Umubare w’impunzi z’Abarundi zifuza gutaha ukomeje kwiyongera

Yanditswe na Ndahayo Emmanuel
Kuya 19 Mutarama 2021 saa 09:55
Yasuwe :
0 0

Ishami ry’Umuryango w’Abibumbye ryita ku Mpunzi (UNHCR) ritangaza ko umubare w’impunzi z’Abarundi zifuza gusubira mu gihugu cyabo wakomeje kwiyongera mu minsi ishize, aho umaze kugera ku bantu 8 619 bamaze gutaha kuva iyi gahunda yatangira gushyirwa mu bikorwa muri Kanama umwaka ushize.

Mu bamaze gutaha kandi harimo impunzi 723 zatashye mu cyumweru gishize ziturutse mu nkambi ya Mahama, ibarizwamo impunzi zirenga 60 000, nk’uko byatangajwe na Minisiteri Ishinzwe Ibikorwa by’ubutabazi, Minema.

Imibare y’abiyandikishije bategereje gutaha ku bushake nayo ikomeje kwiyongera, aho igeze ku mpunzi 18 000 ivuye ku mpunzi 10 570 bari bamaze kwiyandikisha kugera ku wa 22 Ukuboza umwaka ushize.

Hagati aho, amakuru avuga ko n’ubwo ubushake bw’impunzi bwo gutaha butanga icyizere, hari ikibazo cy’uko ibikorwa byo kubacyura byadindiye mu byumweru bishize, ku mpamvu impunzi zitarabasha kumenya neza.

Umwe mu bakozi ba UNHCR yabwiye Rwanda Today ko ikibazo cyabayeho cyatewe n’ibiruhuko by’iminsi mikuru, byatumye ibikorwa byo gupima ubuzima bw’izo mpunzi, harimo no kubapima Coronavirus ndetse n’indi myiteguro bidindira.

Uyu mukozi yashimangiye ko ibikorwa by’iyandika ry’impunzi zishaka gutaha bitigeze bihagarikwa, ati “kwiyandikisha ntibyahagaritswe ariko nta modoka yari iherutse kugenda mu byumweru bishize n’ubwo umubare w’abiyandikisha bashaka gutaha wakomeje kwiyongera umunsi ku munsi”.

“Icyo nkeka cyabayeho ni ukutamenyesha impunzi [uko ibintu bihagaze] byatumye zitekereza ko hari ibibazo by’ubuyobozi”.

UNHCR yari ifite gahunda yo gucyura impunzi z’Abarundi 8 000 mbere y’uko umwaka ushize urangira, gusa ibi ntibyagezweho kubera ibibazo birimo iby’amikoro ndetse n’ubushobozi bw’u Burundi bwo kwakira uwo mubare munini w’impunzi.

Impunzi z'Abarundi ziba mu Rwanda zikomeje kugaragaza ubushake bwo gutaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .