Ubuzima bushaririye bw’abangavu b’i Huye batewe inda imburagihe , bagatekereza kuzikuramo

Yanditswe na Prudence Kwizera
Kuya 25 Gashyantare 2020 saa 08:57
Yasuwe :
0 0

Imibare y’abangavu batewe inda imburagihe mu Karere ka Huye igenda yiyongera uko umwaka utashye ari nako abo bakobwa bari munsi y’imyaka 18 bakomeza guhura n’ingaruka zo kubyara abakiri bato.

Mu mwaka wa 2018 abatewe inda ni 338 naho bazitewe mu 2019 bagera 669. Byabagizeho ingaruka zitandukanye mu mibereho n’ubuzima ndetse abenshi bibaviramo kuva mu ishuri.

Bamwe muri bo babwiye IGIHE ko bakimara kumenya ko batwite bananiwe kwiyakira batekereza kujya kwiyahura abandi batangira gucura imigambi yo kuzikuramo.

Bamwe muri bo bagera ku 100 babyaye bakiri bato bahurijwe hamwe n’ikigo giharanira uburenganzira no guteza imbere ubuzima, Health Development Initiative (HDI) baganirizwa ku burenganzira bwabo n’amategeko, bagirwa n’inama z’ubuzima.

Umwe muri bo wo mu Murenge wa Karama yavuze ko yatewe inda afite imyaka 15 y’amavuko ayiterwa n’umusore wamubwiraga ko amukunda. Gusa ngo akimara kumubwira ko atwite yahise amwihakana aramutererana.

Ati “Namubwiye ko yanteye inda mubaza uko twabigenza aranyihakana ngo ntabwo yakwemera ko ari iye. Nabuze uko mbigenza nshaka uko nakwiyahura cyangwa nkayikuramo ariko biranyobera. Nyuma Mama arabimenya arampumuriza anyitaho kugeza igihe mbyariye.”

Undi wo mu Murenge wa Kinazi avuga ko yatewe inda afite imyaka 16 y’amavuko bituma ava mu ishuri ndetse n’umugabo wayimuteye aramwigarika.

Avuga ko yafashe umwanzuro wo kwiyahura ariko ababyeyi baza kubimenya barabimutesha.

Ati “Njyewe numvaga inda ntayikuramo ahubwo nakwiyahura umwana tukajyana; nari nateguye kujya kugura ibini byica imbeba ngo mbirye nipfire ariko mbibwira umwana w’inshuti yanjye; ni uko yabibwiye ababyeyi bahita baza barabintesha bangira n’inama naho ubundi nari ngiye kwiyahura.”

Abangavu baganiriye na IGIHE bavuga ko gutekereza kwiyahura cyangwa gukuramo inda babitewe no kunanirwa kwakira ibyari bimaze kubabaho.

Umujyanama muri HDI, Mporanyi Theobald, yabwiye abo bangavu ko hari amategeko abarengera bityo badakwiye gutekereza gukuramo inda mu buryo butemewe cyangwa ngo bashake kwiyambura ubuzima.

Yabagiriye inama yo kutajya bihererana ibibazo bikomeye bishobora no kubatera kwiyahura ahubwo bakwiye kubiganiriza ababyeyi cyangwa abayobozi bakabafasha kubikemura.

Mporanyi yababwiye ko umwangavu watewe inda afite uburenganzira bwo kujya kwa muganga bakayimukuriramo ariko akajyayo yitwaje icyangombwa cy’amavuko kigaragaza ko afite imyaka iri munsi ya 18 kandi akajyayo inda atwite itarengeje amezi atanu.

Ati “Iteka rya Minisitiri w’Ubuzima rivuga ko iyo umwana yahohotewe agashaka gukuramo inda kabone niyo yaba atumvikanye n’umubyeyi we; icyifuzo cy’umwana n’icyo gishyirwa mu bikorwa.”

Yabasobanuriye ko gukuramo inda mu buryo butemewe n’amategeko ari icyaha abasaba kubyirinda.

Iyo uwakuriwemo inda imuhitanye uwamufashije afungwa burundu naho iyo bimuteye ubumuga buhoraho, uwamufashije afungwa hagati y’imyaka 20 kugeza kuri 25.

Ni bande bemerewe gukurirwamo inda na muganga?

Umujyanama muri HDI, Mporanyi Theobald, yavuze ko abo amategeko yemerera kujya kwa muganga bagakurirwamo inda igihe babyifuza, uwa mbere ari umwana watewe inda afite imyaka iri munsi ya 18 y’amavuko; uwa kabiri ari umukobwa cyangwa umugore wafashwe ku ngufu yarahohotewe.

Uwa gatatu yavuze ko ari uwatewe inda n’uwo bafitanye isano itarenze igisanira cya kabiri; uwa kane ni uwabanishijwe ku ngufu n’umugabo bagashyingiranywa ku gahato.

Undi ni umugore utwite ariko abaganga bakabona ko umwana atwite adashobora kuvuka kubera impamvu zitandukanye zijyanye n’ubuzima.

Yasobanuye ko Iteka rya Minisitiri w’Ubuzima ryerekana ko ukeneye iyo serivise yo gukurirwamo inda mu buryo bwemewe n’amategeko agana ikigo cy’ubuzima cyemewe na Minisitri y’Ubuzima cyangwa ibitaro bya Leta bigakorwa n’umuganga wize ufite imyamyabumenyi y’icyiciro cya kabiri cya kaminuza.

Mporanyi yavuze ko mu bagore bari bafunzwe mu 2018 abarenga 60% bahamwe n’icyaha cyo gukuramo inda mu buryo bunyuranyije n’amategeko ahanini bikaba byaratewe no kutamenya amategeko n’uburenganzira bwabo.

Imibare y’abangavu batewe inda imburagihe mu Karere ka Huye igenda yiyongera uko umwaka utashye
Bamwe muri aba bangavu bavuze ko bakimara kumenya ko batwite bananiwe kwiyakira batekereza kujya kwiyahura abandi batangira gucura imigambi yo kuzikuramo
Umujyanama muri HDI, Mporanyi Theobald, yabwiye abo bangavu ko hari amategeko abarengera bityo badakwiye gutekereza gukuramo inda mu buryo butemewe cyangwa ngo bashake kwiyambura ubuzima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .