Umujyi wa Kigali watangiye ubufatanye n’Umujyi wo mu Bushinwa mu kwagura ishoramari

Yanditswe na Uwimana Abraham
Kuya 14 Ugushyingo 2020 saa 10:30
Yasuwe :
0 0

Umujyi wa Kigali wagiranye amasezerano y’ubufatanye n’Umujyi wa Yiwu wo mu Bushinwa, agamije kwagura imikoranire y’imijyi yombi mu byerekeye ubukerarugendo, ubucuruzi, siyansi n’ikoranabuhanga ndetse n’ibindi.

Aya masezerano yasinywe ku wa 13 Ugushyingo 2020, asinyirwa mu Mujyi wa Yiwu uherereye mu Ntara ya Zhejiang mu Bushinwa. Aya masezerano azatuma ibicuruzwa bya Made in Rwanda bigira umwanya mu cyanya cy’ubucuruzi muri uyu mujyi, ndetse bigakururira n’abashoramari bo muri uyu mujyi gushora imari mu Rwanda.

Ishoramari ry’abo muri Yiwu i Kigali rizibanda cyane mu Karere ka Kicukiro ahasanzwe n’ubundi hakorera amasosiyete amwe yo mu Bushinwa nka Zhejiang China Commodities City Group (CCC Group), yatangije ikigo kibanda ku kwagura ikoranabuhanga cya eWTP Yiwu Global Innovation Center Rwanda Digital Trading Hub, giherereye i Masaka.

Aya masezerano yasinyweho na Ambasaderi w’u Rwanda mu Bushinwa, Kimonyo James, wari uhagarariye u Rwanda, naho ku ruhande rw’u Bushinwa, yasinyweho na Visi Meya w’Umujyi wa Yiwu, Zhang Chao.

Yiwu ni umujyi uherereye mu Ntara ya Zheijiang, mu Burasirazuba bw’u Bushinwa, ukaba uzwiho kugira isoko rinini cyane rigize igice kinini cy’umujyi, rizwi nka paradizo mu guhahirwamo ibicuruzwa bito.

Ambasaderi Kimonyo yavuze ko isinywa ry’aya masezerano ari indi ntsinzi mu kwagura umubano mwiza hagati y’u Rwanda n’u Bushinwa.

Visi Meya wa Yiwu Zhang Chao yavuze ko bizera ko aya masezerano azaba nk’ikiraro gihuza u Rwanda n’u Bushinwa, bigafasha gukomeza ubufatanye mu by’ubucuruzi ndetse no mu zindi nzego.

Kugeza ubu kandi Urugaga Nyarwanda rw’Abikorera (PSF), ndetse n’abakora ubucuruzi mu mujyi wa Zhejiang nabo baherutse gusinya amasezerano yo gukuza ubukungu, ndetse n’ubufatanye mu by’ubucuruzi no guhahirana hagati y’u Rwanda n’Intara ya Zhejiang.

Ambasaderi Kimonyo asinyana na Visi Meya wa Yiwu Zhang Chao aya masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .