Uburyo amakuru asabwa n’uko atangwa mu Rwanda ntibivugwaho rumwe

Yanditswe na Evariste Nsengimana
Kuya 8 Ugushyingo 2019 saa 02:34
Yasuwe :
0 0

Abakozi b’ibigo bya Leta, ibyigenga n’abanyamakuru ntibavuga rumwe ku iyubahirizwa ry’itegeko rigena itangwa n’itangazwa ry’amakuru, aho bamwe bavuga ko hari ibigo byanga cyangwa bigorana mu gutanga amakuru mu gihe bamwe mu banyamakuru bavugwaho ko bayaka mu buryo butari ubwa kinyamwuga.

Byagarutsweho kuri uyu wa 8 Ugushyingo 2019, ubwo hizihizwaga umunsi wahariwe itangazamakuru muri Afurika[Africa day of Information] mu kiganiro mpaka cyibanze ku ruhare rw’Itangazamakuru mu guhindura umuryango.

Muri iki kiganiro, impuguke mu itangazamakuru, Dr Kayumba Christopher, yavuze abanyamakuru badafite ibinyamakuru bihoraho bakorera [Freelancer] n’abandi muri rusange bagorwa no kubona amakuru mu bigo bya Leta kandi babyemerewe n’amategeko.

Mu 2013 nibwo u Rwanda rwashyizeho itegeko ryerekeye kubona amakuru rigamije gutuma abaturage n’abanyamakuru babona amakuru yo mu nzego za Leta no mu nzego zimwe z’abikorera mu buryo buboroheye.

Kayumba yavuze ko “Mu bigo bimwe usanga bigoye kubonayo amakuru no ku makuru atagira icyo ahungabanya ku bigo.”

Dr Kayumba usanzwe ari n’umuyobozi w’ikinyamakuru The Chronicles yavuze ko ibigo bimwe bisaba abanyamakuru kwandikira ibaruwa ubuyobozi bw’ikigo ashakamo amakuru.

Dr Kayumba yavuze ko amakuru akwiye gutanga hadashingiwe ku bushuti umuntu afitanye n’utanga amakuru ahubwo hakwiriye gukurikizwa ibiteganywa n’itegeko.

Isesengura ryakozwe n’urwego rw’igihugu rw’imiyoborere ku mavugurura yakozwe mu itangazamakuru rigaragaza ko kubona amakuru ‘Access to information’ bifite amanota 76.2%.

Umuyobozi w’Urwego rw’Abanyamakuru Bigenzura (RMC), Cleophas Barore, yavuze ko itegeko ryo kubona amakuru rihari ariko rigikeneye kumenyekanishwa kuko usanga hari abantu baritwara uko ritari.

Ku ruhande rw’Abanyamakuru, Barore yavuze ko urwego akuriye rukunze kwakira ibibazo by’abanyamakuru n’abantu ku giti cyabo cyangwa abayobozi bavuga ko uburenganzira bwabo bwahungabanyijwe mu gihe barimo kwaka cyangwa gusabwa amakuru.

Ati “Hari ukubura amakuru ariko hari no kuyasaba nabi, abanyamakuru hari ubwo bayashakisha nabi.”

Barore yatanze urugero rw’umuntu ukora kwa muganga wamuhamagaye amubwira akarengane yagiriwe n’umunyamakuru wamusabye amakuru akamusobanurira ariko akamubwira ko agomba gushaka ubuyobozi bukamuha ayizewe, ko we atifuza ko yamufata nk’isoko yizewe y’amakuru, ndetse bakabyemeranya bikaza kurangira abirenzeho.

Ati “Niba tudashobora kubahiriza iby’ingenzi mu mahame ngengamyitwarire y’umwuga, amakuru turayasaba ariko natwe hari ibyo dusabwa kubahiriza. Hari uburyo bwo gusaba amakuru, wamwibwiye ariko utamukanga.”

Itegeko ryerekeye kubona amakuru rivuga ko ‘Buri muntu afite uburenganzira bwo kubona amakuru afitwe n’urwego rwa Leta na zimwe mu nzego z’abikorera’.

Kubona amakuru bisobanura ko ari ‘Ugusuzuma ibikorwa, inyandiko cyangwa amakuru abitse, kwandika, gufata inyandiko zuzuye, ibice byazo cyangwa kopi zemewe n’ubuyobozi bw’urwo rwego cyangwa amakuru abitse, gufata inyandiko zuzuye cyangwa ibice byazo ziriho umukono wa noteri, ubona amakuru abitswe mu buryo ubwo ari bwo bwose bw’ikoranabuhanga cyangwa mu nyandiko zicapwe zivanywe muri mudasobwa cyangwa mu kindi kintu icyo ari cyo cyose’.

Amakuru asabwa n’umuntu ku giti cye cyangwa itsinda ry’abantu mu rurimi urwo ari rwo rwose mu ndimi zemewe n’Itegeko Nshinga ry’u Rwanda hakoreshejwe imvugo, inyandiko, telefoni, ikoranabuhanga cyangwa ubundi buryo bw’itumanaho.

Usaba amakuru ni we ugaragaza uburyo yifuza kuyahabwamo. Ariko iyo uburyo yifuza kuyahabwamo birenze ubushobozi bw’urwego rusabwa kuyatanga, usaba amakuru yishyura ikiguzi kijyanye n’uburyo ayifuzamo.

Dr Kayumba (uwa mbere ibumoso) yavuze ko amakuru akwiye gutanga hadashingiwe ku bushuti umuntu afitanye n’utanga amakuru ahubwo hakwiriye gukurikizwa ibiteganywa n’itegeko.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza