Umugaba Mukuru w’Ingabo za Qatar yagiriye uruzinduko mu Rwanda

Yanditswe na Nkurunziza Ferdinand
Kuya 7 Mutarama 2020 saa 08:33
Yasuwe :
0 0

Umugaba Mukuru w’Ingabo za Qatar, Lt Gen Ghanim bin Shaheen al-Ghanim n’itsinda ayoboye bagiriye uruzinduko rw’iminsi ibiri mu Rwanda rwatangiye ku wa 6 kugeza ku wa 7 Mutarama 2020.

Uru ruzinduko rugamije gushimangira umubano usanzwe hagati y’u Rwanda na Qatar no kurebera hamwe uko hakwagurwa umubano mu bijyanye n’ibya gisirikare hagati y’ibihugu byombi.

Lt Gen Ghanim bin Shaheen al-Ghanim yakiriwe n’Umugaba Mukuru w’Ingabo z’u Rwanda, Gen Jean Bosco Kazura, nyuma bagirana ibiganiro ku bufatanye mu bya gisirikare hagati y’ibihugu byombi.

Kuri uyu wa Kabiri, tariki ya 7 Mutarama 2019, Umugaba Mukuru w’Ingabo za Qatar yakiriwe na Minisitiri w’Ingabo, Maj Gen Albert Murasira, aho bombi baganiriye ku nyungu rusange ibihugu byombi bigirira mu mubano wabyo.

Lt Gen Ghanim bin Shaheen al-Ghanim yagize ati “Tuzakomeza ubufatanye hagamijwe kureba ko ingabo z’ibihugu byombi bigira ahazaza heza. Hari byinshi dushobora gufatanyamo, twabiganiriye kandi tuzabibonamo umusaruro mu minsi iri imbere. Hazashyirwaho amatsinda yihariye maze azakorane ku buryo bizashyirwa mu bikorwa mu gihe cya vuba.”

Umugaba Mukuru w’Ingabo za Qatar aherekejwe n’Umugaba Mukuru w’Ingabo z’u Rwanda kandi yunamiye abazize Jenoside yakorewe Abatutsi ku Rwibutso rwa Jenoside rwa Kigali ruri ku Gisozi ndetse banasura Ingoro y’Amateka y’Urugamba rwo kubohora igihugu iherereye ku Kimuhurura.

Umubano wa Qatar n’u Rwanda ntushingiye gusa ku mibanire mu bya gisirikare kuko mu bihe bitandukanye ibihugu byombi byagiye bisinya amasezerano y’ubufatanye mu ngeri nyinshi.

Abakuru b’ibihugu byombi bagaragaza ubushake bukomeye bwo kwimakaza umubano hagati yabyo mu buryo burambye.

Mu myaka ibiri ishize, Perezida Paul Kagame yagiriye uruzinduko i Doha inshuro ebyiri ndetse Umuyobozi w’Ikirenga wa Qatar Sheikh Tamim Bin Hamad Al Thani na we yasuye u Rwanda inshuro ebyiri mu mwaka wa 2019.

Abayobozi b’ibihugu by’u Rwanda na Qatar mu ruhame berura ko imibanire yabo yarenze ubucuti busanzwe igera ku ntera y’ubuvandimwe.

Babishimangiriye mu birori byo gutanga ibihembo ku ndashyikirwa mu kurwanya ruswa ku Isi byiswe Anti-Corruption Excellence Award (ACE Award) byabereye muri Kigali Convention Centre ku wa 9 Ukuboza 2019.

Ibi bihembo byatangijwe n’Umuyobozi w’Ikirenga wa Qatar, Sheikh Tamim Bin Hamad Al Thani.

Perezida Kagame yashimye icyerekezo cya Sheikh Tamim bin Hamad Al- Thani witiriwe “Sheikh Tamim bin Hamad Al- Thani International Anti-Corruption Excellence Award” cyo gushyiraho ibihembo by’ingenzi afatanyije n’Umuryango w’Abibumbye.

Yagize ati “Nyiricyubahiro, nshuti yanjye, muvandimwe, navuga murumuna wanjye. Nigishijwe ko mu buyobozi, abayobozi bajya imbere y’abandi. Nta muyobozi muto, nta muyobozi mukuru ndetse nta gisobanuro cyo kuyobora nabi.’’

Ku wa 26 Gicurasi 2015, u Rwanda na Qatar byasinye amasezerano y’ubufatanye mu birebana no kurwanya ibiyobyabwenge. Yahujwe n’inama yigaga ku bibazo biterwa n’ikwirakwizwa ry’ibiyobyabwenge (Qatar International Anti-Drug Forum) yabereye i Doha.

Muri Gicurasi 2017 u Rwanda na Qatar byashyize umukono ku masezerano yo gushyiraho imikoranire mu bya dipolomasi. Indege za Qatar Airways kandi zikora ingendo zihuza Doha na Kigali n’ibindi byerekezo birimo na Dubai.

Umugaba Mukuru w Ingabo za Qatar, Lt Gen Ghanim bin Shaheen al Ghanim aganira n’Umugaba Mukuru w’Ingabo z’u Rwanda, Gen Jean Bosco Kazura (ibumoso) na Minisiti w'Ingabo, Maj Gen Albert Murasira
Lt Gen Ghanim bin Shaheen al Ghanim n'itsinda ayoboye baganiriye n'abayobozi bakuru muri RDF
Lt Gen Ghanim bin Shaheen al Ghanim n’Umugaba Mukuru w’Ingabo z’u Rwanda, Gen Jean Bosco Kazura bunamiye abazize Jenoside baruhukiye mu Rwibutso rwa Kigali ruri ku Gisozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza