00:00:00 IGIHE NETWORK KN KINYARWANDA EN ENGLISH FR FRANCAIS

Ubumuntu bwa Mukasarasi wagaruriye icyizere abana bakomoka ku bagore basambanyijwe muri Jenoside

Yanditswe na Prudence Kwizera
Kuya 8 July 2022 saa 08:20
Yasuwe :

Jenoside yakorewe Abatutsi mu Rwanda yakoranywe ubugome n’ubukana ihitana abarenga miliyoni mu minsi 100, isiga n’ingaruka zikomeye ku bayirokotse ndetse n’Abanyarwanda muri rusange.

By’umwihariko muri Jenoside yakorewe Abatutsi hari abagore n’abakobwa bagiye bafatwa ku ngufu n’Interahamwe zibangiza imyanya myibarukiro ndetse bamwe muri bo batwara inda, nyuma baza kubyara abana, hakaba ubwo batakiriwe neza mu miryango.

Izo ngaruka za Jenoside yakorewe Abatutsi ni zimwe mu zatumye Mukasarasi Godeliève ashinga umuryango ‘SEVOTA’ (Solidarité pour l’Epanouissement des Veuves et des Orphelins visant le Travail et l’Auto-promotion) wita ku bapfakazi n’imfubyi za Jenoside yakorewe Abatutsi.

Uwo muryango yawushinze kubera ibikomere yasigiwe na Jenoside yakorewe Abatutsi ndetse no kuzuza isezerano yagiranye n’Imana.

Kuri ubu ni Umurinzi w’Igihango ku rwego rw’igihugu kubera ibikorwa bye akaba n’Umuyobozi w’uwo Muryango yashinze.

Mu kiganiro yatanze muri Kaminuza y’u Rwanda Ishami rya Huye ku gicamunsi cyo ku wa 6 Nyakanga 2022 cyateguwe na Unity Club Intwararumuri kigamije kwigisha urubyiruko gahunda ya ‘Ndi Umunyarwanda’, yagarutse ku mavu n’amavuko y’Umuryango SEVOTA n’uko yagize ibonekerwa mbere yo kuwushinga.

Muri Jenoside yakorewe Abatutsi

Mukasarasi Godeliève yavukiye mu Murenge wa Rongi mu Karere ka Muhanga mu 1956, ashyingirwa mu Murenge wa Ngamba mu Karere ka Kamonyi ari naho Jenoside yakorewe Abatutsi yatangiye ari.

Kuri ubu atuye mu Murenge wa Rukoma mu Karere ka Kamonyi kuko aho bari batuye mbere bahimutse nyuma yo gusenyerwa muri Jenoside.

Yavuze ko muri Jenoside yakorewe Abatutsi we n’umugabo we babashije kurokoka ariko abo mu muryango wabo benshi bajugunywa mu mugezi wa Nyabarongo.

Icyo gihe ubwo abo mu muryango wabo barohwaga muri Nyabarongo, Mukasarasi Godeliève yasenze Imana ayisezeranya ko nirokora abana be azakora ikintu cyiza gikomeye.

Ati “Muri icyo gihe rero bajyaga kubaroha muri Nyabarongo, iteka nahoraga nsenga n’ubundi nari nsanzwe ndi umukarisimatike, ngira umuhigo ngirana n’Imana ndavuga nti ‘Mana yanjye umunsi abana banjye barokotse hari igikorwa nzakora kandi nkazagikora nta vangura na rimwe nkoze.’”

Uko yashinze umuryango SEVOTA

Jenoside yakorewe Abatutsi yahagaritswe n’Ingabo za FPR Inkotanyi, Mukasarasi Godeliève n’umugabo we n’abana bararokoka.

Mu Ukwakira 1994 yahise atangira gutekereza uko yahigura umuhigo yahigiye Imana. Ku ikubitiro ashaka gushinga ikigo cy’imfubyi ndetse n’umugabo we babyumvikanaho kuko babonaga hari abana benshi barokotse Jenoside yakorewe Abatutsi batagira kivurira.

Kubera ko Interahamwe zari zarasahuye imitungo yabo yose, yagiriwe inama n’umupadiri wabakurikiranaga mu buryo bwa roho ko yareba ikindi yakora kitari ikigo cy’imfubyi bitewe n’uko yabonaga nta hantu yakura ubushobozi.

Byabaye ngombwa ko ajya gusenga agiye kubaza Imana icyo yakora kugira ngo imuyobore.

Ati “Umunsi umwe ndi mu Kiliziya maze guhazwa [ahumirije asenga] neretswe ishusho y’abagore barira bansanga, iragenda hagaruka ishusho y’abagore baseka; hanyuma mu kanya nk’ako guhumbya haza ishusho y’abana barira iragenda haza ishusho y’abana baseka. Navuye mu Kiliziya nanditse ijambo ‘SEVOTA’ bishatse kuvuga ‘Structure d’Encadrement des Veuves et des Orphelins pour le Travail et l’Auto-promotion.’”

Bukeye ku wa Mbere yegereye ubuyobozi abusaba kumuha uburenganzira bwo kuba yatangiza icyo gikorwa na we ‘atabonaga neza’. Ubuyobozi yabusabye kumubarurira abana n’abagore barokotse Jenoside, bubikora mu kwezi kwa Ukwakira 1994 kose afatanyije nabwo.

Muri iryo barura yatangiye kuganira n’abagore barokotse Jenoside akabona barira nka ba bandi yabonye mu ishusho yamujemo muri Kiliziya asenga.

Ati “Abo mpuye nabo natangira kubavugisha bagasuka amarira nk’uko muri ya shusho nababonaga.”

Byabaye ngombwa ko ashyiraho umunsi awita ‘Uwa gatandatu w’inama’ ubwo bahurira aho yari acumbitse mu nzu y’icyumba kimwe ariko nyuma ajya gusaba icyumba cy’inama kuri Komini Taba barakimuha akajya yakiriramo abagore bababaye.

Bamugannye ari benshi bamugezaho ibibazo byabo bikomoka ku ngaruka za Jenoside yakorewe Abatutsi, rimwe na rimwe na we akumva bimurenze akarirana nabo.

Yageze aho abona bikomeye ajya kwifashisha ikigo cyitaga ku buzima bwo mu mutwe mu Rwanda cyakoragamo abantu baturutse mu Busuwisi, bakajya bamufasha kwakira abo bagore. Byageze naho yifashisha abanyeshuri bo muri Kaminuza Nkuru y’u Rwanda bari bahuriye mu nama i Kigali.

Ati “Ubwo rero nguko uko SEVOTA yakuze kuko twayishinze ku mugaragaro ku itariki 28 Ukuboza 1994.”

Yatangiye no kubona abamufasha ku buryo muri Werurwe 1995 yahurije hamwe abaturage, abapadiri, abapasiteri n’abayobozi bazana inkunga y’amafaranga n’ibiribwa n’ibindi bikoresho.

Barakomeje bakajya batumira n’abantu bahagarariye za minisiteri zinyuranye, imiryango itari iya Leta na mpuzamahanga, ibikorwa byo gutera inkunga abo bagore birakomeza.

Urucantege n’imbogamizi

Ubwo hatangiraga ibikorwa by’ubutabera hashakishwa abagize uruhare muri Jenoside yakorewe Abatutsi kugira ngo baburanishwe, mu gace yari atuyemo bahereye kuri Akayezu wari Burugumesitiri wa Komini Taba.

Mu byaha yashinjwaga harimo icyo gufata umugore n’umukobwa ku ngufu no kuba yarabishishikarije abandi muri Komini yayoboraga. Byabaye ngombwa ko Mukasarasi aherekeza abagore bo muri SEVOTA mu gutanga ubuhamya ku cyaha bakorewe.

Umugabo we na we yari mu bazatanga ubuhamya ariko yahise yicwa mu gihe cy’abacengezi atarajya kubutanga.

Kwicwa ku mugabo we byateye bamwe kumva ko Mukasarasi agomba gucika intege akareka ibikorwa arimo kuko bamwe bo mu miryango yakoze Jenoside bari babangamiwe no kubona ukuri kuri gushyirwa ahagaragara.

Gusa ntabwo yacitse intege ahubwo yarakomeje kuko yari yaramaze kubona abantu bo mu Mpuzamiryango Profemmes Twese Hamwe bamushyigikiye barimo Minisitiri Inyumba Aloysie, Ingabire Marie Immaculée n’abandi.
Abandi bamushyigikiye ni abagize Inteko Ishinga Amategeko kuko baje no gukoresha inama muri Komini Taba, bashishikariza ababyeyi bafashwe ku ngufu muri Jenoside gutanga ubuhamya kugira ngo ababikoze babiryozwe.

Ati “Niko byagenze mba ngize imbaraga zo gukomeza n’ubwo bitari byoroshye kuko hari abagore bajyaga gutanga ubuhamya Arusha [muri Tanzanie] mu rukiko bakababaza amagambo abakomeretsa bakaza bambwira ngo ni wowe wadushoye.”

Ibikorwa bye byarakomeje SEVOTA irakomera iva mu Karere kamwe igera muri 11 ndetse yagiye ahabwa ibihembo bitandukanye akabyifashisha mu kwagura ibikorwa.

Uko yinjijemo abana

Mukasarasi yahawe igihembo n’umuryango wita ku burenganzira bwa muntu, amafaranga ahawe ahita yumva ko ari ayo kwita ku bana bavutse ku babyeyi bafashwe ku ngufu muri Jenoside yakorewe Abatutsi.

Yavuze ko abo bana babagaho nabi kuko ba nyina batabiyumvagamo bitewe n’uko babatwise bafashwe ku ngufu n’Interahamwe. Abo bana kandi bari biganjemo abatazi ba se.

Ati “Noneho yakwerekeza mu muryango wa nyina agiye kureba abarokotse bakamufata nabi bakamwita amazina mabi ngo akaga dufite ni ukubera uyu mwana, cyangwa banamuhamagara bakavuga ngo ‘wa nterahamwe we!’ Hari n’umwana bitaga Yuda ngo ni umugambanyi.”
Yavuze ko muri rusange abo bana nta rukundo rwa kibyeyi babonaga kuko benshi bavutse nyuma y’uko ba nyina bashatse gukuramo inda zabo ndetse bamaze no kuvuka bakanga kubonsa.

Bajya gutangiza ibikorwa byo kwita kuri abo bana, muri SEVOTA bakoze ubushakashatsi basanga hafi 80% batiga ndetse na bake biga bajyayo nka kabiri mu cyumweru gusa.

Nyuma yaho bakoze ubushakashatsi bafatanyije na Kaminuza ya Kibungo basanga 80% by’abana bavutse ku babyeyi bafashwe ku ngufu muri Jenoside bafite ibikomere birimo umubabaro no kuremererwa.

Muri bo 88% bari bafite ibimenyetso by’ihangayika rya nyuma y’ihungabana, 64% nta cyizere bari bifitiye, abari bifitemo icyizere bari 4% gusa.

Byabaye ngombwa ko bakora Itorero ryihariye rihurijwemo abo bana rikabera mu bigo by’amashuri. Irya mbere bakoze ni iryo gukira ibikomere naho irya kabiri ni iryo kwigarurira icyizere no kubereka ko ejo hazaza ari heza.

Habayeho impinduka

N’ubwo abo bana bari bafite ibikomere batewe n’uko ababyeyi babo batabonkeje bakivuka n’ibindi bijyanye n’uko bavutse, nyuma yo kuganirizwa no kwitabwaho barakize bajya mu mashuri bariga baraminuza.
Bamwe muri bo bajya batanga n’ubuhamya mu biganiro ku maradiyo kugira ngo bigishe abandi. Abana bavutse muri ubwo buryo banyuze muri SEVOTA barenga 500.

Bamwe muri bo bamaze kubaka ingo zabo kandi babayeho neza mu Rwanda, bafite n’amatsinda abahuza.

Mukasarasi Godeliève yagiriye inama urubyiruko yo kutiheba, abibutsa ko buri wese aba afite ibikomere bitewe n’amateka ye, abasaba kujya bumvana.

Ati “Waba waravutse mu muryango warokotse Jenoside, waba waravutse mu muryango wakoze Jenoside; ibyo byose mujye mubirenga mwumve ko muri urubyiruko rw’u Rwanda mwumve ko muri Abanyarwanda kandi dukorere u Rwanda rurusheho gutera imbere.”

Yabasabye kwirinda amacakubiri n’icyabatanya cyose, bagaharanira kunga ubumwe.

Yavuze ko kuri ubu bari gukora umushinga wita ku bibazo bikomoka ku bashakanye badahuje ibyitwaga ubwoko mu Rwanda kuko hari aho usanga umugore ukomoka mu muryango warokotse Jenoside yarashakanye n’umugabo ukomoka mu muryango wakoze Jenoside bikabateza amakimbirane, bikagira ingaruka mbi ku bana babo.

Mukasarasi Godeliève ni umubyeyi w’abana batanu ariko kuri ubu asigaranye batatu kuko babiri bitabye Imana. Umugabo we yishwe mu gihe cy’Abacengezi nyuma gato ya Jenoside yakorewe Abatutsi.

Mukasarasi Godeliève yashinze Umuryango ‘SEVOTA’ (Solidarité pour l'Epanouissement des Veuves et des Orphelins visant le Travail et l'Auto-promotion) wita ku bapfakazi n’imfubyi za Jenoside yakorewe Abatutsi
Urubyiruko rwasabwe kugira uruhare mu kunga ubumwe
Abayobozi batandukanye bari bitabiriye iki gikorwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .