00:00:00 IGIHE NETWORK KN KINYARWANDA EN ENGLISH FR FRANCAIS

Ubuzima bwarahindutse: Imibereho y’abatishoboye batujwe mu mudugudu w’icyitegererezo i Nyaruguru

Yanditswe na Prudence Kwizera
Kuya 23 Ukwakira 2022 saa 09:34
Yasuwe :

Amezi ane agiye gushira imiryango 48 igizwe n’abantu 164 itujwe mu mudugudu w’icyitegererezo wa Munini, kugira ngo babe ahantu hatekanye kandi bayoboke ibikorwa bibateza imbere.

Barimo abari bamaze igihe basembera batagira aho kuba, abari bafite amacumbi ashaje n’abari batuye mu manegeka.

Uwo mudugudu ufite isoko ryo gucuruza no guhahiramo, urugo mbonezamikurire y’abana, agakiriro gakorerwamo ibikorwa by’imyuga n’ubukorikori, n’igice cyahariwe ubworozi bw’ingurube kuko ari zo bahisemo nk’amatungo atanga umusaruro vuba.

Hari kandi ikigo cy’ishuri cyigamo abana 1630 mu mashuri y’inshuke, abanza n’ayisumbuye. Iryo shuri rifite ibyangombwa byose bifasha abana kwiga neza no gufata amafunguro.

Hafi yaho hari n’ikigo cy’urubyiruko, aho rutorezwa ibikorwa bitandukanye birwubaka bikubaka n’igihugu ndetse n’imyitozo ngororamubiri.

IGIHE yasuye imwe mu miryango yatujwe muri uwo mudugudu, ireba uko ubuzima bwabo bwahindutse nyuma y’amezi hafi ane.

Nyirarukundo Adela w’imyaka 43 y’amavuko, afite abana batandatu arera wenyine kuko ni umupfakazi. Avuga ko nyuma yo kuvanwa aho yacumbikaga agahabwa inzu nziza mu Mudugudu wa Munini, ubuzima bwe bwahidutse.

Yagize ati "Ubu ndaryama ngasinzira, ndaryama nareba aho ndyamye nkavuga nti ubuzima bwarahindutse. Nahawe inzu irimo ibikoresho byose kandi aho nacumbikaga nta gikoresho kizima nagiraga."

Bimwe mu bikoresho biri mu nzu ye ubu ni ibitanda n’amagodora yo kuryamaho n’amashuka; amasafuriya; amasahani; radiyo; televiziyo; intebe n’ameza n’ibindi.

Mbere yari atunzwe no guca inshuro kugira ngo abana be babone ibibatunga.

Yakomeje ati "Naryaga mvuye guca inshuro, n’ubu nca inshuro ariko nkagira aho ntaha. Aho bwahindutse [ubuzima] ni uko nca inshuro nkagira aho ntaha nkarya ntawe umpagaze hejuru, n’iyo naburara nkavuga nti aha ni iwanjye."

Uyu mubyeyi bigaragara ko imibereho ye yabaye myiza ugereranyije na mbere ataratuzwa, avuga ko ahingira amafaranga 1200 Frw ku munsi akayahahamo ibyo gutekera abana kandi akababonera isabune n’imyambaro.

Yishimira ko abana be basigaye biga kandi mbere bamwe bari baravuye mu ishuri.

Ati "Njyewe ubuzima bwahindutse bwiza, ubu mfite aho ntaha; umuntu wampaye inzu n’ibikoresho ndamushimira cyane. Perezida Paul Kagame ndamushimira cyane yaranyubakiye ankura mu bwigunge, ankura mu buzima bwo gusembera ubu ndataha iwanjye, yampaye amazi ampa n’amashanyarazi, ubu ndakora ku rukuta mu nzu hose hakabona.”

Musabyimana Alphonsine w’imyaka 35 y’amavuko na we yahawe inzu mu Mudugudu wa Munini irimo ibikoresho byose.

Uyu mubyeyi w’abana bane avuga ko imibereho ye n’umuryango we yahindutse, bitewe no gutuzwa ahantu heza.

Ati “Ikintu cyahindutse ni uko twari ducumbitse tutagira ahantu hacu ho kuba ariko ubu iyi saha ndabyuka mu gitondo nkagenda nagaruka nkakingura, ntihagire umuntu uza gukomanga ku idirishya ngo ambwire ngo ‘nsohokera mu nzu’. Iyi saha nta muntu ubimbwira, ni yo mpamvu ngutuma ngo unshimire Perezida Paul Kagame ngo urakagira umugisha n’amahoro.”

Mbere yari atunzwe no guca inshuro, aho ahingira umuntu akamwishyura amafaranga 1000 Frw kandi n’ubu nibyo akora.

Ati “Ubu ngubu nabwo inshuro ndayica; ntabwo nareka guca inshuro kandi n’ubundi ngomba kubaho. Turagenda tugahingira umuntu akaduha igihumbi tugahaha tukagaburira abana.”

Uwimana Eugenie w’imyaka 40 y’amavuko afite abana bane. Mbere yabaga mu Murenge wa Kibeho atagira inzu, kuko aho yabaga akodesha yahishyuraga imibyizi yo guhinga.

Ati “Naracumbikaga nabona amafaranga nkishyura cyangwa nabura ubushobozi nkahingira umuntu akampa aho kurara.”

Nyuma yatunguwe no guhabwa inzu mu Mudugudu w’Icyitegererezo wa Munini, ubuzima bwe burahinduka.

Ati “Njyewe byaranantunguye cyane kuko narahageze nsanga birandenze kuko nari maze igihe nsenga Imana nyisaba kubona aho kurara. Nasanze inzu irimo ibikoresho byose nsangamo n’intebe kandi ntaragira ikintu cyo kwicaraho.”

Yavuze ko kubera amaze igihe arwaye atabasha kujya guca inshuro ariko ubuzima bwe n’abana be butandukanye n’ubwo babagamo mbere batagira aho kuba.

Kugira ngo ababonere ibyo kurya, asubira mu gace yari atuyemo mbere, abagira neza bakamufasha.

Bafite ibyifuzo

Abatujwe mu Mudugudu w’Icyitegererezo wa Munini baganiriye na IGIHE bose bifuza kuva mu buzima bwo guca inshuro, bakagira ikindi bakora kibateza imbere.

Nyirarukundo Adela avuga ko akunda guhinga kandi yifuza kujya yihingira mu kwe.

Ati “Mbonye isambu nto yo guhinga nkabona n’igishoro najya nkodesha ubutaka nkahinga, abana banjye bakabona ibyo kurya bitabaye ngombwa ko njya guca inshuro.”

Musabyimana Alphonsine yavuze ko na we abonye ahantu ho guhinga nubwo haba hatoya ndetse n’amafaranga make y’igishoro, byamufasha gutera imbere.

Ati “Mbonye ahantu ho guhinga nkabona n’amafanga make nagenda nkakodesha n’ahandi nkahinga noneho icyo gihe ibyo guca inshuro nkabivamo nkajya mbona ibyo abana barya ntagiye guca inshuro.”

Uwimana Eugenie we yifuza gukora ubucuruzi buciriritse akava mu byo guca inshuro.
Ati “Njyewe mfite igishoro najya ndangura imboga n’imbuto nkacuruza nkiteza imbere. Ubuzima bwo guca inshuro ntabwo ari bwo tuzahoramo ngo tubusaziremo tuburage n’abana bacu.”

Ubuyobozi bwabahaye icyizere

Umuyobozi w’Akarere ka Nyaruguru Wungirije Ushizwe Iterambere ry’imibereho Myiza y’Abaturage, Byukusenge Assoumpta, yabwiye IGIHE ko bari gukora ibishoboka byose ngo imibereho yabo baturage ikomeze gutera imbere.

Yavuze ko hari amasambu babahaye hafi y’umudugudu yo guhingamo buri wese afite agace ke, kandi no kubona ifumbire bizaborohera kuko imirima iri hafi y’ibiraro by’ingurube zabo.

Ati “Ubu imiryango 29 yahawe amafaranga ibihumbi 100 Frw yo gutangiza umushinga uciriritse muri gahunda y’ inguzanyo zihabwa abatishoboye ku nyungu ntoya. Indi miryango ine nayo imaze gukora imishinga ngo ihabwe ayo mafaranga. Imiryango 14 na yo yahawe akazi muri gahunda ya VUP. Ubu buryo bwose ni ububafasha kwiteza imbere kuko bamaze no kwibumbira mu itsinda ryo kwizigamira.”

Byukusenge yavuze ko bagendeye ku mahirwe ari mu Karere ka Nyaruguru, batangiye gutanga akazi ku batuye muri uwo mudugudu haba muri VUP n’ahandi.

Yavuze ko bazakomeza kuganira nabo kugira ngo bumve ibyifuzo byabo babagire n’inama hagamijwe ko imibereho yabo itezwa imbere ndetse n’amatungo bahawe amaze kororoka.

Ati “Ubu ingurube zimaze kuba 225 zizabafasha gutera imbere mu mibereho yabo kuko ni amatungo akunzwe mu gace aba baturage batuyemo.”

Buri nzu muri uwo mudugudu igizwe n’ibyumba bitatu n’uruganiro, ubwiherero n’aho gukarabira.
Irimo ibyangombwa nk’ibiryamirwa, intebe, ameza, ibikoresho by’isuku, televiziyo, radiyo, na telefone igezweho ndetse na gaz yo gutekesha.

Abana babo barererwa mu rugo mbonezamikurire y'abana rwa Munini
Aha ni ho abana babo bashobora kuruhukukira igihe bari mu rugo mbonezamikurire rwa Munini
Inzu basigaye batuyemo mu mudugudu w'icyitegererezo wa Munini

<

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .