Umuhigo w’uko 60% by’abarangije icyiciro rusange bakomereza mu myuga ugeze he?

Yanditswe na Prudence Kwizera
Kuya 23 Nzeri 2018 saa 09:01
Yasuwe :
0 0

Leta y’u Rwanda yihaye umuhigo ko abanyeshuri barangije kwiga icyiciro rusange bazajya bakomereza mu mashuri y’imyuga ku kigero cya 60% mu rwego rwo kubatoza kwikorera no kwihangira imirimo hagamijwe gukoma mu nkokora ubushomeri.

Inzego zishinzwe uburezi zivuga ko uyu muhigo bizagera muri 2024 waragezweho ndetse n’ikigero cy’ubushomeri cyaragabanutse ku buryo bufatika mu Rwanda.

Kuri ubu hirya no hino mu gihugu hari amashuri agera kuri 402 yigisha imyuga kandi abayigamo bavuga ko hari byinshi bamaze kumenya ku buryo nibagera hanze batazashoma.

Umuyobozi w’Ikigo cy’Igihugu gishinzwe guteza imbere ubumenyingiro (WDA), Gasana Jérôme, avuga ko uwo muhigo bageze kure bawushyira mu bikorwa kuko kuri ubu bari hafi kuri 52%.

Ati “Twamaze kubyumvikana ku rwego rwa Minisiteri ko abanyeshuri barangije imyaka icyenda y’ibanze, byibuze 60% kugeza muri 2024 bakagombye kuba bagana amashuri y’ubumenyingiro. Ubu rero tumaze kugera hafi kuri 52%. “

Gasana akomeza avuga ko bari gukora ibishoboka byose birimo gukundisha abana kwiga ubumenyingiro no gushaka ibikenerwa kugira ngo umuhigo bihaye uzagerweho.

Ati “Gahunda ya mbere ni iyo kongera umubare w’amashuri n’ubwiza bw’ibyo twigisha. Umwaka utaha dufite gahunda yo kubaka andi mashuri mashya agera kuri 14”.

Akomeza avuga ko batangiye na gahunda yo kwigishiriza mu nganda aho WDA yumvikana na n’uruganda umunyeshuri akajya kwigiramo yo ikamukurikirana kugeza igihe arangirije.

Kuri ibyo hiyongeraho gahunda yo gukangurira abakobwa kwiga imyuga kuko kugeza ubu bakiri bake.

Mu rwego rwo guteza imbere imyuga n’ubumenyingiro ndetse no kurwanya ubushomeri hashyizweho na gahunda yo guha imyamyabushobozi abantu bafite impano n’abakoze ibyiciro bitandukanye batiriwe basubira mu ishuri.

Gasana ati “Twatangiriye mu cyiciro cy’ubwubatsi hari abagera hafi ku bihumbi 11 twamaze guha ibyangombwa; uyu mwaka tugiye gutangira ibindi byiciro birimo abakora muri za garaje bakanika imodoka n’abatunganya imisatsi hamwe n’abakora ibijyanye n’ubwiza.”

Ibiri gukorwa byose byiyongeraho no kuvugurura imyigishirize aho mwarimu agomba guha umunyeshuri umwanya munini wo gukora ibyo yiga kandi hagakorwa imyitozo cyane kuruta kwiga mu magambo.

Gasana avuga ko buri mwaka bakora ubushakashatsi bagamije kureba uko kwigisha imyuga n’ubumenyingiro bihagaze ndetse n’umusaruro bitanga. Ubwo baheruka gukora bwaberetse ko abarangiza muri ayo mashuri bishimiwe ku isoko ry’umurimo ku kigero cya 73%.

Bamwe mu banyeshuri biga imyuga n’ubumenyingiro bemeza ko hari byinshi bamaze kumenya bibaha ubushobozi bwo kwihangira imirimo no guhangana ku isoko ry’umurimo.

Dushimimana Janvier wiga ibijyanye n’ubuvuzi bw’amatungo muri EAV Kabutare yagize ati “ubu nzi byinshi bijyanye nabwo nko kubaga itungo nkarivura neza. Ubu musanze turi kubaga igifu cy’ihene kugira ngo turebe ikibazo kirimo imbere. Ningera hanze nzajya mfasha abaturage kubavurira amatungo cyangwa nshinge farumasi y’imiti y’amatungo nkorere amafaranga.”

Muhawenimana Rosine wiga ibijyanye no gukora amatiyo n’ibijyana nabyo muri Kavumu TVT School we yagize ati “Ubu natangiye no gukorera amafaranga kuko iyo ngeze mu biruhuko mbona ibiraka byinshi nkakorera amafaranga. Nizeye ko ninsoza amasomo nzakora nkiteza imbere.”

Muri iyi minsi abanyeshuri bagera ku 23,112 biga imyuga n’ubumenyingiro batangiye ibizamini bisoza amashuri yisumbuye, nabo bagiye kwiyongera ku isoko ry’umurimo.

Usibye amashuri yisumbuye yigisha imyuga, mu Rwanda hari n’andi makuru y’ubumenyingiro yo kuminurizamo azwi nka IPRC. Kugeza ubu hari iya Huye, Kigali, Gishari, Ngoma, Karongi, Musanze na Tumba.

Abanyeshuri bo muri EAV Kabutare biga kuvura amatungo, aha bari kubaga igifu cy'ihene bareba ikibazo ifitemo
Bamwe mu biga gukanika muri Kavumu TVT School mu Karere ka Nyanza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza