00:00:00 IGIHE NETWORK KN KINYARWANDA EN ENGLISH FR FRANCAIS

Umuburo ku ndwara y’ubuganga imaze kwica inka 514 mu Rwanda

Yanditswe na Prudence Kwizera
Kuya 9 Ugushyingo 2022 saa 07:14
Yasuwe :

Ikigo gishinzwe iterambere ry’Ubuhinzi n’Ubworozi mu Rwanda (RAB) cyatangaje ko indwara y’ubuganga yibasiye inka hirya no hino mu gihugu imaze kwica izigera kuri 514 ndetse gisaba aborozi gufuhera inka zabo no kuzikingiza nk’umuti urambye wo kuyikumira.

Kuva iyo ndwara yakwibasira inka muri Werurwe 2022, Ikigo gishinzwe iterambere ry’Ubuhinzi n’Ubworozi mu Rwanda (RAB) ku bufatanye n’izindi nzego bahagurukiye kuyirwanya no gukumira ko ikomeza gukwirakwira.

Umuyobozi w’Ishami ry’Ubworozi n’Ubuvuzi bw’Indwara z’Amatungo muri RAB, Dr Fabrice Ndayisenga, yabwiye IGIHE ko hari inka zimaze gupfa ariko hari n’izayirwaye zikavurwa zigakira.

Yagaragaje ko mu nka 1337 zagaragaye zirwaye ubuganga, izigera kuri 823 zavuwe zirakira naho 514 zirapfa. Iyi ndwara kandi yagize ingaruka ku nka 1254 ziraramburura.

Ati “Kugeza ubu mu nka 1337 zanduye iyi ndwara y’ubuganga, 823 zaravurwa zirakira, 514 zirapfa naho 1254 ziraramburura.”

Dr Ndayisenga yavuze ko kuba hari inka zarwaye indwara y’ubuganga zigakira byatewe n’uko aborozi bakurikije inama bagiriwe.

Gusa avuga ko aborozi bakwiye kwita ku bintu bitatu by’ingenzi kugira ngo inka zabo ziticwa n’indwara y’ubuganga. Icya mbere ni ugufuhera inka (kuyoza bakoresheje umuti) icya kabiri ni ukuyikingiza naho icya gatatu ni ukwihutira kuyivuza igihe yarwaye.

Dr Ndayisenga yavuze ko mu rwego rwo guhashya indwara y’ubuganga, mu gihugu hose hamaze gukingirwa inka 1,192,564.

Yavuze ko izo nka zakingiwe ku kiguzi cya Leta mu rwego rwo gukumira umuvuduko iyo ndwara yari iriho, yibutsa abaturage ko bagomba kujya bazikingiza buri mwaka.

Ati “N’ubwo twakingiye ntabwo tugomba guhagarika ingamba zo kurwanya iyo ndwara, tuzajya dukingira buri mwaka. Muri cya gihe cy’icyorezo Leta yatangaga imiti ariko ubu ngubu umworozi akwiye kuba ayigurira agafuhera kabiri mu cyumweru.”

Yagaragaje ko ingamba zitandukanye zafashwe zirimo gufuhera inka no kuzikingiza zatanze umusaruro kuko zahagaritse umuvuduko w’ikwirakwira ryayo mu gihugu ku kigero cyo hejuru.

Yihanangirijre abarwaza inka bagashaja kuyivuriza kandi hari abavuzi b’amatungo bazivura neza kinyamwuga.

Umworozi wese ubonye inka ifite ibimenyetso birimo kuva amaraso mu mazuru cyangwa kuramburura n’ibindi biranga indwara y’ubuganga arasabwa guhita abimenyesha veterineri umwegereye.

Aborozi bose basabwe gukomeza kororera mu biraro naho abavuzi b’amatungo bose bibutswa kwambara ibikoresho byabugenewe mu gihe bari gukora ku itungo ryaketsweho ubuganga.

Iyo ndwara izwi nka ‘Rift Valley Fever’ ikomeje kwibasira inka z’aborozi ikabateza igihombo kuko zimwe zipfa naho izindi zikaramburura.

Bimwe mu bimenyetso biyiranga harimo kugira umuriro, kutarya, guhitisha amaraso mu bice bigize umubiri nko mu kanwa no mu mazuru. Ni indwara ifata n’andi matungo yuza arimo ihene n’intama kandi ifata n’abantu.

Indi nkuru wasoma: https://mobile.igihe.com/amakuru/u-rwanda/article/ishobora-no-gufata-abantu-ikabahitana-indwara-y-ubuganga-yibasiye-inka-zo-mu

Bimwe mu bimenyetso biranga indwara y'ubuganga harimo kuva amaraso mu mazuru no mu kanwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .