Uko Made in Rwanda yafashije Mugabo Egide gukabya inzozi zo guhesha urubaho agaciro

Yanditswe na Muvunyi Arsène
Kuya 9 Ukuboza 2018 saa 08:17
Yasuwe :
0 0

Gahunda ya Made in Rwanda imaze gushinga imizi mu mfuruka z’igihugu. Yashyizweho mu kugabanya umubare w’ibitumizwa mu mahanga watumaga ubukungu bw’igihugu butazamuka uko bikwiye.

Imibare igaragaza ko u Rwanda rwinjije miliyoni $463.16 avuye mu bicuruzwa rwohereje hanze mu mezi atandatu ya mbere ya 2018, zivuye kuri miliyoni $375.91 mu gihe nk’iki mu mwaka ushize.

Abenshi bakabije inzozi binyuze mu guha agaciro no guteza imbere ibikorerwa mu Rwanda.

Muri bo harimo Mugabo Egide washinze Sosiyete ya MN Lucky Limited yongerera agaciro imbaho, akora ibikoresho byo mu biro no mu ngo.

Iyi sosiyete yatangiye mu myaka 12, ishinzwe na Mugabo Egide. Yatangiriye ku tuntu duke nabwo yifashisha ibikoresho bimwe na bimwe bituruka hanze y’u Rwanda.

Ku wa 7 Ukuboza 2018, nibwo MN Lucky Limited yatangije i Gasabo Show Room, icyumba izajya imurikiramo ibikoresho bitandukanye byo mu biro no mu ngo nk’ameza, intebe, utubati n’imitako itandukanye ituma uruganiriro cyangwa icyumba bisa neza. Umwihariko bikaba bikoze hifashishijwe ibikoresho byo mu Rwanda.

Imyinshi mu mitako bakora, bifashisha ibikoresho bifatwa nk’ibidafite akamaro nk’amacupa, utudobo, uducuma ariko bigakorwa mu buryo bunogeye ijisho.

Umuyobozi w’Ishami ry’ibijyanye no gukora inyigo muri NM Lucky (Design and Concepts Department), Habimana John, yabwiye IGIHE ko umwihariko bafite ari ugutekereza ibidasanzwe.

Yagize ati “Ntabwo dukora igikoresho gusa kugira ngo gikoreshwe ariko turagira ngo kinabere ijisho, ku buryo umuntu akireba avuga ngo iki kintu ni cyiza, gifite uburanga. Niyo mpamvu twagiye dushaka amahugurwa menshi mu bijyanye no guteranya imbaho n’ibikorwa nyuma nko gusiga vernis.”

Habimana yavuze ko ibikoresho byabo ubigereranyije n’ibituruka i Burayi, usanga ari byiza kuko biba bikoze mu bikoresho byizewe kandi bikomeye.

Mugabo Egide watangije MN Lucky Limited yavuze ko kuva kera yahoze afite inzozi zo gukora ibikoresho byo mu mbaho ndetse amata aza kumubyarira amavuta.

Yagize ati “Ikintu cyari inzozi zanjye kuva kera ni ugukora ibintu mu rubaho. Leta y’u Rwanda kuva yatangira guteza imbere ibikorerwa mu Rwanda, nibwo natekereje gukoresha ibikoresho byo mu ngo no mu biro ariko bya Made in Rwanda, kugira ngo abantu bagabanye ibitumizwa mu mahanga.”

Umuyobozi ushinzwe Iterambere ry’Ubucuruzi mu Mujyi wa Kigali, Umutoni Christine, yijeje inkunga yo gukomeza gushyigikira igikorwa cya MN Lucky Limited.

Ibikoresho bya MN Lucky Limited birakunzwe ku isoko ndetse ryamaze kwaguka bishingiye ku kuba no mu itangwa ry’amasoko ya leta ibikorerwa mu Rwanda byarashyizwe imbere.

Iyi sosiyete ifite abakozi 20 bahoraho batunganya imbaho, yiyemeje gufatanya n’amashuri yigisha imyuga nk’ububaji mu guhugura abanyeshuri no kubaha akazi mu rwego rwo guhanga imirimo.

Bifashishije ubudodo ku buryo amacupa atagikoreshwa bayakuramo imitako y'akataraboneka
Ibikoresho byo mu mbaho babiha ubwiza budasanzwe
Bakora imitako bifashishije ibiboneka mu Rwanda
Imyinshi mu mitako bakora, bifashisha ibikoresho bifatwa nk’ibidafite akamaro nk’amacupa, utudobo, uducuma ariko bigakorwa mu buryo bunogeye ijisho
Ameza afite ipine ry'igare ni kimwe mu byakozwe n'iyi sosiyete
Mugabo yerekanye ko ipasi ishobora kubyara umutako mwiza
Mugabo Egide watangije MN Lucky Limited yavuze ko kuva kera yahoze afite inzozi zo gukora ibikoresho byo mu mbaho
Imiterere y'uruganiriro rwakozwe na MN Lucky Limited
Imiterere y'utubati two mu biro dukorwa n'isosiyete ya Mugabo Egide

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza