00:00:00 IGIHE NETWORK KN KINYARWANDA EN ENGLISH FR FRANCAIS

Ubusabe bw’abahanzi ku bifuza kwitabira ibitaramo by’iminsi mikuru

Yanditswe na Muhonzire Sylvine
Kuya 3 Ukuboza 2021 saa 12:57
Yasuwe :

Abahanzi Nyarwanda basabye abaturarwanda cyane abazitabira ibitaramo by’iminsi mikuru, gukomeza gukurikiza ingamba zo kwirinda Covid-19 harimo no gufata inkingo zose zikenewe kugira ngo hirindwe ubwiyongere bw’ubu bwandu mu ntangiriro za 2022.

Ibi babisabye ubwo bari bitabiriye igikorwa cyo gukingira abanyeshuri, abayobozi n’abarimu bo muri Kaminuza ya Mount Kenya kuri uyu wa 2 Ukuboza 2021, aho buzuzaga ibyangombwa by’abaje kwikingiza.

Abahanzi bitabiriye iki gikorwa barimo Patient Bizimana, Jules Sentore, Andy Bumuntu, Alyn Sano na Mani Martin, basabye ko muri bihe by’iminsi mikuru u Rwanda rugiye kwinjiramo, Abanyarwanda bakomeza guha agaciro ingamba zo kwirinda Covid-19.

Patient Bizimana yagize ati “Ndakangurira abantu gukurikiza ingamba zo kwirinda Covid-19, abitabira ibitaramo byacu bakaza bikingije inkingo zose kuko nk’icyo twitegura cyateguwe na EAP (East African Promoters) cyo kwishimira Noheli turasaba abantu kuzaza bikingije mu buryo bwuzuye.”

Mani Martin ati “Njyewe nk’urubyiruko kandi nk’umuhanzi ndasaba abantu bose kwitabira gufata izi nkingo kuko turabakeneye. Dukeneye kongera kubataramira dukeneye kongera guhura na bo ntacyo twishisha, dukeneye kubona Abanyarwanda bari hamwe bishimye.”

Jules Sentore na we yunze mu ryabo asaba ko mu bihe byo kwishimira irangira ry’umwaka abantu badakwiye kudohoka.

Yakomeje ati “Muri ibi bihe by’iminsi mikuru ndasaba abantu ngo ntibatwarwe n’ibyishimo ngo badohoke, bakomeze kwirinda kuko icyorezo kirahari kiragendagenda mu gihugu, igikenewe nta kindi ni ugukurikiza ingamba zose zisabwa.”

Umwe mu banyeshuri bari baje gufata urukingo rwa kabiri, Uwayo Sophie Herondine, yavuze ko kuba aba bahanzi baje kubashishikariza gufata urukingo ari urugero rwiza babonye.

Yakomeje ati “Nanjye ndashishikariza abanyeshuri bagenzi banjye kuza gufata urukingo kuko nk’ubu hano Mount Kenya nta munyeshuri wemerewe kwinjira atarakingiwe, rero aho kugira ngo uhagarike amasomo wakwikingiza kuko urukingo ni ubuzima.”

Mu bice byose by’iri shuri ingamba zo kwirinda Covid-19 zarakajijwe ndetse mbere yo kwinjira mu kigo umuntu akaraba umuti wica udukoko ariko yajya kwinjira mu gice cyubatsemo amashuri agaterwa umuti umubiri wose.

Umuyobozi wa Kaminuza ya Mount Kenya, Dr. Prog Edwin Odhuno, yavuze ko ikirenze kuri ibyo ari uko abanyeshuri, abarimu n’abayobozi bose bamaze gufata nibura urukingo rwa mbere rwa Covid-19, ndetse ko ingamba zo kwirinda zigikomeje.

Ati “Abantu bamwe bashobora gutekereza ko ari imikino ariko hari abanyeshuri bamwe babonye ko atari imikino kuko hari abarwaye, rero tugomba gukomeza kubungabunga ubuzima bwacu kuko ntabwo tuzi ngo iki cyorezo kizageza ryari ariko ndatekereza ko turi mu nzira nziza zo kugihashya.”

Kugeza ubu abarenga miliyoni esheshatu mu Rwanda bamaze guhabwa urukingo rwa mbere rwa Covid-19, mu gihe abarenga miliyoni 3.5 bahawe inkingo zombi.

Jules Sentore aganiriza umunyeshuri wari uje kwikingiza
Mani Martin ari kwandika umwirondoro w'umunyeshuri
Abazaga kwikingiza bafataga urukingo rwa Moderna
Alyn Sano yasabye abaturarwanda barengeje imyaka 50 gufata urukingo rwa gatatu kuko rushimangira inkingo zombi za Covid-19
Andy Bumuntu, Patient Bizimana, Alyn Sano, Jules Sentore na Mani Martin bari bitabiriye igikorwa cyo gukingira muri Kaminuza ya Mount Kenya
Jules Sentore ahamya ko buri wese nakurikiza ingamba zose zo kwirinda abantu bazongera bagatarama nk'uko byahoze
Mani Martin yavuze ko icyo yifuza ari ukubona Abanyarwanda bongeye gutarama bishimye
Andy Bumuntu mbere yo gutangira akazi ko kuzuza ibyangombwa by'abaje kwikingiza yabanje gukaraba intoki akoresheje 'hand sanitizer'
Patient Bizimana yasabye abakirisitu kwikingiza kugira ngo bazitabira ibitaramo bya Noheli nta mpungenge zo kurembya na Covid-19 bafite
Umuyobozi wa Mount Kenya Univeristy mu Rwanda, Dr Edwin Odhuno, yavuze ko abantu bose biga cyangwa bakora muri iyi Kaminuza bafashe nibura dose imwe y'urukingo
Uwayo Sophie yavuze ko yishimiye kubona Alyn Sano mu gikorwa cyo gufasha abanyeshuri kuzuza ibyangombwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .