ahazaterwa ibisasu nabyo yabihakanye avuga ko atigeze abukora.

Bizimana Terence na we yahawe umwanya avuga ko mu majwi yumviswe ejo ntaho ahuriye nayo kuko atavuzwemo kandi aho byumvikanye uwitwa Ntamuhanga Cassien avugana na Nsengimana Jean Claude alias Tembo ko ‘abantu babo bafashwe’ we atabarimo kuko ntaho ahuriye nabo.

Ati “Njyewe ntaho mpuriye nabo kuko nta na nimero zabo nagitaga.”

Ku bijyanye n’ibyo aregwa ko bamwoherereje amafaranga nabyo yabihakanye avuga ko ‘batari kuyamwoherereza kandi nta nimero zabo afite’.

Ku bijyanye n’ibiturika bivugwa ko byafatanwe umunyamakuru Phocas Ndayizera, yavuze ko ntabyo azi kandi n’uwo uvugwa atari asanzwe amuzi kuko yamumenye ari uko bafunganywe.

Munyensanga Martin na we yireguye avuga ko ku majwi (audio) yumviswe mu rukiko avuga ko ntaho ahuriye nayo kuko nta zina rye ryumvikanyemo. Yabwiye urukiko ko ibiturika byavuzwe ntaho ahuriye nabyo.

Nshimiyimana Yves ni we wakurikiyeho na we ahakana avuga ko amajwi yumviswe ntaho ahuriye nayo kuko atavuzwemo, akaba asanga byabazwa Ntamuhanga Cassien na Nsengimana babiganiriye.

Ku biturika byasesenguwe muri video (amashusho) yavuze ko byabazwa abo byafatanywe kuko we ntabyo yigeze afatanwa kandi nta mugambi yigeze acura wo kubitera. Ibyo aregwa byo gutega ibisasu ku Giti cy’Inyoni mu igaraje no ku ruganda rwa Nzove nabyo yabihakanye avuga ko nta byabayeho ndetse atigeze anabigambirira.

Nshimyumurenye Jean Claude yireguye na we avuga ko atigeze yumvikana mu majwi yagaragajwe mu rukiko ndetse n’abumviswe bavugana ari bo Ntamuhanga Cassien na Nsengimana Jean Claude alias Tembo atabazi kandi ntaho ahuriye nabo ndetse na Phocas Ndayizera atari asanzwe amuzi kuko yamumenyeye mu rukiko.

Rutaganda Bosco yiregura na we yavuze ko amajwi (audio) atamureba kuko atavuzwemo, bityo rero akaba ntaho ahuriye nayo. Ku bijyanye no gushishikarizwa kujya mu mutwe wa RNC yabihakanye avuga ko bitigeze bibaho.

Ku bijyanye n’ibiturika byasesenguwe yavuze ko atabizi kandi we yari asanzwe ari umunyeshuri ndetse n’ibyo yiga ntaho bihuriye n’ibiturika.

Nshiragahinda Erneste na we yireguye avuga ko amajwi yumviswe ku munsi w’ejo ntaho ahuriye nayo kuko nta zina rye ririmo. Yavuze ko kuva urubanza rwatangira yavuze ko ‘yemerewe akazi na Niyihoza Patrick’ kandi atigeze amubwira ko ashaka kumujyana mu bikorwa by’iterabwoba.

Yabwiye urukiko ko Niyihoza atigeze amubwira iby’ibisasu ahubwo yamubwiye ko akazi agiye guhabwa ari ako kubaka.

Ku bijyanye no kuba yarafashwe agiye i Nyagatare bikavugwa ko yari ahunze, yavuze ko yari agiye kureba umuntu umuha akazi. Urukiko rwamubajije impamvu yagiye kureba umuntu umuha akazi kandi atamuzi, asubiza ko ‘umuntu adahabwa akazi n’abantu azi gusa’.

Ukurikiyimfura Théoneste ni we wireguye bwa nyuma. Yahereye ku majwi (audio) avuga ko nta zina rye ryigeze rivugwa muri ayo majwi bityo bitamureba.

Yavuze ko nta bufatanye yigeze agirana na Ntamuhanga Cassien cyangwa Nsengimana Jean Claude alias Tembo.

Ku biturika byasesenguwe yavuze ko ntaho ahuriye nabyo, bityo byabazwa abo byafatwanywe.

Ubushinjacyaha bwahawe umwanya

Abahagarariye ubushinjacyaha batangiye bavuga ku myiregurire y’abaregwa muri rusange bavuga ko ikubiye mu ngingo ebyiri. Bavuze ko abaregwa bose bahuriye ku bintu bitanu.

Icya mbere ni ‘ihinduramvugo’ kuko ngo bose ibyo bavugiye mu bugenzacyaha no mu bushinjacyaha ndetse no mu kuburana ku ifungwa n’ifungurwa ry’agateganyo bageze mu rukiko barabihakana.

Ubushinjacyaha bwavuze ko kuba abaregwa barageze mu rukiko bagahindura imvugo bidakwiye gutesha agaciro ibyo bari baremereye ubugenzacyaha n’ubushinjacyaha.

Kuba abaregwa bagaragaza ko ibyo bemereye mu bugenzacyaha byatewe n’iyicarubozo bakorewe ndetse bagaterwa n’ubwoba, ubushinjacyaha bwavuze ko bakwiye kubitangira ibimenyetso.

Icya kabiri ni uko abaregwa bose biyemerera ko ‘basinye ku nyandiko mvugo zabo’ z’ibyo bemereye mu bugenzacyaha no mu bushinjacyaha. Ibyo rero ngo bishimangira ko ibyo bemereye ubugenzacyaha, ubushinjacyaha no mu kuburana ku ifungwa n’ifungurwa ry’agateganyo bikwiye guhabwa agaciro n’urukiko.

Icya gatatu ni uko ‘ibyo bavuga ubwabo bifitanye isano’. Ubushinjacyaha bwavuze ko ubwo abaregwa babazwaga mu bugenzacyaha n’ubushinjacyaha buri wese yabajijwe ukwe ariko bagasanga ibyo bavuga bifitanye isano.

Basobanuye ko buri umwe ibyo yagiye avuga birimo gusabwa irangamuntu, kujya mu nama zicura imigambi, ibikorwa buri wese yashinzwe muri izo nama, uko bahawe amazina y’amahimbano kugira ngo bazayitwe mu gisirikare, icyo buri wese yashinzwe gukora mu gukora ibyaha, aho ibisasu byavuye n’uko byari guhererekanwa; kuri buri wese bifitanye isano.

Ati “Uwasesengura imvugo zabo yasanga zuzuzanya, ibyo bigaragaza ubudakemwa bw’izo nyandiko mvugo.”

Icya kane ni uko ‘bemera ko babajijwe n’umushinjacyaha uri mu iburanisha mu rukiko’ bityo ko ibyo bavuze ko babazwaga n’abashinzwe umutekano bakabatera ubwoba atari byo.

Icya gatanu ni uko basubiza ikibazo ku kindi bifite injyana ku buryo bigaragara ko hari isano bafitanye mu gukora ibyaha.

Guhakana ko bataziranye na Ntamuhanga Cassien

Ubushinjacyaha bwavuze ko kuba abaregwa bose bahuriza ku guhakana ko bataziranye na Ntamuhanga Cassien bitahabwa agaciro kuko ngo ‘gucura umugambi wo gukora icyaha ari ubwumvikane bw’abantu babiri cyangwa benshi kabone n’iyo icyaha cyakorwa n’umwe muri bo’.

Bwashimangiye ko bushingiye ku itegeko rihana ‘icyaha cyo gucura umugambi’ bidasaba ko abaregwa bose bahanwa ari uko bicaye hamwe bagacura umugambi.

Ubushinjacyaha bwavuze ko urukiko rusanze Ntamuhanga Cassien yaracuze imigambi hagati ye na Ndayizera Phocas, icyaha kitabahama bonyine ngo hasigare abandi baregwa.

Ati “Ibyo ntibitesha agaciro abatari muri uwo mugambi kandi nabo baracuze undi mugambi wo gukora ibyaha nkabyo.”

Ubushinjacyaha bwavuze ko n’ubwo hagiye habaho ubwumvikane butandukanye, umugambi abaregwa bose bari bafite ari umwe wo gukora icyaha cyo kugirira nabi ubutegetsi batega ibisasu ahantu hatandukanye hagamijwe gusenya ibikorwa remezo no kwica abantu.

Icyaha cyo gucura umugambi

Ubushinjacyaha bwabwiye urukiko ko bushingiye ku nyandiko mvugo abaregwa bashyizebo umukono, bigaragara ko hari umugambi bagize mu matsinda atandukanye wo gukora ibya.

Bwasobanuye ko icyaha cyo gucura umugambi wo gukora icyaha gihanirwa kabone niyo icyo cyaha cyaba kitarashyizwe mu bikorwa.

Urukiko rwabajije ubushinjacyaha icyo bushingiraho buvuga ko abaregwa bari bafite umugambi mubisha, busubiza ko ‘ari uko bari bazi neza ko ibiturika ari ibintu bishobora kurimbura bikica abantu kandi babyiyemereye mu nyandiko mvugo basinyiye mu bugenzacyaha n’ubushinjacyaha ubwo babazwaga ndetse bongera no kubyemerera urukiko mu kuburana ku ifungwa n’ifungurwa ry’agateganyo’.

Gukemanga ibyasesenguwe n’abahanga

Ubushinjacyaha bwavuze ko kuba abaregwa ndetse n’ababunganira mu mategeko bavuga ko ibyasesenguwe n’abahanga mu mashusho bagaragaza ubukana bw’ibiturika, bakemanga ubuhanga bwabo, atari byo kuko abo bahanga bizewe.

Bwavuze ko abo bahanga ari abo mu Gisirikare cy’u Rwanda, RDF, kandi kizwiho ubuhanga n’ubushobozi. Bwavuze ko ibyo bikoresho byasesenguwe n’abahanga ari ibyafatanwe bamwe mu baregwa kandi abahanga babisesenguye basanga byari ibyo gukoresha umugambi mubisha wo gukora ibyaha.

Ubushinjacyaha bwavuze ko amashusho yerekanwe ari kimwe mu kimenyetso cyafatanwa n’ibindi, urukiko rukabifataho umwanzuro.

Guhakana amajwi (audio)

Ubushinjacyaha bwavuze ko n’ubwo abaregwa bahakana ko ntaho bahuriye n’amajwi (audio) yumviswe mu rukiko, rukwiye kuyaha agaciro kuko afitanye isano n’ibyo abaregwa bemereye ubugenzacyaha n’ubushinjacyaha ndetse bongera no kubyemerera urukiko mu ifungwa n’ifungurwa ry’agateganyo. Ibyo ngo baranabisinyiye.

Bwibukije urukiko ko muri audio ya kane, hatavugwamo izina ‘Kazire’ gusa ahubwo abaganira (Ntamuhanga na Nsengimana) berura bakavuga ‘Ndayizera Phocas Umunyamakuru wa BBC’.

Bwasobanuye kandi ko muri audio hari ahumvikana Ntamuhanga na Nsengimana bemeranya ko bagiye kugaragaza ko hari ‘abantu babo 10’ bafashwe ariko uwitwa Kazire we batazamuvuga ahubwo bazareka BBC ikabyivugira.

Icyo ngo gikwiye gufatwa nk’ikimenyetso simusiga mu rubanza kuko ubushinjacyaha busanga nta nenge gifite.

Ku bivugwa ko amajwi yumvikana nk’aho yafatiwe muri studio, ubushinjacyaha bwasobanuye ko abavuganye kuri telefone (Ntamuhanga na Nsengimana) bashoboraga kubikorera aho bashaka bitewe n’uko bashaka guhisha umugambi wabo.

Bwasobanuye ko Ntamuhanga yashoboraga kuvugira kuri telefone ari aho ashaka kuko atari mu Rwanda ariko Nsengimana akaba yajya kuvugira kuri telefone akabanza kwihisha mu cyumba cyangwa ahandi hantu kugira ngo hatagira umwumva kuko yari mu Rwanda.

Ku isaha ya 11:50 urukiko rwasoje iburanisha rwanzura ko rizasubukurwa tariki ya 7 n’iya 8 Nzeri 2020.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .