00:00:00 IGIHE NETWORK KN KINYARWANDA EN ENGLISH FR FRANCAIS

Umutima w’ibuye watumye Gen Mudacumura wa FDLR apfa ari intabwa

Yanditswe na Musangwa Arthur
Kuya 21 September 2022 saa 07:30
Yasuwe :

Imyaka ine irashize Ingabo za Repubulika Iharanira Demokarasi ya Congo zishe Lt Gen Mudacumura Sylvestre wari umuyobozi w’umutwe w’iterabwoba wa FDLR, mu rugamba rwabereye mu mashyamba yo mu burasirazuba bw’iki gihugu, aho uyu mutwe ukorera.

Uyu mugabo wari ukuriye abasirikare barindaga Juvénal Habyarimana ubwo Ingabo za Leta zatsindwaga mu 1994 n’izari iza FPR Inkotanyi kimwe n’abandi benshi yahungiye muri Repubulika Iharanira Demokarasi ya Congo, icyo gihe yitwaga Zaïre.

Muri Zaïre, Mudacumura yabaye mu nkambi zitandukanye zirimo iya Mugunga aho yakomereje ibikorwa bya gisirikare bigamije kugirira nabi u Rwanda.

Muri icyo gihe yayoboye urwego rwa J4 rwari rushinzwe ibikoresho bya gisirikari rwakoreraga ahitwa Lac Vert ku kiyaga cya Kivu ashinzwe ibikorwa byo kugura intwaro n’amasasu ndetse akaba umwe mu basirikare bateguye ibikorwa byo gutera u Rwanda binyuze mu cyitwaga RDR.

Kuwa 31 Ukwakira 1996, Mudacumura yitabiriye inama yahuriwemo n’abasirikare bakuru n’abanyapolitiki bemera ko impunzi z’Abanyarwanda n’abasirikare bashaka gutaha mu Rwanda ku bushake bataha.

We n’abandi bari mu ruhande rwe byarangiye bemeranyije gukomeza kuguma mu mashyamba.

Mudacumura werekeje mu nkambi ya Tingi Tingi, yahise agirwa umuyobozi wa batayo Alpha.

Gusa, ubuzima bugoye bwariho muri icyo gihe ntibwatumye aguma muri Zaïre, ahubwo yahise yambuye ajya muri Centrafrique.

Mu 1999 yongeye gusubira muri Zaïre, ahamagajwe na Col Ntiwirigabo na Maj Renzaho kugira ngo arwanire Perezida Laurent-Désiré Kabila mu ntambara ya Congo.

Muri Gashyantare mu 2000, Mudacumura yavuye muri iyi ntambara yiyunga kuri FDLR. Yinjiriye ahibwa Poweto ndetse ahita agirwa umuyobozi muri ALIR2 mu gihe ALIR1 yari mu Burasirazuba bwa Congo muri Kivu y’Amajyaruguru.

Muri Nyakanga 2000, Mudacumura yagiye ahitwa Kabongo ingabo ze zigana Kamina maze muri Gashyantare 2003 asanga abandi barwanyi ba ALIR bari muri Kivu y’Amajyaruguru mu Burasirazuba bwa Congo, maze agirwa Umuyobozi w’igisirikare cya FDLR kuva mu Ugushyingo 2003 nyuma y’uko Gen. Rwarakabije yari amaze gutaha mu Rwanda. Umwanya yapfuye akiriho.

Lt Gen Mudacumura Sylvestre ni umwe mu basirikare barindaga Habyarimana

Umutima winangiye watumye apfa ari intabwa

Mudacumura yavutse mu 1954, avukira mu Rwanda ahitwa i Gatumba muri Komini Kibilira (ubu ni mu Karere ka Ngororero).

Nyuma yo kurangiza amasomo ye mu Iseminari nto ya Nyundo, yahise ajya kwiga ibya gisirikare mu kigo cya ESM, aho yarangije mu cyiciro cya 16.

Akiva muri iri shuri yahise yoherezwa mu Budage gukomerezayo amasomo, agaruka mu Rwanda ahabwa ipeti rya Kapiteni ndetse ashyirwa mu mutwe w’abasirikare barinda Perezida.

Ubwo indege ya Habyarimana yahanurwaga, Mudacumura ntabwo yari ari kumwe nawe ahubwo yari i Rutare muri Byumba, aho yayoboraga batayo ya 31.

Mu gihe cy’urugamba rwo kubohora Igihugu, Mudacumura yarwaniye mu bice bitandukanye cyane cyane ku musozi wa Jali ariko biza kurangira we n’abandi basirikare bo kwa Habyarimana batsinzwe bambuka bajya muri Repubulika Iharanira Demokarasi ya Congo.

Ubwo Mudacumura yahungaga, yajyanye n’umugore we witwa Goretti Nyirabakunzi, ariko we nyuma aza gutaha mu Rwanda ndetse ajya gutura i Gatumba aho bombi bavukaga.

Amakuru IGIHE yahawe n’umwe mu baturanyi bo ku ivuko rya Mudacumura n’umugore we, avuga ko uyu mugore yafashe icyemezo cyo gutaha mu Rwanda nyuma y’igihe kinini yingiga umugabo we ngo batahe ariko yaranze.

Ati “Twakuze Mudacumura ari mu gisirikare ariko twajyaga tumubona yaje gusura iwabo ari mu modoka ya gisirikare ukabona ari umugabo uvuga make. Nyuma yo gutsindwa urugamba yanyuze hano i Gatumba afata umuryango we bahungira muri Congo.”

“Nyuma umugore we n’umuryango wa Mudacumura baje guhunguka bagaruka i Gatumba ariko we yanze gutaha. Umugore we yatahanye imodoka ebyiri zirimo n’imwe ya gisirikare ariko ubuyobozi buza kuyimwaka, nyuma yaho yagiye gutura i Kigali, byanze ajya i Butare ari naho yavuye ajya i Burayi ndetse ngo afite n’umugabo w’umuzungu.”

Uyu mutangamakuru yakomeje avuga ko mu gihe umugore wa Mudacumura yamaze mu Rwanda yakomeje kumwinginga ngo atahe ariko biba nko kumena amazi ku rutare kugeza aho afashe icyemezo cyo kujya i Burayi.

Umutima winangiye wa Mudacumura wagarutsweho kandi na Paul Rwarakabije babanye muri FDLR.

Rwarakabije yavuze ko yamaze igihe kinini amwinginga ngo atahe, nyuma yo kubona ko mu Rwanda ari amahoro kugeza n’aho yari asigaye atagifata telefone ye.

Ati “Mudacumura ntiyigeza ashaka kunyakira kuri telefone, no kuvugana kuri nimero ye nakirwaga na Gaspard wari umunyamabanga we n’iyo Mudacumura yabaga afite telefone nzi ko uwo babanaga bambwiye ko yayimuherezaga akaba ari we tuvugana.”

Yambwiye ko urugo rutazamurutira igisirikare

Mu 2019 ubwo Mudacumura yicirwaga muri Congo, i Burayi habereye imihango yo kumwibuka yanitabiriwe n’umugore we, Goretti Nyirabakunzi.

Nyirabakunzi yabwiye abari aho ko yamenyanye bwa mbere na Mudacumura afite imyaka 14, ubwo bahuriraga kwa mubyara w’uyu mugore wari ukiri mu mashuri.

Nyuma yaho ngo baje kuburana, bongera guhura mu 1986 ubwo Perezida wa Uganda, Yoweri Kaguta Museveni yagirira uruzinduko rw’iminsi itatu mu Rwanda agasura na Kaminuza Nkuru y’u Rwanda i Butare aho Nyirabakunzi yigaga.

Ati “Nyuma igihe Perezida Museveni yazaga i Butare nagiye kubona ndi kwitemberera mu Mujyi mbona ivatiri impagaze iruhande, mbona umuntu (Mudacumura) amanuye ikirahure aransuhuza arambwiye ati “ubundi ndi mu kazi ariko mukanya tuze guhurira kwa Ephrem wo muri BCR, ni uko ndavuga nti uyu mugabo aranshakaho iki?”

Yakomeje avuga ko iki gihe yanze kujya aha hantu Mudacumura yari yamusabye ko bahurira.

Nyuma ngo baje kongera guhura bigizwemo uruhare na mubyara wa Nyirabakunzi.

Ati “Ni uko hashize iminsi njya gusura mubyara wanjye witwa Mariya nawe wari umugore w’umusirikare. Ninjiye ngiye kubona mbona arirutse agiye kuri telefone. Nyuma y’iminota nk’itatu nagiye kubona mbona Mudacumura arahageze.”

Nyirabakunzi yakomeje avuga ko umubano we na Mudacumura wagiye ukura kugeza aho bemeranyije kubana ariko uyu mugabo akamubwira ko urugo rutazamurutira igisirikare.

Ati “Mudacumura mbere y’uko tubana, mbere y’uko dusinya yarambwiye ati ‘njye ndi umugabo wihebeye umwuga we, “urabyumva neza? Njye mfite umwuga wanjye niba Igihugu kinkeneye urugo ntabwo arirwo ruzaza mbere”.

Uyu mugore yavuze ko nta muntu yagira inama yo kwinangira nka Mudacumura cyangwa ngo ayoboke amashyamba yo muri Congo.

Ati “Ntabwo nabwira abantu ngo muhaguruke hano mujye kuba muri ririya shyamba rya Congo. Ntabwo mwakwisuka inyuma ya Mudacumura, mwakora mukurikije impano Imana yabahaye.”

Mu buryo busa n’ubuteruye yagaragaje ko ntawe ukwiriye kumucira urubanza cyangwa ngo arucire undi uwo ariwe wese wanze kuguma mu ishyamba.

Ati “Kandi nta muntu mukwiye gutera ibuye ngo we yiyiziye i Burayi cyangwa yagiye muri Amerika umuntu wese akora uko umutima we umubwiye uwo niwe nakwita intwari.”

Mudacumura yapfuye hari hashize igihe ashakishwa n’Urukiko mpuzamahanga mpanabyaha rukorera i La Haye, rwamuregaga ibyaha birimo kugaba ibitero ku basivili, ubwicanyi, kwangiza ibice bimwe by’umubiri ku muntu, gufata ku ngufu, kwangiza imitungo no gusahura.

Lt Gen Mudacumura yiciwe muri Repubulika Iharanira Demokarasi ya Congo
Umugore wa Mudacumura yigiriye i Burayi nyuma y'uko umugabo we yanze kuva mu mashyamba ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .