Ubushakashatsi bwerekanye ibibazo byatewe n’imirimo yakozwe muri gahunda ya VUP

Yanditswe na Uwase Joie Clarisse
Kuya 12 Gashyantare 2020 saa 06:06
Yasuwe :
0 0

Ubushakashatsi bushya bwerekanye ko hari bamwe mu baturage basigiwe ibibazo birimo gusenyerwa inzu no kwangirizwa imyaka n’imirimo yakozwe muri gahunda izwi nka VUP, yashyizweho hagamijwe gukura abaturage mu bukene.

Ubu bushakashatsi bwakozwe n’Umuryango urwanya ruswa n’akarengane, Transparency International, ishami ry’u Rwanda bwamuritswe kuri uyu wa 11 Gashyantare 2020.

Ni ubushashatsi bwakorewe mu Turere 30 harebwa imishinga itanu muri buri karere, hakorwa isesengura ku bibazo byagaragajwe n’abaturage mu mishinga 150 yakorewe muri utwo turere hagati ya 2016 na 2019.

Bwerekanye ko kwimura abaturage ku mpamvu rusange hamwe na hamwe byagiye bikorwa hatubahirijwe amategeko. Bugaragaza ko 95% by’ababajijwe batuririye imihanda bavuze ko nta makuru ahagije bahawe ku bijyanye n’ingurane ubwo yajyaga gukorwa.

Ubu bushakashatsi bunagaragaza ko abaturage 92.4% batigeze bagira uruhare mu guhitamo ahantu hagomba gushyirwa ibikorwa rusange nk’imihanda.

Abakoze ubushakashatsi bavuga ko ibyo byatumye abaturage bagaragaza ko nubwo bishimiye imihanda yabegerejwe, batishimiye ingaruka byabagizeho zirimo gusigara mu manegeka, kudasigirwa inzira igera mu mihanda yakozwe, kuba nta makuru bahawe mbere bigatuma imyaka bahinze yangizwa kandi bari kuba barabyiteguye hakiri kare.

Umwe mu baturage bo mu Karere ka Rubavu watanze ubuhamya bwifashishijwe muri ubu bushashatsi, Ntibabaza Eliazard yagize ati “Hashize imyaka ibiri baransenyeye ntibampa ikintu na kimwe kandi iyo nzu basenye niyo yari intunze igatuma mbasha kubaho, hashize umwaka ntacyo barabikoraho”.

Umuyobozi wa Transparency International Rwanda, Ingabire Marie Immaculée, yavuze ko hari impinduka nyinshi mu mibereho y’abaturage, nubwo hari amakosa akwiye gukosorwa.

Ati “Twasanze inzu z’abaturage barazisize mu manegeka ejo buriya zizahirima ikindi imyaka irangirika kuko baba batabamenyesheje […] imihanda ituma abantu barandurirwa imyaka yabo ibyo nibyo tudashaka, leta igomba gushyira imbaraga mu kuvana abaturage mu kaga, ikindi bagahindura n’itegeko ryo kudaha abantu ingurane wamaze kubangiriza imyaka.”

Umunyamabanga wa Leta muri Minisiteri y’Ubutegetsi bw’Igihugu, ushinzwe imibereho myiza y’abaturage, Nyirarukundo Ignacienne, yavuze ko kuba hari abaturage bake bagaragaza ko hari ibitaragenze neza bidasobanuye ko gahunda muri rusange yabaye mbi.

Ati “Igikwiye gukorwa ni ukureba ikibazo ku kibazo kuko hari uwabariwe, hari utarabariwe, hari uwo byatinze tukareba buri muhanda uko byagenze n’ingorane zavutsemo ariko ntitubigire ibya rusange ko abantu barenganye. Tuzareba uburyo ibyo bibazo byakemuka.”

Abakoze ubu bushakashatsi batanze inama ko kugira ngo gahunda ya VUP ikomeze gutanga umusaruro uko bikwiye n’abaturage bayishimire, abayobozi mu Turere bakwiye guha ingurane abaturage bagirwaho ingaruka n’ibikorwa by’inyungu rusange kandi imishinga ntitangire nta masezerano yanditse bagiranye.

Abatangabuhamya bavuze uburyo imirimo yakozwe muri gahunda ya VUP yabangirije ibyabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza