Umuhungu wa Burugumesitiri Gatete yavuze uko yabohotse, ufitanye isano na Mudacumura yicuza gukorana na FDLR

Yanditswe na Twarabanye Venuste
Kuya 31 Gicurasi 2020 saa 01:53
Yasuwe :
0 0

Iyakare Jean Luc, umuhungu wa Gatete Jean Baptiste wari Burugumesitiri wa Komini Murambi mu yari Perefegitura ya Byumba, yasobanuye uko yabohotse agakira ipfunwe yaterwaga n’amateka ya se naho Hakizimana Bahati Jean Bosco, Sylvestre Mudacumura abereye se wabo avuga ko yicuza igihe yamaze mu mashyamba arwanya igihugu.

Jenoside yakorewe Abatutsi mu 1994 yabaye Iyakare Jean Luc afite umwaka umwe. Ntabwo azi se Gatete Jean Baptiste, uretse kumwumva mu mateka nkuko abandi batari bamuzi n’abakiri bato bayumva ku ruhare rukomeye mu iyicwa ry’ibihumbi by’Abatutsi.

Hakizimana Bahati Jean Bosco we Jenoside yabaye afite imyaka umunani, ajyanwa n’umuryango we mu mashyamba ya RDC. Amakuru avuga ko Mudacumura wari umwe mu bakomeye muri FDLR wishwe mu mwaka ushize, ari se wabo.

Aba bombi bagarutse ku buhamya bwabo mu kiganiro, Dusangire Ijambo cya Televiziyo y’u Rwanda cyagarutse ku ruhare rw’Urubyiruko mu gihe hibukwa ku nshuro ya 26 Jenoside Abatutsi.

Ni ikiganiro cyitabiriwe n’urubyiruko rwavutse mbere ya Jenoside, mu gihe cyayo na nyuma yayo, rurimo urwayirokotse n’urukomoka ku bayikoze.

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yibukije ko buri muntu by’umwihariko urubyiruko, akwiye kuzirikana imbaraga igihugu cyatakaje kubera Jenoside yakorewe Abatutsi.

Yavuze ko hari urubyiruko rwishwe rwari rufitiye igihugu imishinga myiza yo kucyubaka, hakaba n’urwakoze Jenoside narwo urutarahanwe rwarorongotanye rugata igihugu. Izo zose ni imbaraga zakabaye ziri kubaka igihugu ariko zidahari kubera Jenoside yakorewe Abatutsi.

Hakizimana utarakoresheje imbaraga ze mu kubaka igihugu hakiri kare mu buhamya bwe yavuze ko yabaga muri FDLR aho yarezwe kandi akabana n’abasize bakoje Jenoside kandi aho bari batemera ko bayikoze.

Jenoside yabaye afite imyaka umunani umuryango we urimo se wabo Mudacumura Sylvestre wayoboraga FDLR uramuhungana umujyana mu mashyamba ya RDC. Mu mikurire ye yumvishwaga ko bari kwisuganya kugira ngo bazagaruke gukuraho Umututsi, bafate igihugu.

Hakizimana yamaze imyaka igera kuri 18 muri ayo mashyamba mbere yo gufata icyemezo cyo gutaha mu rwamubyaye. Muri icyo gihe cyose yakoreshwaga ahanini mu kwiba no gusahura.

Yavuze ko mu byo yicuza ngo ni icyo gihe yamaze akoresha imbaraga ze mu kwiba ibitunga abasize bakoze Jenoside.

Ati “Niba igihugu kigeze kuri ibi cyarahereye kuri zero, ndacyicuza igihe kinini natakaje niruka inyuma y’ikinyoma kidafite 12. Izo mbaraga iyaba narazikoresheje nubaka igihugu.”

Yavuze ko abifashijwemo n’ibyo yagendaga abona birimo kuba abavugaga ko bari kwisuganya nabo ubwabo badahuje akumva ibiganiro nka ‘Isange mu banyu’ na ‘Museke weya’ yaje kwitandukanya na FDLR.

Ageze mu Rwanda yahawe ibyangombwa by’ibanze birimo n’ubwisungane mu kwivuza, biramutangaza nyuma yitabira Itorero Urunana rw’Urungano asobanukirwa igihugu cyamubyaye, arakora yiteza imbere, ubu ni umucuruzi.

Itorero Urunana rw’urungano rihuza urubyiruko rw’ingeri zitandukanye rutarengeje imyaka 30 rurimo urutaragize amahirwe yo kumenya amateka y’igihugu. Niryo mugenzi we Iyakare Jean Luc yanyuzemo.

Iyakare Jean Luc yavuze ko yakuranye ipfunwe ry’amateka yumva kuri se Gatete Jean Baptiste ku buryo yumvaga aba mu Isi ya wenyine.

Ati “Jenoside yabaye mfite umwaka umwe kugeza ubu nta n’ubwo muzi, nkurikirana ibiganiro ni uko nguko muzi mu mateka.”

Gatete yayoboye Komini Murambi kuva mu 1981 kugera 1993. Yahamijwe uruhare mu gushishikariza abantu kwica ndetse yari inyuma y’urupfu rw’Abatutsi amagana bari bahungiye i Rwankuba, kuri Paruwasi ya Kiziguro n’iya Mukarange.

Uyu mugabo yakatiwe gufungwa burundu ku wa 29 Werurwe 2011, ariko igihano kiza kugabanywa kigezwa ku myaka 40.

Iyakare avuga ko ubuzima yarimo yabukijijwe na gahunda za leta zo kudahabwa akato kubera amateka ya se, nubwo we yakihaga. Mu buhamya bwe yavuze ko yabohokeye mu Itorero Urunana rw’Urungano.

Ati “Iri torero ikintu nungukiyemo ni nk’aho ariho nabohokeye, kuko twahuriyemo turi abana bafite ibikomere. Jye numvaga mba nko mu Isi yanjye kubera ukuntu niyumvaga ariko ndi mu itorero niho nabonye abandi bana b’urubyiruko bangana nanjye bafite amateka atandukanye n’ayanjye ariko yose ahuriza ku kintu kimwe-ibikomere byatewe na Jenoside tugenda tubwirana nanjye ndatura ndavuga ibyanjye numva ndaruhutse.”

Bamporiki Edouard yavuze ko uwo ari umusaruro wa gahunda ya leta yo kwimakaza ubumwe n’ubwiyunge.

Ati “Ni ikintu cyo kwishimira ariko ni amahitamo y’igihugu cyavuze ngo dufite ubumwe uzakura wese azakurira mu bumwe.”

Uwituze Ange wavutse nyuma ya Jenoside [akaba n’umunyamuryango wa AERG] na Josephine Nice Mukundiyicyo [umwe mu rubyiruko ruri mu mahanga] bemeza ko igikomeye urubyiruko rukwiye kwitaho ari ukumenya amateka y’igihugu.

Gusa rugafata afite Isoko mu nzego zemewe z’igihugu no gukurikira ibiganiro, ku isonga hakarebwa ibiri muri gahunda za Komisiyo y’Igihugu yo kurwanya Jenoside.

Bamporiki Edouard yasabye urubyiruko kujyana n’icyerekezo cy’ubuyobozi bw’igihugu ntibasigare inyuma ariko aho batumva bakabaza.

Iyakare Jean Luc (iburyo) ubyarwa na Gatete wahamijwe ibyaba bya Jenoside yavuze uko yabohowe n'Itorero, Hakizimana Bahati Jean Bosco ufitanye isano na Mudacumura Sylvestre wahoze ayobora FDLR yicuza igihe yamaze akorana n'uyu mutwe w'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .