00:00:00 IGIHE NETWORK KN KINYARWANDA EN ENGLISH FR FRANCAIS

Uburengerazuba: Abahinga ibireti bagabiwe inka bahishura ibanga babibonyemo

Yanditswe na Ndikumwenayo Thierry
Kuya 24 Nzeri 2022 saa 09:55
Yasuwe :

Abahinga ibireti bo mu turere twa Nyabihu na Rubavu bavuga ko bamenye ibanga ryabyo, kuri ubu ngo nibo beza ibirayi kurusha abadahinga ibireti. Bamwe muri aba bahinzi bahawe inka bashimirwa ko babaye indashyikirwa mu kwita kuri iki gihingwa.

Kuba ibireti bibinjiriza amafaranga bakiteza imbere ni kimwe mubyo abahinzi bo mu karere ka Nyabihu na Rubavu bishimira. Si ibi byonyine kuko ngo irindi banga bakuye muri ubu buhinzi, ari uko iki gihingwa cyarumbuye imirima yabo kuri ubu bakaba babona umusaruro mwinshi w’ibirayi kurenza abadahinga ibireti.

Mukeshimana Esperance wo mu murenge Bugeshi umaze imyaka24 ahinga ibireti yagize ati “Twatangiye guhinga ibireti abantu batabyumva batanabyiyumvamo, nahinze ibireti bwa mbere ari ukubigerageza, aho mbikuye mpahinze ibirayi mbona umusaruro mwinshi ntari nsanzwe mbona"

Yakomeje agira ati "Ibi byatumye mbikunda mbikundisha n’abandi. Hari ahantu hagenewe guhingwa ibireti, ariko kubera umusaruro w’ibirayi nabonye bivuye ku bireti, nahisemo gukomeza kubihinga no mu yandi masambu aho bihingwa ku bushake”.

Akomeza avuga ko n’ubwo bamuhaye inka ku bwo gushishikarira guhinga ibireti, nawe yari yibitseho iryo banga ry’uko ibireti birumbura ubutaka bwe kugira ngo bubashe kwera indi myaka.

Ashishikariza abatariyumvamo ibireti ko bakwiriye kubigerageza bakareba ibyo barushijwe, kuko ngo nabyo ubwabyo ni ifumbire.

Nkundabera Cyprien wo mu karere ka Nyabihu nawe yatangaje ko byabagoye kumva neza iki gihingwa, ariko aho baboneye umusaruro bagikunze.

Ati “Tugitangira ntabwo twacyumvaga neza, ariko tumaze kubona ubwiza bwacyo twaragikunze. Ibireti birumbura ubutaka kuko ubwabyo birabufumbira, witaye ku bireti wabikunda, abatarabikunda nabo nibabikunde kuko uku kurumbura ubutaka bituma ibirayi byera cyane. Ibireti nabyo bitanga amafaranga kandi dore ayo baduhaga bayongereye!”.

Nshimiyimana Eric nawe ari mu bashima iterambere bagejejweho n’ibireti, kimwe na bagenzi be bahawe inka, avuga ko inka igiye kumufasha kwagura ubuhinzi bw’ibireti.

Asaba ubuyobozi bufite iki gihingwa mu nshingano kubabonera imbuto y’ibireti kuko ibyo bafite biri gusaza, kandi iyo bishaje bigira uburwayi bigatuma umusaruro uba muke.

Umuyobozi w’uruganda rutunganya ibireti SOPYRWA, Bizimungu Gabriel, avuga ko umusaruro mwiza bamaze kugeraho uturuka mu mikoranire myiza n’abahinzi; bakaba bagiye gukomeza guhwitura abahinzi kugira ngo umusaruro wiyongere.

Ku kibazo cy’ibireti bishaje, Bizimungu avuga ko bagiye gushaka umurama ku buryo bwose bushoboka kugira ngo gikemuke.

Yagize ati “Turi muri gahunda yo gushaka umurama mu buryo bwose bushoboka kandi tumaze kubona uhagije, tugiye gukuba kabiri ku wo twatanze umwaka ushize kugira ngo bahinge ibireti bishya kuko bagaragaje ko ibireti bishaje bitabaha umusaruro.”

Guverineri w’Intara y’Uburengerazuba Habitegeko François yemeza ko imbogamizi aba bahinzi bafite zizakemuka nk’uko ikibazo cy’ibiciro ku bireti cyakemutse. Ku mbogamizi z’uko parike y’ibirunga ishobora kuzasatira ubutaka bwabo, avuga ko bazaganira n’ibigo bireba nka RDB kuko nabyo ari ibigo bya Leta kandi ko iharanira icyateza imbere umuturage; bityo ko ikizavamo ari icyamugirira neza.

Abahinzi b’ibireti bongerewe amafaranga bahabwaga ku kilo ava ku 1080 Frw agera ku 1180 Frw, ababaye indashikirwa mu gukurikirana iki gihingwa bahabwa inka, abandi bahabwa ibiryamirwa.

Mu turere twa Rubavu na Nyabihu, abahinzi 24 bahawe inka mu gihe 40 bahawe ibiryamirwa abandi bahabwa ibikoresho by’ubuhinzi.

Utu turere turimo koperative eshanu, eshatu zo mu karere ka Nyabihu n’ebyiri zo mu karere ka Rubavu. Izi kopertive uko ari eshanu zigizwe n’abahinzi basaga 3006 bahinga ku buso bungana na hegitari 1569.

Abahawe ibiryamirwa bishimye cyane
Abahinzi bahawe n'imiti y'amatungo n'iyica udukoko mu myaka
Ibyishimo ni byinshi ku bagabiwe inka
Guverineri Habitegeko yaganirizaga umuturage amwibutsa gufata neza inka yagabiwe
Abahinzi 24 bagabiwe inka bahiga gukomeza guhinga ibireti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .