Ku wa 12 Ukuboza 2018 byari ibyishimo ku banyeshuri bose hamwe 1218 bahawe impamyabumenyi z’ibyiciro bitandukanye na Kaminuza yigenga ya Kigali (ULK).

ULK itanze impamyabumenyi ku nshuro ya kabiri ku barangije mu masomo y’ubumenyingiro n’iya 15 ku barangije icyiciro cya mbere cya Kaminuza (Undergraduate) mu mashami atandukanye; ndetse no ku nshuro ya 5 ku barangije icyiciro cya Kabiri (Masters).

Abanyeshuri 90 bahawe impamyabumenyi mu masomo y’ubumenyingiro, 947 mu cyiciro cya mbere cya Kaminuza mu mashami atandukanye, na 181 mu cyiciro cya kabiri “Masters”.

Umuyobozi Mukuru w’Ikigo Gishinzwe Amashuri Makuru na za Kaminuza (HEC), Dr Emmanuel Muvunyi niwe wari umushyitsi mukuru

Umushyitsi Mukuru muri uyu muhango yari Dr. MUVUNYI Emmanuel, Umuyobozi Mukuru w’Ikigo Gishinzwe Amashuri Makuru na za Kaminuza (HEC), akaba yari ahagarariye Minisitiri w’Uburezi.

Mw’ijambo rye yashimiye uwashinze Kaminuza ya ULK Prof. Dr RWIGAMBA Balinda ku ruhare akomeje kugira mu guteza imbere uburezi bufite ireme mu Rwanda.

Yanashimiye Kaminuza ya ULK ku buryo yagaragaye neza mu isuzuma riherutse ryakozwe na HEC. Yasoje asaba Kaminuza kutirara ahubwo bagakomeza gushyiraho ingamba zituma ireme ry’uburezi rikomeza gutera imbere.

Umuyobozi w’Icyubahiro wa ULK, Prof. KALISA Mbanda yashimiye ULK kuba ihora ku isonga mu masuzuma akorwa n’ibigo bitandukanye

Umuyobozi w’Icyubahiro wa ULK, Prof. KALISA Mbanda wanatangije ku mugaragaro uyu muhango wo gutanga impamyabushobozi yashimiye ULK kuba ihora ku isonga mu masuzuma akorwa n’ibigo bitandukanye, aho ihora ari iya mbere muri Kaminuza zigenga mu Rwanda.

Uwashinze Kaminuza ya ULK Prof. Dr RWIGAMBA Balinda yasabye abarangije amasomo ko indangagaciro n’ubumenyi bahawe byazabafasha kwigirira icyizere no kwihangira imirimo

Uwashinze Kaminuza ya ULK Prof. Dr RWIGAMBA Balinda yashimiye Nyakubahwa Perezida wa Repubulika, Paul KAGAME kuba adahwema guha icyerekezo cyiza urwego rw’uburezi. Yashimiye kandi Minisiteri y’Uburezi ku gushyiraho ingamba ziha icyerekezo kiboneye urwego rw’uburezi. Yanahaye impanuro Abarangije amasomo yabo.

Yagize ati “Tubashimiye kuba mwarahisemo kwiga muri ULK kandi nkuko tudahwema kubibabwira, indangagaciro n’ubumenyi mwahawe bizabafasha kwigirira icyizere no kwihangira imirimo, mugashaka uko mwakwiteza imbere ubwanyu n’igihugu muri rusange”.

Umuyobozi Mukuru wa ULK, Dr. Sekibibi Ezechiel yashimangiye ko aba abanyeshuri bahawe amasomo ajyanye n’igihe

Umuyobozi Mukuru wa ULK, Dr. Sekibibi Ezechiel, yavuze ko abanyeshuri bahawe amasomo ajyanye n’igihe, azabafasha ku isoko ry’umurimo. Yanongeyeho ko ULK yageze kuri byinshi ikaba ifite ubufatanye n’ibindi bigo bitandukanye.

Yagize ati “ Dukorana n’ibindi bigo bitandukanye mu rwego rwo kurushaho guteza uburezi imbere. Aha navuga nk’amasezerano y’ubufatanye hagati ya ULK na za Kaminuza zo mu Muryango w’Ibihugu bikoresha Ururimi rw’Icyongereza (Commonwealth Universities Association) aho ULK yatoranijwe muri gahunda yo gutanga amasomo y’iyakure (Partnership for enhanced blended learning)."

"Abarimu bacu barabihugiriwe kandi amasomo yateguwe kurwego rwo hejuru aho umunyeshuri azajya akurikira amasomo aho yaba ari hose kandi nawe akabigiramo uruhare rwinshi”.

Umuyobozi w’Ishuri Rikuru ry’Ubumenyingiro rya ULK (ULK Polytechnic Institute), Dr. Karambizi Sylvestre yavuze ko 51% by’abarangije uyu mwaka babonye imirimo mbere yo gusoza amasomo

Umuyobozi w’Ishuri Rikuru ry’Ubumenyingiro rya ULK (ULK Polytechnic Institute), Dr. KARAMBIZI Sylvestre yavuze ko amasomo y’ubumenyingiro akenewe cyane ku isoko ry’umurimo cyane ko 51% by’abarangije uyu mwaka babonye imirimo mbere yo gusoza amasomo yabo.

Uretse kuba iza ku isonga muri Kaminuza zigenga mu Rwanda, ULK yanashimiwe kuba abanyeshuri benshi bayigamo ari abanyamahanga, bigaragaza icyizere abayigana bayifitiye. Kandi hagarutsweho cyane uburyo abanyeshuri ba ULK bahora batsinda amarushanwa mu biganiro mpaka.

Nyiransengiyaremye Alice yagaragaje ko biteguye guhangana ku isoko ry'umurimo no kuwihangira

Abanyeshuri basoje amasomo bishimiye intambwe bateye, kandi biteguye kwihangira imirimo cyane ko bigishijwe amasomo abafasha kwihangira imirimo , bakanabona umwanya uhagije wo kwimenyereza umwuga ( internership) aho ULK yababaye hafi cyane nk’uko Nyiransengiyaremye Alice urangije icyiciro cya mbere mu icungamutungo yabibwiye IGIHE.

Kuva ku wa 15 Werurwe 1996 ULK ishinzwe imaze guha impamyabumenyi abanyeshuri basaga ibihumbi 32.

Abarangije mu ishuri rya ULK ry’ubumenyingiro bagera kuri 90

Hakozwe akarasisi kanogeye ijisho

Byari ibyishimo bikomeye ku barangije amasomo

Byari ibirori ku bahawe impamyabumenyi