Uko icyizere cy’ubuzima kizamuka, ni ko ibyago byo kwicwa n’indwara zitandura byiyongera

Yanditswe na Niyitanga Jean Paul
Kuya 13 Ugushyingo 2020 saa 06:19
Yasuwe :
0 0

Urupfu ni kimwe mu bintu bitera umubabaro mu mitima ya benshi batuye isi, ni na kimwe mu bintu abantu batinya kuruta ibindi maze bakifuza gukomeza kubaho kabone nubwo ubuzima bwaba butaboroheye.

Ikirushaho kuba ingorabahizi ni uko uko umuntu akura, agenda asatira ibyago byo kurwara indwara zishobora kumwica. Ku isonga y’izo ndwara hariho izitandura kuko kuri ubu zihariye ijanisha rya 70 y’abantu bose bapfa ku Isi. Ni ukuvuga ko mu bantu 10 bapfa, nibura barindwi baba bishwe n’indwara zitandura.

Raporo y’Ishami ry’Umuryango w’Abibumbye ryita ku Buzima yo mu 2018, igaragaza ko muri uwo mwaka indwara zitandura zishe abantu bangana na miliyoni 41 bingana na 71% by’abantu bose bapfuye muri uwo mwaka. Abenshi muri aba bari bafite imyaka iri hejuru ya 65.

Ibi biterwa n’uko uko umuntu akura ari na ko ibice by’umubiri bimufasha mu guhangana n’izi ndwara biba byacitse intege bityo umubiri ukaba uri mu byago byo gufatwa n’indwara nyinshi.

Urugero ni nk’indwara z’umuvuduko w’amaraso. Ku bantu bakuze ahanini zituruka ku kuba umutima uba waracitse intege utabasha gukora neza.

Ibi binashimangirwa na Dr Sabin Nsanizmana uyobora Ikigo cy’Igihugu cy’Ubuzima mu Rwanda, RBC.

Ati “Uko umuntu akura uturemangingo turasaza, ni ko Imana yaturemye, ni inzira yo gusaza kandi si natwe gusa n’ibihingwa ni ko bigenda, uko umuntu akura buriya n’inyama zo mu mubiri n’ibindi bice by’umubiri bidufasha kubaho na byo bigenda bigira ibibazo.”

Ibi bivuze ko uko icyizere cyo kubaho kizamuka, imyaka yo kubaho ikiyongera ari na ko umubare w’abicwa n’indwara zitandura ugenda wiyongera cyane.

Ati “Nyuma gato ya Jenoside yakorewe Abatutsi twari turi ku cyizere cy’ubuzima kingana n’imyaka 40 ariko ubu icyizere cy’ubuzima ni imyaka 67. Uko icyizere cyo kubaho kizamuka rero ni ko umuntu ajya mu byago byo kurwara izi ndwara zitandura.”

Yakomeje avuga ko “iyo urebye mu bihugu bifite abantu benshi bicwa n’indwara zitandura ni uko icyizere cy’ubuzima muri ibyo bihugu kiba kiri hejuru.”

Dr Nsanzimana yavuze ko buri mwaka mu bantu bapfa mu Rwanda ijanisha rya 44% bicwa n’indwara zitandura. Ni ukuvuga ngo hafi kimwe cya kabiri cy’abantu bapfa mu Rwanda bicwa n’indwara zitandura.

Aba biyongera ku mubare munini w’abantu bicwa n’izindi ndwara ariko byaturutse ku kuba bari basanzwe barwaye indwara zitandura nka kanseri, iz’umutima, diabète, indwara zifata imyanya y’ubuhumekero n’izindi.

Urugero ni uko nk’abantu bicwa na Covid-19, abenshi ari ababa basanzwe barwaye izindi ndwara ziganjemo izitandura. Nko mu Butaliyani, 96,2% by’abantu bishwe na Covid-19 bari basanzwe barwaye indwara zitandura cyane cyane umuvuduko ukabije w’amaraso.

Dr Nsanzimana yagiriye abantu inama yo kugerageza gukoresha umubiri imyitozo bakirinda kumara umwanya bicaye hamwe.

Ati “Iyo wicaye igihe kiri hejuru y’amasaha ane ku munsi, intebe ihinduka umwanzi wawe wa mbere. Gerageza gutambuka ukoresha amaguru.”

Yagarutse no ku byo abantu barya n’ibyo banywa, avuga ko na byo bishyira ubuzima bwabo mu byago byo kurwara indwara zitandura, agira inama abantu yo kugabanya kurya no kunywa ibyakorewe mu nganda.

Ati “Ibyo turya n’ibyo tunywa ni ingenzi, rya imboga n’imbuto, unywe n’amazi kuko amazi ni cyo kinyobwa cya mbere kiza ku buzima. Niba udashobora kureka inzoga, jya unywa nke unywe n’amazi menshi.”

Ibi byiyongeraho kwirinda itabi. Ikindi agiramo abantu inama ni ukwisuzumisha bakareba uko ubuzima bwabo buhagaze kuko indwara zitandura zishobora no guterwa n’izindi mpamvu umuntu atagizemo uruhare nk’uruhererekane rwo mu miryango.

Indwara nka diabète ziri mu zitandura zihangayikishije Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .