Ni ubutumwa yahaye Abanyamuryango ba Unity Club Intwararumuri ku mugoroba wo kuri uyu wa 30 Gicurasi 2022, ubwo bari mu muhango wo kwibuka ku nshuro ya 28 Jenoside yakorewe Abatutsi.

Ni umuhango wabimburiwe no gusobanurirwa amateka ya Jenoside yakorewe Abatutsi no kunamira abazize Jenoside , hanashyirwa indabo ahashyinguye imibiri y’izo nzirakarengane mu Rwibutso rwa Jenoside rwa Kigali ruri ku Gisozi.

Abanyamuryango ba Unity Club barimo abayobozi mu nzego nkuru z’igihugu, abahoze ari abayobozi ndetse n’abagore babo bari bitabiriye uyu muhango.

Visi Perezida wa Mbere wa Unity Club, Kayisire Marie Solange, yavuze ko kwibuka Jenoside yakorewe Abatutsi ari uguha agaciro Abatutsi b’Inzirakarengane bazize uko baremwe kandi ko ari inshingano za buri Munyarwanda kugira ngo ibyabaye bitazongera.

Ati “Iki ni igihe kitwibutsa ko abantu bamwe, igihe kimwe bari mu nshingano nkatwe bakoze ibitari byo. Bikatwigisha kumenya gukora amahitamo meza kugira ngo tubashe gukomeza kubaka ubumwe bwatakajwe bibyara ayo macakubiri bitugeza kuri Jenoside.”

Yakomeje agira ati “Biradusaba nk’ababyeyi, nk’abayobozi bari mu nshingano batekerereza abandi, igihugu n’abaturage gukomeza gukora amahitamo ajyana ku bumwe bw’Abanyarwanda, kubuza icyasubiza inyuma ibimaze kugerwaho. Amaraso menshi yaramenetse kugira ngo tube turi aho tugeze aha.”

Minisitiri Kayisire yavuze kandi ko kwibuka Jenoside yakorewe Abatutsi nk’ababyeyi ari umwanya mwiza wo kwibuka ko bafite inshingano zo kwigisha ababakomokaho amateka ya nyayo y’u Rwanda no ufata ingamba zo kubaka u Rwanda ruzira amacakubiri ayo ari yo yose.

Ikiganiro cyatanzwe na Minisitiri Dr Bizimana cyari gifite insanganyamatsiko igira iti ‘Twahisemo kuba Umwe’.

Yagaragaje uruhare rw’Abakoloni n’abayobozi ba Repubulika ya Mbere n’iya Kabiri mu gusenya ubumwe bw’Abanyarwanda, n’uburyo Guverinoma y’Ubumwe yashyize imbaraga mu kongera kubaka u Rwanda.

Ati “Ubumwe bw’Abanyarwanda bwabayeho, ntabwo ari ikinyoma, ntabwo ari ukubeshya, bwabayeho burasenywa, Jenoside niyo yabusenye, ubu turi mu gihe cyo kongera kubwubaka, kubusigasira no kububungabunga.”

Minisitiri Dr Bizimana yavuze ko leta zasenye ubumwe bw’Abanyarwanda zabiteguye, zigisha urwango n’amacakubiri biragenda bijya mu buzima bwa buri munsi bw’abaturage biza kugeza ubwo bashyira mu bikorwa Jenoside yahitanye Abatutsi basaga miliyoni mu minsi 100.

Minisitiri w’Uburezi akaba na Perezida wa Komisiyo y’Imiyoborere Myiza n’Ubutabera mu muryango Unity Club, Dr Uwamariya Valentine yavuze ko kwibuka Jenoside ari umwanya wo kwisuzuma mu byemezo bafata umunsi ku munsi.

Ati “Ubuyobozi nibwo bwashenye igihugu mu byemezo bwagiye bufata, ni byiza ko natwe twongera kwicara tukisuzuma mu mikorere yacu ya buri munsi cyane cyane tugamije gukumira. Tugomba kunamira abazize Jenoside tukabaha icyubahiro bambuwe.”

Umuryango Unity Club Intwararumuri washinzwe na Madamu Jeannette Kagame, ugamije gutanga umusanzu mu kubaka ubumwe bw’Abanyarwanda, ukaba ugizwe n’abagize Guverinoma, abigeze kuyibamo n’abo bashakanye.

Umunyamabanga Mukuru wa Unity Club, Régine Iyamuremye yavuze ko abayobozi aribo bashenye ubumwe bw’abanyarwanda bityo abariho ubu aribo bagomba kongera kubwubaka bugashinga imizi.

Ati “Uyu ni umwanya twongera tugasubiza amaso inyuma tukazirikana amateka y’igihugu cyacu.”

“Iyo turebye uruhare rw’abayobozi bagize mu gusenya ubumwe bw’Abanyarwanda, mu kunanirwa kubabanisha neza, icyo gihe bituma tuzirikana nk’abantu bari muri izo nzego z’ubuyobozi, tukavuga duti ni izihe nshingano dufite zo kugira ngo turerere igihugu cyacu neza.”

Iyamuremye yavuze kandi ko ingaruka za Jenoside yakorewe Abatutsi zabaye nyinshi bityo, aba bayobozi bafite inshingano zo gufasha abo zagezeho kuzigobotora.

Mu rwego rwo gukomeza gufasha Abanyarwanda gucengerwa n’ubumwe igihugu cyahisemo no kumenya agaciro kabwo, kuri uyu wa Kabiri tariki 31 Gicurasi, Umuryango Unity Club Intwararumuri wifatanyije n’abaturanyi b’Impinganzima za Huye mu muhango wo kwibuka Jenoside yakorewe Abatutsi.

Visi Perezida wa Mbere wa Unity Club akaba na Minisitiri Ushinzwe Ibikorwa by'Ubutabazi, Kayisire Marie Solange yasabye abayobozi kuba umusemburo w'umubano mwiza mu baturage

Visi Perezida wa Kabiri wa Unity Club, Uwacu Julienne ni umwe mu bitabiriye umuhango wo kwibuka ku nshuro ya 28 Jenoside yakorewe Abatutsi

Umuyobozi Mukuru w'Ikigega gitanga Ingwate ku Mishinga Mito n'Iciriritse, BDF, Munyeshyaka Vincent na we ni umwe mu banyamuryango ba Unity Club

Umuhanzikazi Mariya Yohani yafashije aba bayobozi kwibuka abinyujije mu ndirimbo

Senateri Nyirasafari Esperance, umwe mu banyamuryango ba Unity Club yitabiriye igikorwa cyo kwibuka ku nshuro ya 28 Jenoside yakorewe Abatutsi

Dr Ntawukuriryayo Jean Damascène ubwo yarebaga bimwe mu byaranze Jenoside yakorewe Abatutsi birimo no kwica abana b'ibisekeramwanzi

Minisitiri w'Ubutegetsi bw'Igihugu, Gatabazi Jean Marie Vianney ubwo yasuraga urwibutso rwa jenoside rwa Kigali

Minisitiri w'Uburezi, Dr Uwamariya Valentine ubwo yandikaga mu gitabo cy'abasuye Urwibutso rwa Jenoside rwa Kigali

Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascene yavuze ko ubumwe bwahozeho bukaza gusenywa n'abakoloni

Minisitiri w’Uburezi akaba na Perezida wa Komisiyo y’Imiyoborere Myiza n’Ubutabera muri Unity Club, Dr Uwamariya Valentine ubwo yasobanurirwaga amateka ya Jenoside

Minisitiri Dr Bizimana yavuze ko ubuyobozi bubi aribwo bwateguye bukanashyira mu bikorwa Jenoside yakorewe Abatutsi

Makuza Bernard wahoze ari Perezida wa Sena yitegereza ifoto y'umwe mu bana bishwe muri Jenoside

Dr Pierre Damien Habumuremyi ni umwe mu bitabiriye umuhango wo kwibuka wari wateguwe n'Abanyamuryango ba Unity Club Intwararumuri

Dr Charles Muligande ni umwe mu banyamuryango ba Unity Club bitabiriye

Abayobozi by'umwihariko abibumbiye muri Unity Club bagaragaje ko kwibuka Jenoside yakorewe Abatutsi ari umwanya wo gusubiza amaso inyuma bagatekereza ku mateka mabi yaranze u Rwanda

Abanyamuryango ba Unity Club Intwararumuri bunamiye inzirakarengane zazize Jenoside yakorewe Abatutsi

Abanyamuryango ba Unity Club bibutse ku nshuro ya 28 Jenoside yakorewe Abatutsi mu 1994

Minisitiri Jean Mari Vianney Gatabazi ni umwe mu bitabiriye

Hashyizwe indabo ku mva zishyinguyemo abazize Jenoside yakorewe Abatutsi

Mu rwibutso rwa Jenoside rwa Kigali basobanuriwe amateka y'itegurwa n'ishyirwa mu bikorwa rya Jenoside yakorewe Abatutsi

Amafoto: Igirubuntu Darcy