Umujyi wa Rwamagana wemeje igishushanyo mbonera cyitezweho guhindura isura yawo

Yanditswe na Hakizimana Jean Paul
Kuya 18 Nzeri 2018 saa 12:17
Yasuwe :
0 0

Akarere ka Rwamagana gafite igice cy’umujyi ufatwa nk’ukomeye mu Ntara y’Iburasirazuba, kashyize ahagaragara igishushanyo mbonera kivuguruye kizagenderwaho mu gukoresha neza ubutaka mu myaka 30 iri imbere.

Iki gishushanyo mbonera cyemejwe mu nama rusange y’akarere yabaye kuwa 6 Nzeri, cyari gitegerejwe cyane n’abaturage by’umwihariko abikorera.

Bavuga ko kuba cyari kitaravugururwa byatumaga batubaka inyubako zigezweho cyangwa ngo Umujyi wa Rwamagana ushyirwemo ibikorwa remezo bigezweho.

Ngendahimana Jean Bosco, wo mu Murenge wa Kigabiro, yabwiye IGIHE ko kuba nta gishushanyo mbonera cyari gihari byatumye atubaka inzu ngo ave mu bukode.

Ati “Hari ahantu mfite ikibanza nagiye ku murenge kwaka icyangombwa cyo kubaka ntibakimpa ya mafaranga nari kubakisha ngenda nyaryaho gake gake kugeza ashize, urumva iyo icyo gihe banyemerera ubu mba narubatse naravuye mu bukode.”

Iki gishushanyo mbonera kikaba cyerekana ko ishusho y’Umujyi wa Rwamagana iri kuri hegitari 5 662 mu mirenge ine n’utugari 15. Iyo mirenge ni Kigabiro, Muhazi, Gishari na Mwulire.

Umuyobozi w’Urugaga rw’abikorera mu Karere ka Rwamagana, Munyaneza Célestin, avuga ko kuba iki gishushanyo mbonera kitari gihari byadindizaga byinshi mu bikorwa by’abikorera.

Ati “Ingaruka zo zari nyinshi kuko igishushanyo mbonera kiba cyerekana uko umujyi uteye, kuba kitaraboneka byadindizaga ibikorwa by’abikorera, nk’abashakaga kubaka ntibabone ibyangombwa”.

“Ikindi byatumye umujyi wacu udindira kuko mu gihe cyakorwaga nta nzu zigezweho zazamukaga hari abikorera benshi nzi bashakaga kubaka inzu zigezweho ariko akarere kakababwira ngo ni babe bihanganye igishushanyo mbonera kiboneke.”

Umuyobozi w’Akarere ka Rwamagana Mbonyumuvunyi Radjab, yabwiye IGIHE ko iki gishushanyo mbonera cyerekana buri gikorwa n’aho kigomba gukorerwa.

Avuga ko cyatwaye umwanya munini kuko akarere katumiye abahanga mu bijyanye n’imitunganyirize y’imijyi kugira ngo batange ibitekerezo ku buryo kizasohoke kimeze neza.

Mbonyumuvunyi yongeraho ko icyo biteze kuri iki gishushanyo mbonera ari ugutuza neza abaturage b’Akarere ka Rwamagana.

Ati” Icya mbere twiteze kuri iki gishushanyo mbonera, ni ugutuza neza abaturage bacu kuko mbere byajyaga bizamo ibibazo bikomeye ugasanga hari abubaka ahagenewe guca nk’imihanda n’ibindi ariko ubu birasobanutse ahazaca ya mihanda haragaragara ndetse n’aho abaturage bazatura haragaragara”.

“Icya kabiri, ni ugutuza neza abaturage bacu. Hari abaturage bumva ko kuba hakozwe igishushanyo mbonera kigamije kubirukana ariko sibyo, kuko ahubwo kizerekana uko buri muntu azatura bitewe n’urwego ariho . Ufite amikoro make azabona aho yubaka haciriritse ndetse n’ufite amikoro ari hejuru abone aho yubaka.”

Akarere ka Rwamagana gafite imirenge 14, utugari 82 n’imidugudu 474. Ni Akarere kandi gafite ubuso bungana na Kilometero kare 682 n’abaturage 313,461, bari ku bucukike bwa 460 kuri Kilometero kare imwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza