Umujyi wa Kigali urateganya kwifashisha ubwikorezi bw’utumodoka tunyura mu kirere

Yanditswe na Evariste Nsengimana
Kuya 7 Gashyantare 2020 saa 08:46
Yasuwe :
0 0

Ubuyobozi bw’Umujyi wa Kigali bwatangaje ko buri mu biganiro n’abashoramari b’abanyamahanga bashaka gutangiza umushinga wo kubaka imihanda y’utumodoka tunyura mu kirere tuzwi nka Cable Car, dushobora kuzajya twifashishwa cyane cyane n’abakerarugendo.

Umuyobozi wungirije w’Umujyi wa Kigali ushinzwe Imiturire n’Ibikorwaremezo, Dr Nsabimana Ernest, aheruka kubwira IGIHE ko uyu mushinga umaze igihe uganirwaho n’abashoramari.

Yagize ati “Umushinga wa Cable car urahari, hari abashoramari bashaka kuwuzana, tumaze kuganira nabo inshuro nyinshi ngira ngo bageze mu cyiciro cyo kuwutegura [design], ibyo byose bikajyana n’amafaranga ariko wo urahari.”

Uretse uyu mushinga w’imodoka zigendera ku migozi, Umujyi wa Kigali ugaragaza ko hari n’undi witwa Personal Rapid Transit na wo w’utumodoka tugendera ku mihanda y’ibyuma yubatse mu kirere.

Ati “Hari n’undi w’utumodoka dutwara nk’abantu batandatu cyangwa barindwi bashaka kuzana, natwo tuba dufite imihanda ica mu kirere ariko itaremereye cyane, ikoresha ibyuma. Iyo nayo ni imishinga ishaka kuza mu Mujyi wa Kigali.”

“Iyo mishinga yombi Umujyi wa Kigali ukomeje kuyiganiraho n’abashoramari batandukanye. Ni imishinga ikiri mu biganiro by’imbanzirizamushinga.”

Avuga ko nubwo iyi mishinga ishobora kuzagerwaho aho iterambere rigana usanga hakenewe cyane ubwikorezi butwara abantu benshi naho izo zitwara abantu bake usanga zidasubiza ikibazo cy’umubyigano w’ibinyabiziga mu mijyi ukunze kuhaboneka.

Ati “Nazo zirafasha ariko buriya muri rusange iyo upanga ubwikorezi bwo mu mujyi wibanda ku bantu benshi bagenda muri za bisi cyangwa muri za gari ya moshi kuko niho baba ari benshi muri rusange.”

Aba bashoramari babanje kwerekana uko uzakora, akamaro uzagirira Abanyakigali n’ibindi. Ubwo ikiba gisigaye ni uguhitamo aho ushobora gushyirirwa mu bikorwa.

Ati “Nk’izo Cable car zishobora no gukorwa mu buryo bw’ubukerarugendo wenda ukaba wakwambukiranya umusozi wa Kigali ukajya n’ahandi. Nibura abantu wenda mu mpera z’icyumweru cyangwa abasura Kigali babikoresha aho kugira ngo twinjire mu buryo bw’ubwikorezi bwo mu mujyi tukaba twabanza kujya mu bukerarugendo.”

Umujyi wa Kigali usobanura ko umushinga wa Cable car uwufatanyije n’abashoramari bo mu Bwongereza, mu Bufaransa ndetse watangiye kuganirwaho mu 2018.

U Rwanda rusanganywe umushinga nk’uyu uzatwara miliyoni $38 wateganyirijwe umusozi wa kane muremure muri Afurika, Karisimbi, ukazakoreshwa cyane mu bijyanye n’ubukerarugendo.

Mu bihugu nka Singapore iri koranabuhanga rirakoreshwa mu bwikorezi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .