Uko u Bufaransa butakolonije u Rwanda ariko bukarwinjiramo kugeza bugize uruhare muri Jenoside

Yanditswe na Twarabanye Venuste
Kuya 29 Gashyantare 2020 saa 05:46
Yasuwe :
0 0

Amateka yerekena ko u Bufaransa butari mu bihugu byakolonije u Rwanda ariko nanone akerekana ko bwagize uruhare muri Jenoside yakorewe Abatutsi, ibi bituma benshi bibaza ku mubano ibihugu byombi byagiranye kugeza aho kimwe gifatwa nk’ikibyara ikindi muri batisimu.

Amateka yerekena ko u Budage ari cyo gihugu cya mbere cyakolonije u Rwanda, gusa ntibwahatinze kuko intambara ya Mbere y’Isi itangira mu 1914 bwahise buva mu Rwanda no mu bindi bihugu bwakolonizaga.

Bwahise basimburwa n’u Bubiligi intambara ya mbere y’Isi ijya kurangira, bugeza mu 1962 u Rwanda rubonye ubwigenge.

Leta ya mbere yashyizweho yarimo n’Abaminisitiri b’Ababiligi bavanze n’abanyarwanda baturukaga muri MDR Parmehutu yari ku Butegetsi. Nubwo u Rwanda rwari rumaze kubona ubwigenge, ntabwo Ababiligi bahise bagenda bagumye muri serivisi zitandukanye zirimo iz’uburezi, ubuvuzi ndetse no mu gisirikari cy’u Rwanda (Ex-FAR) batozaga bakanabaha buruse zo kujya iwabo kwiga.

Mu 1975 Perezida Habyarimana Juvénal amaze imyaka ibiri ahiritse Kayibanda Gregoire ku butegetsi, nibwo Abafaransa binjiye mu Rwanda ku masezerano basinyanye n’u Rwanda y’ubufatanye mu by’ubumenyi na gisirikari aho bagombaga gutoza Jandarumori.

Umwalimu muri Kaminuza akaba n’umwanditsi w’ibitabo kuri Jenoside yakorewe Abatutsi ndetse n’Umujyanama mu by’amategeko muri Komisiyo y’igihugu yo kurwanya Jenoside, Dr. Diogène Bideri, avuga ko u Bufaransa bwinjiriye ku bintu byumvikana ko ari ubutwererane ariko ataricyo cyabagenzaga.

Ati “Kuva ubwo Abafaransa barinjiye binjirana ibintu byumvikana, by’ubutwererane by’ubufatanye ariko siko biri.”

Avuga ko Abafaransa binjira mu mateka y’u Rwanda kimwe n’ahandi muri Afurika, bari bafite umugambi bise ‘France-Afrique’ ugamije ko bagomba gutekereza no kuyobora Abanyafurika bakoresheje abo bashyiraho nk’ibikoresho byabo kugira ngo inyungu zabo zigumeho kuri uwo mugabane n’ururimi rw’Igifaransa rushinge imizi.

Dr. Bideri avuga ko Abafaransa biyerekanye abo bari bo mu 1990 ubwo urugamba rwo kubohora igihugu rwatangiraga. Icyo gihe ngo Ababiligi bagerageje kurwanira Perezida Habyarimana ariko ntibatinda muri urwo rugamba bafata bene wabo barigendera.

U Bufaransa bwasigaranye n’ingabo za Mobutu bufasha Habyarimana kurwanya Inkotanyi ariko abo banye-Congo nabo baza gukuramo akabo karenge. U Bufaransa bwo ngo bwiyemeje kurwana ariko bugamije ko bwaguma mu Rwanda, bwashakaga kugira igicumbi n’inzira yo kurengera inyungu zabwo mu Karere ruherereyemo.

Ati “Abafaransa baguma aha bashyiraho za operasiyo zinyuranye zifite amazina [zirimo operation Turquoise] ni ukuvuga u Bufaransa bwafashe uwo mwanya buravuga buti tugiye kurwana, mu mutwe buvuga buti turarwanira iki? Turarwanira u Rwanda kuko nicyo gishobora gutuma tuguma muri kariya Karere, inyungu zacu tukazisigasira, ururimi rwacu n’ibindi.”

France Afrique initwa Françafrique ni umugambi mugari wahimbwe n’u Bufaransa uvuga ko ugamije gutsura umubano n’ibihugu bya Afurika, nyamara abahanga bavuga ko wari ugamije kurengera inyungu zabwo mu bihugu bya Afurika bwakolonije.

N’ubu uwo mugambi uracyakora kuko haribazwa icyo ingabo 8000 ziri muri Afurika zimara kuko zaje zivuga ko zije guhangana n’imitwe y’iterabwoba ariko ikaba igihari n’ibikorwa byayo bikomeje.

Hari ingabo 4500 ziri muri Sahel [ni agace kari hagati y’ubutayu bwa Sahara mu Majyaruguru ya Sudani, kakaba gakora ku Nyanja ya Atlantica ndetse n’Itukura.] hari 4720 muri Mali, Burkina Faso, Niger na Chad.

Ariko si aho gusa kuko hari 1450 bari muri Djibouti, 900 muri Côte d’Ivoire, 350 muri Senegal na 350 muri Gabon bose hamwe bagera ku 8000 bari hagati ya Dibout na Dakar unyuze muri Abidjan na Lebreville.

Abo bose bivugwa ko ntacyo bakora mu byo binjiye muri ibyo bihugu bavuga, ahubwo barengera inyungu zabo. Izo nyungu zirimo ibigo binini by’ubucuruzi, amasoko bafite, cyangwa ibikoreshwa mu nganda zabo bakura muri Afurika.

U Bufaransa bwagiye bwohereza ingabo mu Rwanda zigamije gusigasira inyungu zabwo mu karere ruherereyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .