Umubyeyi wahohotewe n’inzego z’umutekano za Uganda agiye kwitabaza inkiko

Yanditswe na Musangwa Arthur
Kuya 29 Kanama 2020 saa 09:35
Yasuwe :
0 0

Umunyarwanda Drocelle Nyirarudodo, uheruka gukorerwa iyicarubozo n’inzego z’umutekano za Uganda, agiye kujyana icyo gihugu mu nkiko, asaba ko abamuhohoteye bikamuvirmao ubumuga babiryozwa.

Mu Ukuboza umwaka ushize Nyirarudodo yatemwe mu gahanga ndetse akorerwa iyicarubozo hamwe n’umukobwa we, ubu ateganya kwitabaza Urukiko rw’Umuryango wa Afurika y’Iburasirazuba, EACJ.

Nyirarudodo w’imyaka 40 n’umukobwa we Emerence Uwimana w’imyaka 14, bahohotewe bikomeye bashinjwa “ko bari muri Uganda mu buryo butemewe n’amategeko”. Bari mu nzira bataha, bavuye gusura bene wabo mu Karere ka Kisoro.

Nyirarudodo yarakubiswe, atemwa mu mutwe n’ahandi ku mibiri, n’umukobwa we ahohoterwa bikomeye, bagezwa ku mupaka babaye intere.

Ibyo bikorwa bya kinyamaswa byasize Nyirarudodo amerewe nabi, atabasha kubona neza, agira isereri idashira ku buryo yakuyemo ubumuga, ari nayo mpamvu agiye kwitabaza urukiko.

Yakomeje kugira uburibwe budashira, ariko ubuyobozi bw’u Rwanda buza kumwitaho, nk’uko ikinyamakuru Virunga Post cyabitangaje. Bwakoze ibishoboka buramuvuza hamwe n’umukobwa we. Nyirarudodo avuga ko iyo guverinoma itamugoboka ngo imuvuze, “ntabwo nzi nzi icyo mba narakoze.”

Kugeza ubu ibikomere byo ku mubiri byarakize, byose abikorerwa ku buntu. Uyu mubyeyi aracyafite ibikomere mu bitekerezo. Yagize ati “Ntabwo nshobora gutekereza kuri Uganda ngo sinumve merewe nabi.”

Nubwo inyuma yakize kandi, avuga ko atakibasha kugira imbaduko nk’uko yahoze ari umugore w’umukozi, kubera ubumuga yatewe n’ibyo yakorewe.

Ati “Ntabwo nshobora gupfa kuguma mu rugo nta muntu turi kumwe, ku buryo abagize ziriya nzego z’umutekano muri Kisoro bakwiye kubibazwa.”

Nyirarudodo yiyongereye ku bandi banyarwanda bahohotewe na Uganda, basaba ubutabera kubera ubumuga bakuye mu maboko y’inzeho z’umutekano z’icyo gihugu.

Ikirego cye cyiyongera ku cy’abandi banyarwanda icyenda bareze Guverinoma ya Uganda muri EACJ, kubera uburyo bafunzwe binyuranyije n’amategeko, bakorerwa iyicarubozo n’irindi hohoterwa bari mu maboko yinzego z’umutekano za Uganda.

Bamwe mu bakorewe bene ibyo bikorwa bitari ibya kimuntu bahasize ubuzima, ariko abavandimwe babo bakomeje kubasabira ubutabera.

Harimo ikirego cya Felicien Mbonabaheka watemaguwe kugeza apfuye, ndetse ahita ahambwa na Polisi i Kisoro, muri Mutarama uyu mwaka. Ni ibimenyetso by’uburyo Uganda imaze iminsi yimakaje guhohotera abanyarwanda bamwe bakahasiga ubuzima, abandi bakamburwa ibyabo, bagakubitwa bakajugunywa ku mipaka ari intere, bazira gusa ko ari banyarwanda.

Inzego z’umutekano zakunze guhohotera abanyarwanda zibashinja ko ari intasi muri icyo gihugu cyangwa ko bafatanwe imbunda, ibirego ariko bitigeze bigezwa mu rukiko ngo bitangirwe gihamya.

Nyirarudodo yahohotewe bikomeye n'inzego z'umutekano za Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .