Uko Afurika igaragara mu mboni z’ibihugu by’u Burayi na Amerika n’impinduka ikeneye kwimakaza

Yanditswe na Dufitumukiza Salathiel
Kuya 20 Ukwakira 2020 saa 01:22
Yasuwe :
0 0

Mu migabane irindwi igize Isi, Afurika yakunze kugaragazwa nk’iciriritse ahanini kugera n’aho abitwa impuguke z’ahandi batanga ibitekerezo ku cyerekezo kiyikwiye nk’aho ba nyirayo badashoboye kuyitekerereza.

Afurika yabaye iciro ry’imigani, ihindurwa umukene uhora akeneye ubufasha [nyamara niyo ifite 30% by’umutungo kamere w’Isi], igitambambuga ndetse n’udashoboye kwirwanirira no kwitekerereza kuva mu myaka ya kera.

Byatumye Abanyaburayi bafata iya mbere bigabiza Afurika ahagana mu kinyejana cya 18, bihisha mu ruhu rwo kubwiriza ijambo ry’Imana, nyamara bafite intego nyamukuru yuzuye ukwikunda.

Gukomeza kwiyorobeka byarananiranye, bageza aho berura bashyiraho uburyo bwo gutekeka Afurika, buri gihugu [cy’u Burayi] kigafata ubuso kizategeka n’ikindi bikaba uko, Afurika iba ibaye isahani Abanyaburayi bariraho.

Ibyo byaje kurangira mu kinyejana cya 20, ariko hakomeza kugaragara uruhare rw’ibihugu n’abantu ku giti cyabo bo ku yindi migabane muri politiki ya Afurika, bikajyana no gutekerereza Abanyafurika no kubafatira imyanzuro mu buryo buziguye.

Nubwo bimeze bityo, bamwe mu batuye Afurika bemera kugirirwaho ibyo, abandi bagashyira hamwe ngo bahagarike ayo mateka mabi ndetse akigenderwaho, ariko bagakomwa mu nkokora n’ukudahuriza ku mugambi n’abakabitanzemo umusanzu.

-  Afurika ni yo ibereye gukorerwamo amasuzuma y’inkingo

Ubwo icyorezo cya Coronavirus cyugarije Isi cyakwiraga hose, hatangiye gutekerezwa icyakorwa ngo gihagarikwe kitararimbura imbaga [n’ubwo bisa n’ibitaragerwaho].

Ku ikubitiro, gushaka urukingo rwayo ni byo byatekerejwe nk’ikintu cyageza ku ntambwe ya kure yo guhangana n’iki cyorezo kimaze kugera ku barenga miliyoni 37.

Ibyo byagombaga gukorwa hubahirizwa amabwiriza y’inzego z’ubuzima arimo guhana intera, kwambara agapfukamunwa no gukaraba intoki.

Humvikanye kenshi amajwi n’ibitekerezo by’Abanyaburayi barimo muganga Jean Paul Mira na Camille Locht, bavuga ko mu gihe cy’amasuzuma y’inkingo zizakorwa mu kurwanya icyorezo “Afurika ni yo ibereye gukorerwamo ayo magerageza.”

Aba baganga batanze urwitwazo ko muri Afurika ari ho hari ubuvuzi buciriritse, hatambarwa udupfukamunwa ndetse hatari uburyo buboneye bwo kwita ku barwayi barembye burimo kubongerera umwuka.

Ibitekerezo byabo byamaganiwe kure n’abantu benshi barimo n’abayobozi b’imiryango ikomeye bashyira mu gaciro ndetse n’ab’Abanyafurika.

Umuyobozi w’Ishami ry’Umuryango w’Abibumbye ryita ku Buzima, OMS, Umunya-Ethiopia Dr Tedros Adhanom Ghebreyesus yagize ati “Afurika ntishobora kuba kandi ntizigera iba isuzumiro ry’urukingo na rimwe.”

Dr Tedros yavuze ko iyo ari “imitekerereze ya gikoloni” ndetse itari ikwiye kuba ikigaragara mu kinyejana cya 21.

Abanyabigwi mu mupira w’amaguru barimo Umunya- Côte d’Ivoire Didier Drogba] na Samuel Etoo wo muri Cameroun na bo bateye utwatsi ibitekerezo by’abo baganga b’Abafaransa.

Drogba ati “Iri ni irondaruhu rikabije kandi riteye agahinda gakomeye, kubona mufata Abanyafurika nk’ingurube”; naho Samuel Eto’o Fils mu ijambo rimwe ryuje intimba yabasubije ko ari “abicanyi.”

Uretse n’Abanyafurika, Umunyamabanga wa Mbere w’Umutwe wa Politiki uharanira ukwishyira ukizana kwa rubanda mu Bufaransa (Socialist Party), Olivier Faure yavuze ko “igitekerezo cy’abo baganga si ugushyushya Abanyafurika mu mutwe, ahubwo ni irondaruhu.”

Yagize ati “Afurika si laboratwari y’u Burayi, ikindi si n’imbeba [ni zo zikorerwaho ubushakashatsi bw’imiti y’indwara z’abantu kenshi]’’.

Nubwo nyuma yo kubona ko ibitekerezo byabo bivugirijwe induru n’abantu banyuranye, umwe muri aba bagabo yasabye imbabazi, byagaragaje ko Afurika hari ukuntu ufatwa mu ntekerezo z’Abanyaburayi.

Nyamara abarimo Umushumba wa Kiliziya Gatolika ku Isi, Papa Francis, wihebeye inyigisho zikangurira abantu gufatanya no gukundana, yakomeje gusaba ko mu gihe urukingo rwa Coronavirus rwazaba rwemejwe burundu, Afurika yazafashwa kurubona byoroshye.

Yabivugiye ko Afurika ifite ubuvuzi bukiri hasi ndetse abenshi mu bayituye bakaba bafite amikoro make ku buryo bishobora kuzabagora kurwigondera.

-  Abanyafurika bagomba guhitirwamo ubuyobozi bubakwiriye

Intambara zibera hirya no hino muri Afurika zisemburwa n’Abanyafurika bararwanira ubutegetsi, ndetse hari abasesenguza ko ibihugu by’u Burayi na Amerika ari byo bizishoza ku nyungu zabyo bwite.

Libya nka kimwe mu bihugu bya Afurika bikungahaye ku mutungo kamere ushingiye ku bikomoka kuri Peteroli, ni rumwe mu ngero nziza rwasobanura uruhare rw’u Burayi na Amerika mu kaduruvayo karangwa mu miyoborere y’ibihugu bya Afurika.

Kuva OTAN [umutwe ugizwe n’ingabo z’Abanyamerika n’Abanyaburayi] yakura uwari perezida wa Libya, Col Muammar al-Gaddafi, ku butegetsi mu 2011; imyaka icyenda irihiritse nta mutekano urangwa muri iki gihugu.

Abanya-Libya bizezwaga guhabwa ibyo Gaddafi atabagejejeho, abatarapfuye cyangwa ngo babure ababo bavuye mu byabo, abandi bararya utwabo imitima ihagaze, kubera ubwumvikane buke hagati y’abagombaga gusimbura Gaddafi bigabyemo ibice bibiri bihora bihanganye hakoreshejwe ingufu za gisirikare.

Nyamara intwaro n’ibindi bikoresho bya gisirikare bihakoreshwa biri gutangwa na bimwe mu bihugu by’i Burayi na Amerika. Bimwe byahisemo gufasha uruhande rumwe ibindi urundi, ku nyungu zabyo bwite zirimo no gushaka gusahurira mu nduru umutungo kamere wa Libya.

-  Afurika ifatwa nk’igikoresho cy’u Burayi na Amerika

Inzobere mu bya Politiki akaba n’Umwarimu muri Kaminuza y’u Rwanda, Dr Ismael Buchanan, avuga ko bimwe mu bihugu by’u Burayi na Amerika “bibona Abanyafurika nk’ibikoresho byabo”, mbese babwira ibyo bashaka igihe bashakiye.

Atanga urugero nko mu gihe cy’amatora, aho usanga bavuga ko muri Afurika nta demokarasi ihaba “mbese bibonamo ko [ari bo] batugize.”

Ati “Wabonye ibyabereye muri Amerika vuba aha hagati ya [Joe] Biden na [Perezida] Trump biyamamaza [ku mwanya w’umukuru w’Igihugu], baratukana ukagira ngo ni abashumba. Twe aha muri Afurika wakora akantu gato [ngo] nta burenganzira bwa muntu tugira.”

“Bikwereka neza [ko] Afurika itihaye agaciro ishaka yasubira mu bukoloni nka kera. Mbese muri make bayifata nk’aho ari bo bayitunze.”

Dr Buchanan avuga ko atari ibihugu byose byo kuri iyo migabane bibona Afurika muri iyo sura, kuko hari ibyatangiye ubufatanye nayo cyane cyane mu bucuruzi.

Yavuze ati “Si ibihugu byose byo muri kariya gace bidufata kimwe […] Hari abamaze kubonamo Afurika nk’umufatanyabikorwa, bitewe n’uko hamwe na hamwe Afurika igenda yihagararaho. Urabibona Afurika cyangwa bamwe mu bayobozi bayo batumirwa mu nama zimwe na zimwe zikomeye zifata ibyemezo, za G8, G20.”

“Kuzana inama zikomeye [CHOGM iteganyijwe kubera mu Rwanda] n’izindi muri Afurika, byerekana uburyo ibihugu bimwe bitangiye kuyizera nk’umufatanyabikorwa.”

Dr Buchanan abona ko n’ubwo inzira ikiri ndende, ibyiza biriho nabyo byerekana uko Afurika ihagaze mu ruhando mpuzamahanga.

-  Impamvu Afurika ifatwa nk’iciriritse

Mu mpamvu zitandukanye zituma Afurika ikunze gufatwa nk’iri hasi mu ndorerwamo z’u Burayi na Amerika, Dr Buchanan asanga biterwa ahanini n’impamvu eshatu.

Ati “Hariho ababona Afurika muri ya shusho y’ubukene, iy’ibibazo cyangwa Afurika yakoronijwe; hari n’abayibona nk’umugabane ufite ubukungu buhambaye bagashaka uburyo bayivomamo ubwo bushobozi.”

Gusa Dr Buchanan agasanga “hari n’abandi batazi neza cyangwa badasobanukiwe amateka ya Afurika n’uko iteye.”

-  Ibibazo biba muri Afurika n’ahandi birahari

Nubwo Afurika ikunze kurangwamo ibibazo birimo iby’inzara, indwara n’intambara ndetse n’imiyoborere idahwitse mu bihugu bimwe na bimwe, si wo mugabane wonyine ubyihariye ku buryo byatuma uhabwa isura mbi.

Dr Buchanan avuga ko “Uburyo Afurika bayifatamo buratandukanye rwose” cyane ko hamwe na hamwe mu bihugu bya Afurika usanga koko hari ibibazo.

Yakomeje ati “Ntibivuze ko abo [u Burayi na Amerika] bafata Afurika gutyo badafite ibibazo biruta ibyo Afurika ifite.”

Iyi nzobere mu bya politiki isanga hari igihe ubona hamwe na hamwe Afurika ibyitera, ariko uko ifatwa byo bigakabirizwa.

Yagize ati “Akenshi ubona abandi uko badufata barenza kamere, ku buryo wibaza niba uko Abanyafurika bafatwa na bo ari abantu cyangwa inyamaswa.”

Dr Buchanan avuga ko “nubwo usanga Afurika igifite inzira ndende muri uwo murongo wo kwerekana neza ko ibiyivugwaho atari byo koko”, uko Abanyafurika bafatwa bidakwiriye.

-  Afurika isabwa iki ngo ihindurirwe isura?

Dr Buchanan asanga kugira ngo isura Afurika ihabwa ihinduke, hakenewe ubufatanye mu bice bitandukanye, bikajyana no kwihesha agaciro mu byo ikora byose.

Abona kandi Afurika ikeneye kumva neza ibihe by’impinduka bigezwemo; ati “Hatabayeho guhindura imyumvire, imikorere, kuzamura ubukungu mu Banyafurika ndetse na Afurika nk’Umugabane, nta wundi uzaza ngo abikore uretse Abanyafurika ubwabo.”

Ibyo abona ko byafasha mu guhindura Afurika birimo kuvugurura imikorere ku ruhande rw’abayobozi (guhangana na za ruswa, imiyoborere myiza, kureka igitugu no kwikanyiza no kugendera ku mahame y’itegeko nshinga).

Yemeza ko kuzamura ubukungu (kwiteza imbere, gufatanya n’abandi mu bikorwa bitandukanye) bizafasha Afuka kwihagararaho mu ruhando mpuzamahanga.

Ibyo byose ariko Dr Buchanan akavuga ko bigomba kugendana no “kugabanya imfashanyo [Afurika] igenerwa n’amahanga,” cyane izigaragara ko zitari ngombwa, zitagize icyo zimariye Abanyafurika.

Ku rundi ruhande ariko Afurika iratanga icyizere cy’impinduka mu gihe yakomereza ku rwego igezeho yiyubaka ndetse igashyiramo imbaraga.

Dr Buchanan ati “Afurika ni umugabane wihuta mu bukungu yagombye gufatira aho [igeze] kandi byashoboka. Turi mu Isi igendera kuri ikoranabuhanga, Afurika igomba gukataza muri icyo gice, ndetse aho abandi badusize igakuba kabiri.”

Ashimangira ko ubukungu, umutekano, imiyoborere n’ibindi bice byatangiye kugaragaramo impinduka, ku buryo yemeza ko bikomeje bityo “nta kabuza abayifata [Afurika] ukundi bahindura umuvuno, uko bayifataga bigahinduka bakayibonamo Afurika iri ku murongo umwe n’indi migabane.”

Ibyo ariko ngo bikazaterwa n’uko abayobozi n’Abanyafurika muri rusange bazabyitwaramo.

Inzobere mu bya Politiki akaba n’Umwarimu muri Kaminuza y’u Rwanda, Dr Ismael Buchanan, yavuze ko Afurika ifite ubushobozi bwo kwiteza imbere mu gihe abayobozi bahinduye imyumvire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .