Iri jambo ry’Imana riboneka muri Yesaya 9:5 niryo ryari intero ku mugoroba wo ku wa Kabiri mu nsengero zitandukanye na Kiliziya ahateguwe ibitaramo n’izindi gahunda zitandukanye zerekeye guhimbaza umunsi abakirisitu bizihizaho ivuka rya Yesu/Yezu.

Umugoroba wa tariki 24 Ukuboza 2019 wasize benshi batangiye kuganura ku byishimo bya Noheli.

Mu Mujyi wa Kigali wasangaga intero ari imwe mu ndirimbo n’ubundi buryo bwo kuramya, guhimbaza cyangwa gusingiza, aho baba bavuga ku gutegura imitima Nyagasani avukiramo.

Abantu b’ingeri zose nta we uba wasigaye kuko ubundi ari umunsi uhuza kandi ukubaka urukundo hagati y’abana n’ababyeyi. Ibyo bituma usanga bose mu majwi meza baririmba, bishimye kandi bafite akanyamuneza ka Noheli.

IGIHE yazengurutse muri zimwe mu nsengero ifata amafoto y’abitabiriye ibitaramo ku munsi ushyira uwo Umukiza w’Isi yavukiyeho.

Ni ibihe byihariye ku bataramiye muri ADEPR Remera, Paruwasi ya St Famille, Zion Temple CC Gatenga kwa Gitwaza no muri Evangelical Restoration Church i Masoro.

Muri ERC Masoro, habereye gitaramo cyiswe “Christmas Eve Shout of Joy”cyateguwe n’abaramyi batandukanye basengera muri ERC, cyabwirijwemo Apôtre Ndagijimana Yoshua Masasu.

Abaramyi barimo Serge Iyamuremye, Christian Irimbere, Tuyiringire Arsène [Tuyi], Milca na Gaelle bari bakereye kwinjiza abantu mu buryohe bwa Noheli.

Muri Kigali, hafi ya hose ntaho utasanga imitako igaragaza imyiteguro ya Noheli, yatangiye gushashagirana hagati mu Ukuboza. Amatara ya Noheli ndetse n’ibirugu, bishushanya uburyo uyu mucunguzi yavutse biri hose.

Umunsi wa Noheli urangwa n’ubusabane budasanzwe bw’ababyeyi n’abana. Ariyo mpamvu uyu mugoroba baba batangiye kubatembereza, kubaha umwanya mu nsengero no kubagenera impano zitandukanye.

Ibitaramo bitandukanye n’indirimbo ziririmbirwamo ku 25 Ukuboza na mbere ho gato usanga intero ari imwe “Yesu yatuvukiye”. Ni mu gihe na none abakirisitu benshi baba basabwa gutunganya imitima yabo ngo Yesu azabone aho avukira.

Mu muco wo gusabana w’Abanyarwanda usanga n’abatizera Noheli, uwo munsi ubabera umunsi mwiza wo guhana impano no gusura imiryango dore ko haba hatanzwe ikiruhuko.

Ijambo Noheli rikomoka ku ijambo ry’Igifaransa “Noël”, naryo ryakomotse mu Kilatini “Natalis” bivuze “umunsi w’amavuko/isabukuru y’amavuko”. Mu Cyongereza Noheli yitwa “Christmas”.

Ibihumbi by’Abanyarwanda batuye mu Mujyi wa Kigali bitabiriye ibitaramo bibinjiza muri Noheli

Umushumba w’Itorero Zion Temple, Apôtre Dr Paul Gitwaza, yabwirije abitabiriye igitaramo cyabereye mu Gatenga

Wari umwanya wo kuramya kuzuye...

Abakirisitu benshi bahimbaje igitaramo kibanziriza Noheli ari benshi

Pasiteri Emmanuel Gberekpee ari mu batanze ijambo rifungura mu gitaramo cyabereye muri Zion Temple

Kiliziya ya St Famille yabereyemo igitaramo kibanziriza Noheli, abakirisitu bazirikanaho ivuka rya Yezu

Muri Evangelical Restoration Church i Masoro habereye igitaramo gikomeye

Muri ADEPR Remera abana bahawe rugari ku munsi ubanziriza ivuka rya Yesu. Berekanye impano mu kuririmba n'imikino itandukanye

Hasomwe igitambo cya Misa muri Kiliziya zitandukanye

N'abanyamahanga na bo bahimbaje ibitaramo bibanziriza Noheli

Bateze amatwi ubutumwa buvuga ku ivuka rya Yesu

Ahantu hatandukanye hatatswe imitako yo kwishimira iminsi mikuru isoza umwaka

Amafoto: Muhizi Serge