Ibikorwa by’ubukerarugendo n’ubushakashatsi muri Pariki y’Ibirunga n’iya Nyungwe byasubitswe

Yanditswe na Twarabanye Venuste
Kuya 20 Werurwe 2020 saa 11:27
Yasuwe :
0 0

Ikigo cy’Igihugu cy’Iterambere (RDB) cyahagaritse by’agateganyo ubukerarugendo n’ubushakashatsi muri pariki eshatu z’igihugu mu rwego rwo kurinda ko inyamaswa zakwandura Coronavirus.

RDB yatangaje ko ari icyemezo yafashe mu rwego rwo kurengera ibinyabuzima biri muri izo pariki mu gihe bitaramenyekana neza niba inyamaswa zirimo, zitakwandura icyorezo cya Coronavirus.

Pariki zahagaritswe ni iya Nyungwe, Gishwati-Mukura n’iy’Ibirunga. Pariki y’Igihugu y’Akagera yo ifunguye ku bashaka kuyisura bigakorwa hubahirizwa amabwiriza yo kwirinda atangwa na Minisiteri y’Ubuzima.

Itangazo rya RDB ryashyizweho umukono n’Umuyobozi wayo, Akamanzi Clare, kuri uyu wa Gatanu rivuga ko icyo cyemezo ‘kizatangira gukurikizwa ku wa Gatandatu tariki 21 Werurwe 2020’.

Urwego rw’ubukerarugendo ni rumwe mu zugarijwe n’ibihombo hirya no hino ku Isi kubera Coronavirus.

Coronavirus yageze mu Rwanda ku wa 14 Werurwe 2020, ubwo yatahurwaga ku Muhinde ukorera rimwe mu mashami y’Umuryango w’Abibumbye mu Rwanda. Umubare w’abarwayi ba Coronavirus mu Rwanda wiyongereye uva kuri 11, abayifite bagera kuri 17 nyuma y’abagera kuri batandatu basanganywe ubwandu bushya nkuko Minisiteri y’Ubuzima yabitangaje kuri uyu wa 20 Werurwe 2020.

Ku wa Gatatu nibwo u Rwanda rwafashwe umwanzuro wo guhagarika ingendo z’indege ziva n’izinjira mu Rwanda harimo na RwandAir.

Guverinoma y’u Rwanda yanzuye guhagarika ingendo z’indege mu gihe cy’ukwezi mu rwego rwo gukumira ikwirakwira ry’iki cyorezo. Ni mu gihe umubare munini w’abarwayi bose bamaze kugaragarwaho nacyo, ari abari baherutse mu ngendo mu bihugu kirimo.

Ni icyemezo gitangira gukurikizwa kuri uyu wa 20 Werurwe 2020, saa 23h59. Biteganyijwe ko indege zitwara imizigo n’izikora ibikorwa by’ubutabazi zizakomeza gukora.

Ikigo gishinzwe kumenyekanisha Ubukerarugendo bushingiye ku Nama (RCB), giherutse gutangaza ko kubera Coronavirus, inama zigera kuri 20 zagombaga kubera mu Rwanda zikarwinjiriza asaga miliyoni $ 8, zasubitswe. Ni mu gihe muri uyu mwaka u Rwanda rwiteguraga kwakira inama 147 zari kurwinjiriza miliyoni $88.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza