00:00:00 IGIHE NETWORK KN KINYARWANDA EN ENGLISH FR FRANCAIS

Uko urugendo rw’Umunyabugeni w’Umufaransa rwashibutsemo ’Ubusitani bw’Urwibutso’ ku Kicukiro

Yanditswe na Iradukunda Serge
Kuya 12 September 2022 saa 07:42
Yasuwe :

Ku Cyumweru tariki 11 Nzeri 2022, i Nyanza mu Karere ka Kicukiro hatashywe ku mugaragaro Ubusitani bw’Urwibutso, bwitezweho kuzafasha Abanyarwanda kuzirikana amateka banyuzemo no kuba imfashanyigisho ku bashaka kumenya aya Jenoside yakorewe Abatutsi mu 1994.

Ubu busitani bwubatse kuri hegitari hafi eshatu bugizwe n’ibice 15 by’ingenzi byose byerekana ubuzima Abatutsi babayemo mu 1994 ubwo bahigwaga.

Igice cya mbere kigize ubu busitani ni icyiswe ‘Ubusitani bwumye’, kirimo amabuye ahagarariye abarenga miliyoni bishwe muri Jenoside ndetse n’ubwoko bw’ibiti bumera mu butayu, buhagarariye Ingabo zahoze ari iza RPA zanze kureberera zigahaguruka zikarwanya Jenoside nubwo byari bikomeye.

Ikindi gice ni icyiswe ‘Ubusitani butoshye’. Kirimo ibiti ijana bihagarariye iminsi 100 Jenoside yamaze iba, Abatutsi bicwa umunsi ku munsi.

Muri ibi biti harimo icyatewe na Madamu Jeannette Kagame, ibyatewe n’inshuti z’u Rwanda ndetse n’abarokotse Jenoside yakorewe Abatutsi. Ubwoko bw’ibi biti 100 burihariye bigendanye n’amateka y’u Rwanda.

Birimo Umuvumu nk’igiti cyifashishwaga n’Abanyarwanda mu gutunganya ibikoresho bifashishaga mu buzima bwa buri munsi. Ibi bituma iki giti gifatwa nk’ikimenyetso cy’umuryango.

Iki gice kandi giteyemo ibiti by’Umuko nk’ikimenyetso cy’uburinzi n’ubwiza ndetse n’iby’Umunyinya bifatwa nk’ikimenyetso cyo kudaheranwa no guhatana.

Muri ubu busitani, ubuzima bw’Abatutsi bishwe bakarohwa mu nzuzi ndetse n’abihishe mu bishanga bakabasha kurokoka nabwo bwaragaragajwe binyuze mu gishanga gihangano cyashyizwemo.

Iki gishanga kirimo amazi yerekana ko hari Abatutsi bishwe bakajugunywa mu mazi magari atandukanye. Kirimo kandi urufunzo nka hamwe mu hantu Abatutsi bihishe.

Muri ubu busitani ikindi kigaragaza aho Abatutsi bihishe muri Jenoside ni umurima w’amasaka urimo.

Ikindi gice kigize Ubusitani bw’Urwibutso ni icyobo rusange, cyerekana ko hari Abatutsi bajugunywe mu byobo hirya no hino mu gihugu ndetse n’ahantu hihariye hazajya hakira ibikorwa byo kwibuka, hashobora guteranira abantu 6000 barimo abagera kuri 3000 bicaye neza.

Umuhango wo gutaha ubu busitani witabiriwe n’abanyacyubahiro batandukanye barimo Madamu Jeannette Kagame wanatanze inkunga kugira ngo bwubakwe, Minisitiri w’Ubumwe bw’Abanyarwanda, Dr Bizimana Jean Damascène n’Umuyobozi w’Umujyi wa Kigali, Pudence Rubingisa.

Igitekerezo cyo kubaka ubu busitani cyatangiye mu 2000 ariko gitinda gushyirwa mu bikorwa kuko hari ibitekerezo bishya byagendaga bivuka ku bigomba kongerwamo hagamijwe kunoza uyu mushinga.

Cyakomotse ku Munyabugeni w’Umufaransa

Igitekerezo cyo kubaka Ubusitani bw’Urwibutso cyazanywe na Bruce Clarke, Umunyabugeni w’Umufaransa wageze bwa mbere mu Rwanda nk’uwashakaga kwereka Isi isura y’u Rwanda nyuma ya Jenoside yakorewe Abatutsi, abinyujije mu gufata amafoto.

Bruce Clarke ni umwe mu bari bitabiriye umuhango wo gutaha ubu busitani bwaturutse mu bitekerezo bye ariko bugashyirwa mu bikorwa ku bufatanye bw’inzego zitandukanye.

Uyu mugabo yasangije abari muri uru rugendo uko yagize igitekerezo cyo gushyiraho ubusitani nk’ubu.

Ati “Bwa mbere nasuye u Rwanda muri Kanama 1994. Icyo gihe narafotoraga, noherejwe n’imiryango itandukanye itegamiye kuri Leta mu Bufaransa by’umwihariko umuryango w’Abanyarwanda baba mu Bufaransa, ngomba kugaragaza ‘uko ubuzima buhagaze nyuma ya Jenoside’.”

Yakomeje avuga ko hafashwe umwanzuro wo kumwohereza kuko hari hakiri urujijo ku isura y’u Rwanda ku buryo hari n’aho abantu barwitiriraga amafoto yafatiwe muri Repubulika Iharanira Demokarasi ya Congo.

Ati “Mu Burayi muri icyo gihe, twari turi kubona amashusho atandukanye y’uko u Rwanda rumeze nyuma ya Jenoside. Icyaje kigaragara ni uko ayo mafoto atari ayabaga yafatiwe mu Rwanda ahubwo yari ayo muri Congo, Tanzania n’ahandi hanze y’u Rwanda, ari amafoto y’imiryango yahunganye n’abasize bakoze Jenoside.”

“Ni yo mpamvu twashakaga gufata ukuri kw’ibiri kubera imbere mu Rwanda icyo gihe. Icyo twaje kubona nyuma ni uko abarokotse mu Rwanda ntaho babaga bagaragara muri ayo mashusho. Muri make amateka yasaga n’aho ari kwandikwa bundi bushya hifashishijwe ibinyamakuru byo mu Burayi.”

Nyuma yo kugera mu Rwanda, Bruce Clarke yaje gukorwa ku mutima n’amateka ashaririye ya Jenoside igihugu cyari kivuyemo atangira gutekereza uburyo yakwifashisha ubugeni mu kuyagaragaza.

Yavuze ko yabanje gutekereza ibijyanye n’ibishushanyo cyangwa ibibumbano ariko asanga nta na kimwe cyagaragaza uburemere bw’aya mateka.

Ati “Mu myaka mike yakurikiye uruzinduko rwanjye [mu Rwanda], natangiye kwibaza njye ubwanjye uruhare ‘ubugeni’ bwagira muri uru rugendo rwo kwibuka.”

“Ikibazo nabajijwe icyo gihe, ni uburyo ibyo bintu byari gushyirwa mu bikorwa mu buryo bw’ubugeni. Ni ikihe gihangano cy’ubugeni cyagaragaza ubukana Jenoside yari iriho?”

“Ikibazo cya mbere nibajije ubwo nashushanyaga ubu busitani bw’urwibutso, ni uko bukwiriye kubakwa mu bufatanye n’abandi by’umwihariko dufatanyije n’abarokotse Jenoside ubwabo.”

Yakomeje avuga ko ubusitani bwa mbere yatekereje bwari kuba bugizwe n’amabuye miliyoni ahagarariye umubare w’abishwe muri Jenoside, gusa ngo biciye mu biganiro yagiye agirana n’abandi iki gitekerezo cyaragutse, kiza kuvamo ubusitani bufite ibice bitandukanye.

Yashimye kandi abagize uruhare mu ishyirwa mu bikorwa ry’uyu mushinga by’umwihariko Madamu Jeannette Kagame.

Ati “Twarwubatse ku nkunga twahawe na Madamu wa Perezida wa Repubulika na Imbuto Foundation. Icyo gihe mu myaka 22 [2000] ubwo twari aha, twari kumwe na Madamu Jeannette Kagame, nishimiye ko nyuma y’iki gihe n’uyu munsi tukiri kumwe.”

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yashimye Bruce Clarke ku bw’umusanzu yatanze kugira ngo uyu mushinga ubeho.

Ati “Turashimira Bruce Clarke wagize igitekerezo cyo gutangiza umushinga ‘Ubusitani bw’Urwibutso’ akanawitangira, iteka ryose igihe cyose twamukeneye yahagarikaga ibikorwa bye akaza mu Rwanda gutanga ubumenyi n’ubuhanga bwe kuri iki gikorwa. N’ubu yaje ari kumwe natwe hano uyu munsi bikaba ari inkuru yatunejeje.”

Yavuze ko Leta y’u Rwanda “Izakora ibishoboka byose kugira ngo ubu busitani ntibube ubw’umurimbo gusa, ahubwo bukazakoreshwa uko bikwiye n’Abanyarwanda n’inshuti zabo bariho ubu n’abazavuka.”

Ubusitani bw’Urwibutso ni ikimenyetso kizerekana ibihe bikomeye Abanyarwanda banyuzemo mu bihe bya Jenoside yakorewe Abatutsi mu 1994, kwiyubaka kwabayeho nyuma y’aya mahano n’uruhare ibyanya kamere byagize mu guhisha abahigwaga.

Buzaba kandi nk’ikiraro gihuza ahahise h’u Rwanda, amateka y’uyu munsi n’ahazaza h’igihugu kuko buzajya bukoreshwa mu kwibuka, kwiga no gusangiza abandi amateka akomeye Abatutsi banyuzemo, uko barokotse n’uko biyubatse.

Biteganyijwe ko Abanyarwanda by’umwihariko urubyiruko bazajya basura ubu busitani ku buntu kugira ngo bige amateka akomeye igihugu cyabo cyanyuzemo n’uko Abanyarwanda baje kwiyunga mu rwego rwo gufatanyiriza hamwe guteza imbere igihugu.

Bruce Clarke yashimye abamufashije gushyira mu bikorwa igitekerezo cy'ubu Busitani bw'Urwibutso
Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yagaragaje ko ubu busitani buzafasha mu kwigisha amateka ya Jenoside yakorewe Abatutsi
Mu gihe cyo kwibuka, aha hazajya habera ibiganiro
Iki gice kizajya kiberamo ibiganiro byo kwibuka, gishobora kwakira abantu 6500
Ubu busitani bwashyizwemo n'amazi nk'ikimenyetso cy'Abatutsi bishwe bakajugunywa mu nzuzi
Hari intebe abasura ubu busitani bazajya bicaramo
Urumuri rw'Icyizere ni kimwe mu bimenyetso biri muri ubu Busitani bw'Urwibutso
Ubu busitani bugizwe n'ibice bitandukanye aho buri kimwe gifite igisobanuro cyihariye mu mateka ya Jenoside
Ibi biti bisanzwe bimera mu butayu, byerekana umuhate n'umurava by'ingabo zahoze ari iza RPA mu guhagarika Jenoside yakorewe Abatutsi
Muri ubu busitani harimo amashusho y'abantu bahagaze bemye, nk'ikimenyetso cyo kudaheranwa kw'abarokotse Jenoside yakorewe Abatutsi
Ibiti byatewe muri ubu busitani bifite amateka yihariye mu buzima bw'Abanyarwanda
Iki giti cyatewe na Madamu Jeannette mu 2019
Ibiti by'umunyinya biri muri ubu busitani bigaragaza kudaheranwa no guhatana kw'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .