00:00:00 IGIHE NETWORK KN KINYARWANDA EN ENGLISH FR FRANCAIS

Agaba yaretse akazi ka Leta, yiyemeza guhangana n’ibiyobyabwenge byugarije urubyiruko

Yanditswe na Uwase Kevine
Kuya 6 Mutarama 2023 saa 04:34
Yasuwe :

Ibiyobyabwenge bikomeje gusya bitanzitse mu rubyiruko rw’u Rwanda ndetse ibimenyetso bica amarenga ko hatagize igikorwa vuba, mu minsi mike igihugu gishobora kuzaba gihanganye n’ingaruka zabyo zidasanzwe.

Umwaka ushize Urwego rw’igihugu rw’Ubugenzacyaha rwashyize hanze imibare y’abafunzwe bakekwaho ikoreshwa ry’ibiyobyabwenge, aho mu myaka ine yari ishize bageze ku bihumbi 25, biganjemo urubyiruko ruri ku kigero cya 58 %.

Ni mu gihe ibitaro bya Ndera bizwiho kwakira abafite ibibazo byo mu mutwe, naho urubyiruko ruza ku isonga kuko hejuru ya 70 % by’ababigana ari urubyiruko kandi rufite ibibazo bikomoka ku ikoreshwa ry’ibiyobyabwenge.

Agaba Bruno ni umwe mu batewe impungenge n’ubwo bwiyongere bw’ikoreshwa ry’ibiyobyabwenge mu rubyiruko. Uyu mugabo yahoze ari umukozi mu kigo cy’Igihugu cy’itangazamakuru , afata umwanzuro wo kureka akazi, akajya gutanga umusanzu we mu guhangana n’iki kibazo.

Kuri ubu Agaba ni umwe mu bashinze umuryango Purpose Rwanda umaze imyaka isaga itanu, ufite mu nshingano kwita ku rubyiruko by’umwihariko urwasaritswe n’ibiyobyabwenge ndetse n’izindi ngeso mbi.

Mu kiganiro na IGIHE, yavuze ko kureka akazi byari umwanzuro ugoye ariko wari ukwiriye kubera ejo hazaza h’igihugu.

Ati ““Mbere yo kujya gukora ibijyanye no gufasha ababaswe n’ibiyobyabwenge, nakoraga mu rwego rw’igihugu rw’itangazamakuru nk’umujyanama w’umuyobozi mukuru. Ni akazi kansabye imbaraga nyinshi kugira ngo nkareke njye gukora ibyo nkora ubu, ariko urareba ukibaza ati niba atari injye, ni nde wundi wafasha aba bantu?”

Uyu muryango umaze gufasha abantu 1600 bari barabaswe n’ibiyobyabwenge kandi 400 bamaze kubireka, bagasubira mu buzima busanzwe kwiteza imbere.

Agaba yavuze ko akenshi urubyiruko ruri kwishora mu biyobyabwenge kubera kwigana imico y’ahandi.

Ati “Twita ku rubyiruko cyane cyane kuko aribo usanga bafite ibabazo byo guhura n’ibiyobyabwenge, bitewe n’amafilime bareba, imico mvamahanga bisanisha nayo bakumva ari ibintu bigezweho nyamara batazi ingaruka zabyo.”

Yakomeje agira ati “Uburyo dukoresha kugira ngo bareke ibiyobyabwenge harimo kubigisha intego y’ubuzima, kwisobanukirwa akamenya uwo ari we, ubujyanama ku buzima bwe, kuvurwa ku bagize ibikomere ku mubiri, mu mutwe n’ibindi.”

Agaba yavuze ko guhashya ibiyobyabwenge n’ingaruka zabyo ku gihugu, bikwiriye kuba inshingano za buri wese, kuko ari ikibazo gituruka ku kudohoka kw’abantu benshi.

Ati “Ikibazo cy’abacuruza ibiyobyabwenge kiracyari ingorabahizi, kuko biragora kuba wakiza bamwe abandi bagakomeza kubibacuruzaho kandi bihishe tutabasha kumenya aho baherereye.”

Guverinoma y’u Rwanda yashyizeho amategeko akakaye ahana icuruzwa n’ikoreshwa ry’ibiyobyabwenge ariko biranga bigakomeza gukwirakwizwa.

Imibare ya RIB igaragaza ko mu 2018/19 abakurikiranyweho icyaha cyo gukora, guhinga, guhindura, gutunda, kubika, guha undi, kugurisha mu gihugu ibiyobyabwenge cyangwa urusobe rw’imiti ikoreshwa nka byo mu bari 6067.

Mu 2019/2020 iyi mibare yarazamutse igera kuri 6759. Mu 2020/2021 abakurikiranywe bagabanutseho gato bagera kuri 5733. Umwaka wa 2021/2022 aba bantu bongeye kuzamuka kuko hafashwe 6608.

Agaba avuga ko hagikenewe ubushakashatsi n’ingamba nyinshi kugira ngo ibi bihagarare.

Ati “Dufite intego yo gukomeza gukora ubushakashatsi ku bijyanye no gukumira ibiyobyabwenge, gukora ubukangurambaga n’ibindi.”

Inzego zitandukanye zigaragaza ko uretse kwangiza imitekerereze y’ukoresha ibiyobyabwenge, binagira ingaruka ku buzima bwe, iterambere ry’igihugu n’ibindi.

Agaba avuga ko ikibazo cy'ibiyobyabwenge mu rubyiruko gihangayikishije, ari nayo mpamvu yiyemeje gutanga umusanzu we
Hari abagiye bafashwa kubona amacumbi kubera ubuzima bubi bari babayeho
Purpose Rwanda ifite intego zo gufasha abatishoboye n'abandi bafite ibibazo bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .