Uko Kambibi yababariye musaza we wamwiciye umugabo n’abana batandatu muri Jenoside

Yanditswe na Evariste Nsengimana
Kuya 14 Mata 2019 saa 12:33
Yasuwe :
0 0

Jenoside yakorewe Abatutsi mu 1994 yakoranywe ubugome ndengakamere ku buryo byageze aho umuntu yica uwo bafitanye isano y’amaraso ya hafi, ibintu bitigeze biba ahandi.

Monica Kambibi ni mushiki wa Paul Twahirwa bombi bavuka ku mubyeyi w’umuhutu ariko Kambibi yaje gushaka umugabo w’umututsi mbere y’uko Jenoside yakorewe Abatutsi iba.

Icyo gihe byari ibisanzwe kuko abanyarwanda barashyingiranaga, bakagabirana nta kibatandukanya ndetse umuryango we wari uherereye mu Majyepfo y’u Rwanda wari wanabyishimiye.

Muri Jenoside yakorewe Abatutsi, Twahirwa n’undi muvandimwe, bari bayoboye igitero cy’Interahamwe biciyemo muramu we na bishywa be batandatu (umugabo n’abana ba Kambibi), irangiye aza gushyikirizwa ubutabera ndetse arafungwa.

Muri Jenoside, uyu mubyeyi w’imyaka 57 yarahunze avuyeyo asanga musaza we Twahirwa afunze, azagufungurwa amazemo imyaka 10 nyuma yo kwemera icyaha akanagisabira imbabazi.

Nyuma Twahirwa yaratashye yongera guturana na mushiki we we yahekuye.

Ubuzima yaciyemo uyu mukecuru bwamugizeho ingaruka zikomeye zirimo ihungabana, kwiheba n’izindi biturutse ku kuba yariciwe umuryango bigizwemo uruhare n’abavandimwe be.

Aganira na The Mirror, Kambibi yavuze ko nubwo hashize imyaka 25 ibyo bibaye, n’ubu ishusho y’umuryango we n’uko wishwe bijya bigaruka mu bitekerezo bye agahinda kakamwica.

Kambibi yamaze igihe mu gahinda byatumye atangira gukoresha ibiyobyabwenge asigara nta cyerekezo cy’ubuzima afite.

Mu 2007 Umuryango International Alert, watangije ibiganiro bihuza abishe n’abaciwe muri Jenoside yakorewe Abatutsi bigamije kubashishikariza inzira y’ubwiyunge, binyuze mu gusaba imbabazi no kubabarira.

Kambibi ntiyahise yiyumvisha akamaro ko gukorana n’uyu muryango umaze gufasha abasaga ibihumbi 50 kwiyunga ariko Twahirwa arawuyoboka. Kambibi yaje kohererezwa abajyanama, bamugira inama ndetse yemera ko bamwubakira inzu yo kubamo.

Uyu muryango wakomeje kumuba hafi mu buzima yarimo butari bumworoheye ariko urugendo rwo kwiyunga na musaza rwamufashije gusubira mu buzima busanzwe.

Twahirwa yavuze ko ubusanzwe nta rwango yagiriraga Abatutsi ahubwo ko abayobozi bariho babasangaga mu ngo, bakababwira ko ‘Abatutsi nubwo baba ari abana babo ari abanzi bagomba kwicwa’.

Ati “Nanjye abo bana narabakundaga ariko icyo gihe numvise ntabakeneye. Twari nk’abasazi. Ubu mfite ikimwaro, bari bishywa banjye na muramu wanjye.”

Kambibi yavuze ko nubwo kubyibagirwa bitashoboka, yamaze kumubabarira, ubu basangira bagasabana nk’abavandimwe.

Ati “Navuga ko nkunda umuvandimwe wanjye kandi ni n’inshuti yanjye […] Nibwiraga ko ntakongera kuvugana nawe kuko iyo narebaga mu maso ye, nahitaga nongera kwibuka ibyo yakoze byose ariko nagombaga kumubabarira.”

Uyu mukecuru yakomeje agira ati “Nari nkeneye komora ibikomere no kumuha imbabazi akaruhuka […] Ntabwo nabyibagirwa ariko naramubabariye.”

Twahirwa yiyunze na Mushiki we Kambbi yiciye umugabo n'abana batandatu
Kambbi na musaza we Twahirwa wamwiciye ubu barasangira bagasabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza