00:00:00 IGIHE NETWORK KN KINYARWANDA EN ENGLISH FR FRANCAIS

Ubunyamaswa bw’abagabo gito mu Rwanda

Yanditswe na Prudence Kwizera
Kuya 13 June 2022 saa 10:49
Yasuwe :

Ubusanzwe iyo mu Kinyarwanda bavuze ngo umuntu ni umugabo byumvikana ko afite ibitekerezo bizima, yihesha agaciro, afite indangagaciro zo kwanga ikibi agashyira imbere icyiza. Bikaba akarusho noneho iyo koko ari umugabo wubatse, wabyaye, kuko aba atoza abe kugenza atyo.

Muri iki gihe hari ikibazo cy’abangavu bari gusambanywa bagaterwa inda imburagihe kandi iyo uganiriye nabo usanga hari benshi baziterwa n’abagabo bakuze bakagombye kubabera ababyeyi. Ni ikibazo cyagaragaje umuvuduko uri hejuru mu Rwanda ahagana mu 2017.

Minisiteri y’Uburinganire n’Iterambere ry’Umuryango itangaza ko mu 2017 abangavu batewe inda imburagihe bataragira imyaka 18 y’amavuko bagera ku 17,337; naho mu 2018 baba 19,832.

Mu 2019 abazitewe barenga ibihumbi 23, mu 2020 imibare y’abazitewe yerekana ko bagera ku bihumbi 19 naho mu 2021 bageze ku bihumbi 23.

Ubuhamya bwa bamwe mu bangavu batewe inda imburagihe bugaragaza ubunyamaswa bw’abagabo bagiye babasambanya ku ngufu bakabatera inda, bamwe batitaye ko bangana n’abo babyaye.

Umwangavu w’imyaka 16 wo mu murenge wa Muganza mu karere ka Gisagara avuga ko yize mu mashuri abanza ageze mu wa kabiri avamo ajya gukora akazi ko mu rugo bitewe n’ubukene bwari mu rugo rwabo. Iwabo babyaye abana barindwi we ni imfura muri bo.

Mu buhamya bwe avuga ko yasambanyijwe n’umugabo wo mu rugo yakoragamo amufashe ku ngufu mu 2017.

Ati “Kubera ko iwacu turi abakene nagiye gukora akazi ko mu rugo kugira ngo njye mbona ibyo kurya. Twakundaga gusigarana mu rugo akansambanya ku ngufu akambwira ngo nimbivuga azanyica.”

Avuga ko ikimubabaza ari uko bakimara kumenya ko atwite bahise bamwirukana asubira iwabo mu buzima bwa gikene. Aganira na IGIHE yari ahetse umwana w’amezi ane. Ababazwa n’uko uwo mugabo nta kintu na kimwe amufasha mu kurera uwo mwana.

Undi mwangavu wahaye ubuhamya IGIHE ni uwo mu Karere ka Kayonza; yagaragaje ko yasambanywaga n’umwarimu umwigisha mu mashuri abanza mu 2018.

Uwo mwangavu yize aba kwa nyirasenge ariko muri urwo rugo hacumbikaga umwarimu, noneho akajya amufasha gusubiramo amasomo y’umugoroba.

Ati “Masenge yamfataga nabi akanga ko ngira icyo mubwira ngo tuganire kuko iwacu twari abakene. Ubwo yari yarantegetse ko uwo mwarimu agomba kujya anyigisha isomo rya nimugoroba. Yanjyanaga mu nzu yo hanze aho acumbitse akansambanya.”

Uyu mukobwa avuga ko yageze aho arwara ihahamuka yabona uwo mwarimu agahungabana.

Ati “Mu ishuri naramubonaga aje kutwigisha ngahahamuka nkarwara bagahita banjyana hanze. Noneho byageraga nimugoroba amasaha yo kujya kunyigisha ageze nkabura aho mpungira kuko yabaga yaraye ansambanyije yankomerekeje, ntiyumvisha ukuntu agiye kongera agasubiza mu bisebe.”

Byageze aho uyu mukobwa aratoroka ava muri urwo rugo ajya kwa nyirakuru, ariko aza gusanga atwite.

Ibibazo yahuye nabyo yabiganirije umuforomo wo ku kigo nderabuzima, aramuhumiriza amufasha kwiyakira. Ubu yamaze kubyara.

Undi mwangavu wo mu Murenge wa Musambira mu Karere ka Kamonyi avuga ko yatangiye gusamabanywa n’umugabo afite imyaka 12. Icyo gihe yari umunyeshuri yiga mu mwaka wa Kane w’amashuri abanza. Yamusambanyaga abanje kumushukisha amafaranga.

Uwo mugabo yaje kumutera inda amwanduza virusi itera Sida. Amaze kumenya ko atwite yahise amureka ndetse ntiyamufasha no kurera umwana.

Ati “Nta kintu yigeze amfasha kuko n’umwana atamwemeye. Kuri ubu nta nubwo tukivugana cyane kuko tudahuza.”

Undi mukobwa wo mu Karere ka Gisagara yatewe inda mu 2017 ananduzwa Sida n’umugabo ubwo yakoraga akazi ko mu rugo mu Mujyi wa Kigali.

Ubwo yahuraga n’Umunyamakuru wa IGIHE yari avuye ku Kigo nderabuzima gufata ibiryo n’imiti by’umwana we, kuko agaragaraho imirire mibi n’ibimenyetso byo kugwingira, yamugaragarije ko abayeho mu buzima bushaririye.

Yagize ati “Aho nakoraga i Kigali namenyanye n’umugabo wakoraga akazi ko kogosha, yarambwiye ngo njye kumusura, ngezeyo amfata ku ngufu antera inda. Nyuma naramushatse ndamubura, aho nakoraga baranyirukana ngaruka mu rugo.”

Umukobwa w’imyaka 14 y’amavuko wo mu Murenge wa Kitabi mu Karere ka Nyamagabe yahuye n’umunyamakuru wa IGIHE mu 2021, atwite inda nkuru yatewe imburagihe.

Avuga ko yafashwe ku ngufu n’umugabo utuye hakurya y’iwabo mu Mudugudu wa Subukiniro, amutera inda muri Nzeri 2020 ubwo yari yagiye mu ishyamba kwahira ubwatsi bw’amatungo. Icyo gihe yari umunyeshuri yiga mu mwaka wa gatanu w’amashuri abanza.

Ati “Yansanze mu ishyamba aho nari ndi kwahira mbona ari kundebana umujinya arangije aramfata. Ni umugabo wari ushinzwe gucunga ibinyomoro ariko ndamuzi.”

Uwo mugabo yaramusambanyije amwangiza n’imyanya y’ibanga. Ibyo bikimara kuba yaratashye agira ubwoba bwo kubibwira ababyeyi be kuko ngo uwo mugabo wamusambanyije yari yamubwiye ko nabivuga azamwica.

Nyuma yaho yumvise akomeje kubabara mu gitsina, abwira nyina ibyamubayeho na we ahita amujyana kwa muganga bamupimye basanga atwite.

Umwangavu wo mu Karere ka Gisagara ahetse umwana w'amezi ane yabyaye nyuma yo gufatwa ku ngufu n'umugabo akamutera inda

Umugabo yamuteye inda ubugira kabiri

Undi mwangavu wo mu Murenge wa Huye mu Karere ka Huye yashutswe n’umugabo amutera inda afite imyaka 15 nyuma yaho yongera kumutera indi afite 17.

Asobanura ko uwo mugabo yamujyanye mu Karere ka Nyamagabe amusambanyirizayo.

Ati “Yahise akatisha itike tujya Nyamagabe ambwira ko hari ibintu agiye kugura nkabizana mu rugo, we agakomeza ajya Nyaruguru. Ubwo twagezeyo anjyana ahantu ntazi muri Lodge (icyumba gikodeshwa) turaryamana ari nabwo yahise antera inda ya mbere.”

Mu gihe yari atwite yabayeho mu buzima bubi ndetse amaze kubyara aza kwigira inama yo guhamagara uwo mugabo amusaba amafaranga yo kugurira umwana ibyo kurya n’imyambaro, nawe amubwira ko amusanga mu Mujyi wa Huye akayamuha, agezeyo arongera aramusambanya.

Ati “Namusanze ari mu kabari yakodesheje icyumba anjyanamo ngo tuganire ubwo tugezemo ambwira ko yateguye kumpa ibihumbi 20, ariko avuga ko atayampa tutaryamanye, kuko nayashakaga cyane ndabyemera ari nabyo byamviriye kuntera inda ya kabiri y’uriya mwana muto.”

Avuga ko akimara kubyara abana babiri, umugabo babyaranye atongeye kugira icyo amufasha ku kwita ku bana babo, ahubwo yahise yimuka mu Karere ka Huye ajya gutura i Kigali, bituma atangira kwiyambaza ubuyobozi ngo bumurenganure.

Hari abasambanyirizwa mu mihanda

Abagabo basambanya abangavu n’abana ntibatinya no kwibasira abo basanze bazerera mu muhanda.

Bamwe mu bangavu b’inzererezi mu mihanda yo mu Mujyi wa Kigali, bavuga ko hari abagabo babasanga aho bakinze umusaya bakabafata ku ngufu.

Umwe muri bo w’imyaka 19 avuga ku munsi wa mbere ari bwo yafashwe ku ngufu n’abasore b’aba-marines.

Yagize ati "Bahise bamfata baransambanya bantera inda na SIDA. Ikibazo sinzi na papa w’umwana kuko muri iryo joro abansambanyije bari batatu. Nyuma bose twahuriye aho bararaga ndabibabwira barabyihakana ahubwo batangira kunshota imigeri."

Mugenzi we w’imyaka 17 uvuka mu Karere ka Karongi na we yagannye inzira y’umuhanda ahunze amakimbirane ya se na nyina.

Mu buhamya bwe, yemeza ko hari abagabo ahura nabo yabasaba icyo kurya bagahitamo kumujyana mu rugo bakamusambanya.

Uyu mwangavu wo mu Karere ka Nyamagabe yatewe inda afashwe ku ngufu n'umugabo wamusanze mu ishyamba arimo gutashya

Hari n’abasambanya impinja

Hashize igihe hirya no hino mu gihugu hafatwa abagabo bashinjwa gusambanya abana bato b’abakobwa bafite imyaka ibiri kugeza ku munani. Iyo bajyanywe mu nkiko bamwe muri bo ibyaha birabahama bagahabwa ibihano.

Urugero ni urw’ Umugabo w’imyaka 55 y’amavuko wo mu Karere ka Huye wakurikiranyweho gusambanya umwana w’umukobwa w’imyaka irindwi y’amavuko muri Gicurasi 2022.

Yemera icyo cyaha avuga ko yabitewe n’amadayimoni ndetse na Primus ebyiri yari amaze kunywa.

Undi mugabo wo mu Murenge wa Tumba mu Karere ka yafashwe muri Gicurasi 2022 akurikiranyweho gusambanya umwana w’imyaka itanu y’amavuko. Kuri ubu dosiye ye iri gukurikiranywa n’inzego zibishinwe.

Hari undi mugabo kandi wo mu Karere ka Rulindo wasambanyije umwana w’imyaka itandatu ageze mu rukiko abwira abacamanza ko icyabimuteye ari uko ’umupfumu’ yamubwiye ko naryamana n’umwana muto azakira Virusi itera Sida. Uwo yahamijwe icyaha cyo gusambanya umwana no kugambirira kumutera indwara idakira, ubu arafunze.

Bangizwa imyanya myibarukiro

Bamwe mu bangavu basambanyijwe bagaterwa inda imburagihe babwiye IGIHE ko byabagizeho ingaruka mbi zirimo kwangirika imyanya myibarukiro no kurwara umugongo.

Umwe wo mu Murenge wa Ruheru mu Karere ka Nyaruguru ati “Nabyaye mfite imyaka 15, mbyara bintunguye kuko nagiye kwa muganga numva mu nda handya ntazi ibyo ari byo bambwira ko ntwite. Ingaruka byangizeho ni uko narwaye umugongo kuko urandya simbashe kunama, mpora nivuza kwa muganga.”

Undi mwangavu yavuze ko kubyara afite imyaka 17 byamuteye kwangirika mu myanya myibarukiro.

Ati “Kubyara nkiri muto byanteye ubumuga bw’umugongo ndetse ngira n’ikibazo mu myanya myibarukiro kuko harangiritse.”

Mu Kagari ka Ruyenzi hari undi mwangavu wavuze ko yabyaye bigoranye ku buryo inda yari igiye kumuhitana.

Yagize ati “Nabyaye mfite imyaka 15 ngira ikibazo kuko nabyaye ntarigeze njya kwa muganga kwipimisha. Kubyara nagiriyemo ibibazo kuko iyanyuma yari yanze kuza biba ngombwa ko bambaga. Mba numva mbabara mu nda ibyara kandi hasohoka umwuka mubi.”

Inzego zitandukanye zirimo ubuyobozi, abanyamadini, ubugenzacyaha, Polisi n’abafatanyabikorwa, zahagurukiye ikibazo cy’abagabo n’abasore basambanya abangavu ariko kugeza ubu ntabwo kiracika.

Urugero ni nk’aho ubuyobozi bw’Akarere ka Gatsibo bwatangaje ko abagabo 385 bateye abangavu inda batawe muri yombi guhera muri Gashyantare 2021 kugeza muri Kanama uwo mwaka. Ni mu gihe hari abandi 500 bari bakidegembya.

Ibyo bisobanuye ko izo nzego zitaragera ku ntego ziyemeje yo guca isambanywa ry’abangavu.

Bamwe mu bangavu bagorwa n'ubuzima iyo batewe inda, barasaba ko abagabo babahohotera bajya bahanwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .