00:00:00 IGIHE NETWORK KN KINYARWANDA EN ENGLISH FR FRANCAIS

Congo yishyuye akayabo kugira ngo ihabwe urubuga rwo guharabika u Rwanda mu nama mpuzamahanga

Yanditswe na Mwene Ndabarasa
Kuya 7 Ukwakira 2022 saa 08:33
Yasuwe :

Imvugo z’uko u Rwanda rutera inkunga M23 ndetse rukaba rugambiriye guhungabanya umutekano wa Repubulika Iharanira Demokarasi ya Congo ntizikiva mu kanwa k’abayobozi b’iki gihugu, kugeza nubwo aricyo kintu bashyira imbere mu nama mpuzamahanga zose bitabira.

Ibikorwa nk’ibi byongeye kugaragara mu Nteko ya 41 y’Umuryango Mpuzamahanga ushinzwe iby’indege za gisivili (ICAO), iteraniye i Montreal muri Canada.

Muri iyi nama yatangiye ku wa 27 Nzeri 2022 ikazarangira ku wa 7 Ukwakira, Repubulika Iharanira Demokarasi ya Congo ihagarariwe na Minisitiri w’Ubwikorezi n’Itumanaho, Chérubin Okende; Umujyanama wa Minisitiri w’Intebe, Ewing Yanda; Umuyobozi w’Ikigo gishinzwe ingendo zo mu kirere, RVA, n’abandi bafite aho bahuriye n’ubwikorezi bwo mu kirere.

Intego nyamukuru y’iyi nama ni ukurebera hamwe icyerekezo cy’ibihugu binyamuryango bya ICAO mu bijyanye n’ubwikorezi n’ingendo z’indege za gisivile, uko hakongerwa imbaraga mu kurwanya imyuka ihumanya ikirere ikomoka ku bijyanye n’ingendo zo mu kirere ndetse no gutora ubuyobozi bushya bw’uyu muryango, igikorwa cyabaye ku wa 4 Ukwakira 2022.

Minisitiri w’Ubwikorezi wa RDC, Chérubin Okende ni umwe mu bahawe ijambo muri iyi nteko ngo bagaragaze uko babona ibikorwa by’uyu muryango.

Chérubin Okende mu ijambo rye yamaganye icyo yise ubushotoranyi bw’u Rwanda ku gihugu cye avuga ko buhungabanya amasezerano mpuzamahanga agenga iby’indege za gisivile yashyiriweho umukono i Chicago mu 1944.

Ati “Ubushotoranyi bukorwa n’u Rwanda rushyigikiwe na bimwe mu bihugu bikomeye biri muri iri huriro bugira ingaruka kuri RDC. Ni ibikorwa bibi mu buryo bweruye bigira uruhare mu guhungabanya umutekano wo mu Karere n’umutekano wo mu kirere.”

Yakomeje avuga ko ubu bushotoranyi bw’u Rwanda aribwo bwatumye igihugu cye gihagarika imikoranire cyari gifitanye n’u Rwanda mu by’ingendo zo mu kirere.

Ati “Mbabajwe no kubamenyesha ko bitewe n’ubukana bw’ubushotoranyi bwa hato na hato, amahame y’ubucuti, imikoranire inoze n’ubufatanye bigenwa na ICAO, Repubulika Iharanira Demokarasi ya Congo yahagaritse amasezerano yose yari ihuriyeho n’u Rwanda.”

Muri Gicurasi 2022 nibwo RDC yafashe umwanzuro wo guhagarika ingendo za RwandAir zigana muri iki gihugu.

RwandAir yajyaga i Goma ku wa Mbere no ku wa Gatatu guhera ku wa 15 Ukwakira 2021. Ni mu gihe i Kinshasa ho yajyagayo Ku wa Mbere, ku wa Kabiri, ku wa Gatatu, ku wa Gatanu no ku wa Gatandatu na Lubumbashi kuwa Mbere no kuwa Gatatu.

Congo ubwo yafataga icyemezo ntiyigeze igaragaza ibimenyetso simusiga by’ibyaha ishinja u Rwanda byo gushyigikira M23.

Yishyuye akayabo kugira ngo ihabwe ijambo

Ubwo iyi Nteko ya ICAO yateranaga, RDC yari imaze imyaka 10 idatanga umusanzu kugeza aho yari yarafatiwe icyemezo cy’uko itazajya yemererwa gutora cyangwa ngo igire ijambo ihabwa mu nama iyo ariyo yose y’uyu muryango.

Imibare ya ICAO igaragaza ko ubwo iyi Nteko yajyaga guterana RDC, yari ifite ibirarane bya 216.212$ (arenga miliyoni 216 Frw).

Amakuru avuga ko kugira ngo Congo izahabwe umwanya wo kuvuga muri iyi nama yemeye kwishyura ibi birarane.

RDC yiyemeje ko ku wa 29 Ukwakira 2022 izishyura ibirarane by’imisanzu y’imyaka irenga 10 byayamburaga uburenganzira bwo gutora no gufata ibyemezo mu nama za ICAO.

Imaze kwizeza gutanga imisanzu yayo, byari byitezwe ko ijambo iza kuvuga riza kuba ryibanda ku iterambere ry’Urwego rw’Ubwikorezi bwayo ariko yo yikije cyane ku kuvuga uburyo ibangamiwe n’u Rwanda.

Ibyakozwe na Minisitiri Okende ntibitandukanye n’ibyo Perezida we, Tshisekedi aherutse kuvugira mu Nteko Rusange ya Loni i New York. Abasesenguzi bakerekana ko RDC yiteguye gukora ibishoboka byose mu gusiga icyasha u Rwanda, ari nabyo byatumye yishyura akayabo ngo yongere ihabwe umwanya mu nama ngari nka ICAO.

Kugeza ubu Repubulika Iharanira Demokarasi ya Congo ikomeje gushinja u Rwanda, gushyigikira M23 nubwo mu bihe bitandukanye rwagiye rugaragaza ko nta nyungu rufite mu guhungabanya umutekano w’iki gihugu.

Mu kiganiro Perezida kagame yagiranye na RBA muri Nyakanga 2022, yavuze ko ikibazo cya M23 yubuye imirwano muri RDC gihera mu mateka ya kera.

Yavuze ko mu gukemura ikibazo cya M23 mu 2012 hakozwe ikosa ryo kwibwira ko umuti wacyo uzanyuzwa mu nzira za gisirikare mu gihe u Rwanda rwagaragazaga ko igikwiye ari ukwitabaza inzira za politiki.

Yavuze ko bidakwiye ko abantu bamwe bafatwa nk’aho atari abaturage b’igihugu kuko n’iyo bibaye bituma abantu bashaka guharanira uburenganzira bwabo. Yagaragaje ko kuvuga ko Abanye-Congo bavuga Ikinyarwanda ari Abanyarwanda ari ukwibeshya.

Perezida Kagame yavuze ko ubwo Félix Antoine Tshisekedi yatorwaga, ikibazo cya M23 bagiye bakiganiraho cyane ku buryo hari n’intumwa ze zagiye ziza mu Rwanda kureba abarwanyi b’uyu mutwe bari barahahungiye bakizezwa ko bagiye gukemura ikibazo cyabo.

Yavuze ko ubwo M23 yajyaga kubura imirwano, u Rwanda rwari rwaraburiye Congo rushingiye ku makuru rwari rufite mu bijyanye n’ubutasi.

Perezida Kagame yavuze ko ibirego RDC ishinja u Rwanda byo gushyigikira Umutwe wa M23 nta shingiro bifite ahubwo iki gihugu gishyigikira FDLR ihungabanya umutekano w’u Rwanda.

Minitiri w’Ubwikorezi n’Itumanaho muri RDC, Chérubin Okende yagaragaje u Rwanda nk'urwitwazo mu nama ya ICAO
Mu Nteko ya 41 y’Umuryango Mpuzamahanga ushinzwe iby’indege za gisivili (ICAO) Repubulika Iharanira Demokarasi ya Congo yari ihagarariwe n'itsinda rinini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .