Uko RDF yatumye Leta izigama miliyari hafi 9 Frw mu mishinga yahinduye imibereho y’Abanyarwanda

Yanditswe na Rabbi Malo Umucunguzi
Kuya 5 Nyakanga 2020 saa 07:01
Yasuwe :
0 0

Buri mwaka mu gihe u Rwanda ruba rwizihiza umunsi wo Kwibohora, Ingabo z’u Rwanda zishyira mu bikorwa imishinga itandukanye muri gahunda yazo yo kwegera abaturage, zigakora imirimo itanga umusanzu mu iterambere n’imibereho myiza.

Ni ibikorwa bijyana no kwizihiza Umunsi wo Kwibohora wizihizwa ku wa 4 Nyakanga buri mwaka, aho mu mwaka ushize hatashywe umudugudu wa Karama mu Karere ka Nyarugenge, utahwa na Perezida Paul Kagame.

Umuvugizi wa RDF, Lt Col Innocent Munyengango, yavize ko byakozwe na RDF ifatanyije n’izindi nzego zitandukanye, byose bigamije guteza imbere abaturage.

Yakomeje agira ati "Umwihariko ni uko uyu mwaka ibi bikorwa bitagenze nk’uko byari byarateganyijwe kubera icyorezo cya COVID-19, ariko nanone ibyakozwe muri ibyo bihe bigoye, birashimishije.”

Imwe mu mishinga yakozwe harimo Imidugudu 14 y’icyitegererezo yubakiwe imiryango 318, aho inzu wasangaga zifatanye mu buryo bwo gukoresha neza ubutaka, inzu z’abarokotse Jenoside zubakiwe imiryango 561, ibiraro 20, imihanda ya kilometero 401.22.

Hari kandi ibigo nderabuzima 11 byubatswe, amashuri, amasomo n’imishinga y’amazi byose hamwe bigize imishinga 12, n’imishinga y’ubuhinzi n’ubworozi ahatanzwe inka ku miryango 64 n’inkoko 2000.

Imidugudu 14 yubatswe kuri miliyari 8082 Frw, ku buryo ngo iyo bijya kubakwa hubahirizwa amasoko nk’uko bisanzwe byagombaga gutwara miliyari 8.98 Frw.

Yakomeje ati “Byafashije leta yacu kwizigamira miliyoni 898 Frw”

Mu ntara y’Amajyepfo hubatswe imidugudu 5 igenewe imiryango 100; mu Ntara y’iburasirazuba hubatswe itatu igenewe imiryango 84, mu Burengerazuba ni imidugudu itatu naho igenewe imiryango 100.

Mu ntara y’Amajyaruguru hubatswe imidugudu ibiri igenewe imiryango 26, naho mu Mujyi wa Kigali hubakwa umudugudu umwe mu karere ka Nyarugenge, ugenewe imiryango umunani.

Hanubatswe inzu 286 zigenewe abarokotse Jenoside yakorewe Abatutsi mu 1994, zigenewe abatishoboye 561, byatwaye miliyari 6.99 rw.

Lt Col Munyengango yakomeje ati “Biza gufasha leta yacu kwizigamira miliyoni 776 Frw kubera ko byakozwe hari ubufatanye kandi vuba.”

Uretse ibyo kandi hubatswe ibiraro 20 mu turere twa Ngororero, Burera, Muhanga, Karongi, Ruhango na Nyabihu, byinshi byubatswe mu rwego rwo gukemura ingaruka zatewe n’ibiza byibasiye igihugu cyacu.

Yakomeje ati “Iri yubakwa n’iri sanwa ry’ibi biraro uko ari 20 byatwaye amafaranga miliyari 17.2 Frw, iyo aya masoko atangwa mu buryo busanzwe byari butware miliyari 18.78 Frw, ibi bikaba byarafashije kuzigamira isanduku ya leta miliyari 1.5 Frw.”

Inkeragutabara na Engineering Brigade kandi ngo bafashije mu kubaka imihanda isaga kilometero 401, byatwaye miliyari 36.1 Frw, iyo bikorwa hadafatanyijwe inzego zitandukanye za leta byari butware miliyari 39.4 Frw.

Lt Col Munyengango yakomeje ati "Ibi rero byatumye leta yacu yizigamira miliyari 3.2 Frw”

Muri iyo mihanda harimo uwa kaburimbo ugera ku ivuriro ry’amaso rya Kamonyi, umuhanda Pindura-Bweyeye na Nyungwe Belt unyura muri Nyamagabe, Nyaruguru na Rusizi ufite kilometero 251.

Aha Perezida yari amaze gusura imwe mu nzu zubatswe muri uyu mudugudu

Inkeragutabara na Engineering Brigade kandi ngo bubatse banavugurura amavuriro n’ibitaro 11, ibitaro Perezida Kagame yari yaremereye abaturage harimo ibya Gatunda muri Nyagatare na Gatonde muri Gakenke.

Hari n’imishinga 12 y’amashuri atandukanye, arimo Muhanga na Karembure, ndetse bafatanya n’izindi nzego mu buhinzi no koroza abaturage batandukanye.

Yabwiye Perezida Kagame ati "Afande, ibi bikorwa byose tubagaragarije byakorewe abaturage uyu mwaka, byatwaye miliyari 88 Frw, kubera ko byakozwe mu bufatanye bw’inzego, iyo bikorwa mu masoko asanzwe byari butware miliyari 96.5 Frw, kuri ubu rero byafashije leta kwizigamira miliyari 8.5 Frw, binakorwa no mu gihe hamwe kiri munsi y’amezi atatu, ahandi mu mwaka umwe.”

Minisitiri w’Ubuzima, Dr Daniel Ngamije, yavuze ko mu mishinga yubatswe harimo ibikorwa remezo 11 birimo ibitaro bibiri bya Gatunda n’ibya Gatonde, hamwe n’ibigo nderabuzima icyenda.

Ibitaro bya Gatunda bigenewe kuzita ku baturage 160 000 Frw, byuzuye bitwaye miliyari 5.6 Frw, gusa ubu ntabwo biratangira gukora.

Yakomeje ati “Ni ukubera ikibazo twagize cyo kugura ibikoresho, byari byaraguzwe ariko kubera COVID-19 mu kwezi kwa gatatu n’ukwa kane ibikorwa byari bifunzwe ahantu henshi nko mu Butaliyani aho twaguraga ibikoresho no mu Bushinwa, ibikoresho bizatinda kugera mu gihugu kuko mu bintu 18 byo kwa muganga twaguze, 15 bizagera hano tariki 31 Nyakanga, ibindi bitatu bisigaye zizagera hagati mu kwezi kwa munani.

“Ku buryo ibitaro bizatangira gukora tariki ya 30 Kanama. Icyo navuga ni uko abakozi ubu twamaze kubageza ku bitaro n’ibikoresho bimwe na bimwe nk’ibikoresho byo mu bitaro birahari, uyu munsi abakozi bahari bakaba batangiye kwita ku burwayi bworoshye, nk’umubyeyi uje kubyara twamwakira, mu gihe turi kwitegura kugira ngo dutange serivisi zose z’ibitaro.”

Naho ikigo nderabuzima cya Tabagwe cyatwaye miliyari 1.2 Frw, cyubatswe ku bufatanye bwa Minisiteri y’Ubuzima na Imbuto Foundation, igisigaye ni uko ibikoresho byose bishyirwamo, abakozi bagatangira gukora.

Irindi ni uvuriro ryo mu mudugudu wa Gishuro, rizita ku miryango 64 ihatuye n’abantu bo mu kagali ryubatsemo basaga 3000.

Umudugudu wa Gishuro watashywe kuri uyu wa Gatandatu ugizwe n’inzu 16, aho imwe ikubiyemo enye, zose hamwe zigenewe imiryango 64. Buri muryango wahawe gaz yo guteka, televiziyo na radiyo na telefoni imwe ya smartphone, amazi n’ubwiherero bwo mu nzu. Ni umudugudu watwaye 1 093 293 165 Frw.

Inzu zubatswe muri uyu mudugudu mu buryo bwa '4 in 1'
Ni umudugudu ufite ibikorwa remezo by’ibanze byose
Buri muryango wahawe gaz n'amashyiga awubafasha gucana mu buryo butangiza ikirere
Buri nzu yashyizwemo ibikoresho by'ibanze nk'intebe ndetse na televiziyo
Aha ni mu ruganiriro
Mu cyumba cy’abana ni uku hameze
Muri uyu mudugudu hubatswe n'amashuri ku buryo abana bawutuyemo bazajya bahabonera byose bakeneye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .