Uko Jenoside yasembuye inganzo y’umwanditsi w’ibitabo Umwagarwa Happy

Yanditswe na Muvunyi Arsène
Kuya 7 Mata 2019 saa 04:54
Yasuwe :
0 0

Happy Assumpta Umwagarwa ni Umunyarwandakazi utuye muri Gabon aho akorera umwe mu miryango mpuzamahanga. Ni umwanditsi w’imivugo, inkuru ngufi n’ibitabo.

Amaze gushyira hanze ibitabo bibiri. Icya mbere ni icyitwa Drums Of Success cyasohotse mu 2015 na ‘Hearts Among Ourselves’ cyasohotse mu mpera z’umwaka ushize kikaba cyaranashyizwe mu Kinyarwanda.

Yabwiye IGIHE ko impano yo kwandika yatangiye kuyiyumvamo nyuma ya Jenoside yakorewe Abatutsi yahitanye se, abavandimwe be n’abandi bo mu muryango we.

Ati “Nkeka ko byaturutse ku bibazo nibazaga nk’umuntu wari ukiri muto, Jenoside yabaye mfite imyaka 15, nari maze kuyirokoka umubyeyi wanjye amaze kwicwa, basaza banjye babiri n’abandi bo mu muryango, noneho muri uko kwibaza ibibazo byinshi nkajya nandika utuntu. Ndibuka ko najyaga nandikira amabaruwa data atakiriho, noneho nkunda kwandika gutyo numva ko ari byo bimfasha gusobanukirwa ibitekerezo byanjye.”

Igitabo cye cya mbere ‘Drums Of Success’ kivuga ku guhanga udushya umuntu ahereye ku bushobozi yifitemo, ni cyo cyamuteye imbaraga zo gukomeza.

Igihangano giheruka kujya hanze cya Umwagarwa ni igitabo kirimo inkuru mpimbano yise Heart Among Ourselves.

Gishingiye ku mukobwa witwa Karabo n’umuhungu witwa Shema, bose baba bararokotse Jenoside yakorewe Abatutsi. Uyu musore aba arinda umusirikare wo mu muryango w’umukobwa ari naho bose babaga, bagatangira gukundana.

Shema aba yarapfushije abo mu muryango we bose, ariko Karabo aba yarasigaranye nyina gusa akamubeshya ko nawe yishwe muri Jenoside.

Muri iki gitabo harimo n’izindi nkuru z’abarokotse Jenoside yakorewe Abatutsi nka Devotha uba warafashwe ku ngufu ndetse akabyara umwana ibintu bimutera ihungabana kugera n’aho yanga umwana yibyariye kuko yamwibutsaga uwamufashe ku ngufu.

Umwagarwa avuga ko muri iki gitabo yashakaga kugaragaza ibibazo urubyiruko rwa nyuma ya Jenoside yakorewe Abatutsi rwibazaga n’uko ababyeyi babafashaga.

Ubutumwa bukuru buri muri iki gitabo ni ubugaragaza ko kubabarira ari urugendo rukomeye ariko kandi rushoboka, ruganisha ku gukira ibikomere bya Jenoside.

Umwagarwa umwanditsi ukomora inganzo ku mateka ye muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza