Uko Gen Kabarebe abona ibibazo by’umutekano muke ku mugabane wa Afurika

Yanditswe na Iradukunda Serge
Kuya 19 Nyakanga 2020 saa 08:19
Yasuwe :
0 0

Umujyanama wa Perezida Kagame mu by’umutekano Gen James kabarebe yavuze ko Afurika idashobora gutera imbere mu gihe kuri uyu mugabane hakiri ibibazo by’umutekano muke, gusa agaragaza ko hakiri icyizere cy’uko bizakemuka umunsi umwe uyu mugabane ukagira amahoro.

Ikibazo cy’umutekano muke gisa nk’icyamaze kuba karande ku mugabane wa Afurika, dore ko imibare y’ikigo cyo muri Norvège cyita ku mpunzi yerekana ko ibi bibazo byiganje mu bihugu byo mu gace ka Sahel birimo Senegal, Mauritania, Mali, Burikina Faso, Niger, Nigeria, Chad, Cameroun, Sudan na Eritrea.

Kubera ibibazo by’umutekano muke, abaturage muri Mali barenga ibihumbi 335 bakuwe mu byabo, muri Nigeria uyu mubare wo urenga miliyoni ebyiri, muri Cameroun ho abaturage bafite iki kibazo barenga ibihumbi 700.

Ibi bibazo by’umutekano muke kuri uyu mugabane nibyo ntandaro y’ibindi bibazo biwibasira birimo inzara, ubukene n’ibyorezo.

Ubwo yari mu kiganiro ku kwizihiza kwibohora ku nshuro ya 26 kuri Televiziyo y’u Rwanda, Gen James Kabarebe yabajijwe uko abona iki kibazo cy’umutekano muke kuri uyu mugabane n’uburyo abona cyakemukamo.

Yavuze ko Afurika idashobora gutera imbere igihe hakiri ibibazo by’umutekano muke.

Ati "Hatari umutekano iterambere rya Afurika ryagorana cyane, umutekano ni ngombwa. Hari ingamba, intego Afurika yafashe yo gucecekesha imbunda kugira ngo amahoro agaruke hirya no hino, ariko n’ubwo haba hari icyifuzo, hari n’ingamba, haba hari n’inzitizi nko mu gace ka Sahel, Somalia, Uburasirazuba bwa Repubulika Iharanira Demokarasi ya Congo n’ahandi, ibyo bibazo biracyahari ariko uko bihari hari n’ingamba nyinshi cyane zo kugerageza kubikemura”

Gen Kabarebe yifashishe urugero rw’imitwe irwanira mu Burasirazuba bwa Congo irimo n’irwanya u Rwanda, yavuze ko ikibazo cy’umutekano muke kigenda kigabanuka bikaba bitanga icyizere cy’uko umugabane wa Afurika uzagira amahoro.

Ati “Uko imyaka yagiye igenda, ni ko ikibazo kigenda kigabanuka, ntabwo cyiyongera cyane ahubwo kigenda kigabanuka, abitwaje intwaro bagenda bacika intege".

Yakomeje agira ati “Wahera ku barwanya u Rwanda, uko bari bameze mu 1996 kugeza mu 2000 bageraga mu bihumbi 300, ubungubu wababarira ku mitwe y’intoki ni abantu batarenga 500 kandi nabo badafite imbaraga, badafite ishingiro ubona amaherezo ari uko imbaraga zabo zizashira burundu kurusha uko ziziyongera kuko nta n’ikigaragaza ko zakwiyongera".

Mu mwaka wa 2013 nibwo abakuru b’ibihugu bya Afurika na Guverinoma zigize Umuryango wa Afurika Yunze Ubumwe bemeje gahunda yo guhagarika Intambara ku Mugabane wa Afurika yiswe “Silence The Guns”, bitarenze umwaka wa 2020.

Gen Kabarebe asanga ikibazo cy'umutekano muri Afurika kigenda kigabanuka ahereye ku rugero rwo muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .