Ubuhamya bukomeye bw’akaga Abanya-Bulinga banyuzemo mu bihe by’abacengezi (Video)

Yanditswe na Iradukunda Serge
Kuya 8 Ugushyingo 2019 saa 06:19
Yasuwe :
0 0

Mu gihe cy’intambara y’abacengezi, kwicwa, gucibwa ingingo z’umubiri no gutwikirwa ni bimwe mu byibasiye abatuye mu yahoze ari Komini Bulinga, ubu ni mu Murenge wa Mushishiro mu Karere ka Muhanga.

Nyuma yo gutsindwa na RPA (Rwandan Patriotic Army) bamwe mu bahoze mu Gisirikare cya FAR (Forces Armées Rwandaises) n’Interahamwe bahungiye mu cyahoze ari Zaïre, batangira kwisuganya no kugaba ibitero ku Rwanda, ibitero byiswe iby’abacengezi.

Izari segiteri nyinshi muri Komini ya Bulinga zagezweho n’ibi bitero by’abacengezi, ndetse banatwika ahakoreraga abakozi ba Komini inshuro ebyiri.

Murererampfura Alphonse wari wungirije Umuyobozi wa Komini mu gihe cy’abacengezi, avuga ko ibi bihe byari bikomeye cyane ku batuye mu yahoze ari Bulinga dore ko nta n’igihe cyari gishize bavuye muri Jenoside yakorewe Abatutsi mu 1994.

Yagize ati “Mu gihe cy’abacengezi ubuzima bwari bwahagaze umutekano wari muke, bateraga bavuye mu yahoze ari komini Kibirira ubu ni mu Karere ka Ngororero, bakaza bakica abantu muri rusange nta mutekano wari uhari.”

Jenoside irangiye abayirokotse bari bahungutse n’abari batarabona aho gutura bazanwe kuba mu nzu ziri hafi y’ibiro bya komini ubu hakorera Umurenge wa Mushishiro.

Mukeshimana Hillarie umwe mu bari batuye muri izi nzu avuga ko abacengezi baje ari bo bahiga ndetse n’abandi bantu bakoreraga leta.

Ati “Bagenderaga ku hantu hari inkambi z’Abatutsi bari bavuye mu buzima bubi batarasubira mu masambu yabo kuko twabaga turi ahantu ku nkambi, nibwo twari tukimara guhunguka.”

Yongeyeho ko bibasiraga abakozi ba leta “Abacengezi baje bibasira abantu bavugaga rumwe na leta, nka ba nyumbakumi na ba Konseye abo bose babaga bari guhigwa cyangwa abandi bantu bamenyaga amakuru bakaza kubwira ubuyobozi.”

Abacengezi bagiye bica abantu mu duce dutandukanye twari tugize Komini Bulinga nka Gasave, Rugendabari na Rukaragata.

Mukeshimana avuga ko kugira ngo wizere umutekano wawe mu gihe hari amakuru watanze wimukaga aho utuye ukaza kuba hafi n’ibiro bya Komini kuko mu giturage byari byoroshye ko Interahamwe zakugeraho.

Ingo abacengezi bihishagamo babasabaga kubatekera ndetse bakababuza gusohoka ngo badatanga amakuru.

Mukankusi Madeleine wari umugenzuzi w’amashuri mu gihe cy’abacengezi avuga ko batwika komini yari ahari.

Ati “Bwa mbere baza twumvise igihiriri cy’abantu kirahise tubanza kugira ngo ni abasirikare (Inkotanyi) kuko babaga hano hafi ariko tugiye kumva twumva imbunda ziravuze, turabyuka amasasu aravuga cyane, njye n’abana dusimbuka urugo turagenda mu gihe tugeze hepfo y’urugo twumva baravuze ngo komini barayitwitse.”

Mukankusi avuga ko komini itwikwa bwa mbere hari mu 1997 mu minsi igana kuri Noheli, mu gihe batwika bwa kabiri hari muri Mata 1998 mu minsi yegereza Pasika.

Ku nshuro ya kabiri abacengezi bagaruka nibwo bishe abantu benshi cyane kuko nyuma y’igitero cya mbere abantu benshi bari barahungiye kuri komini baza ari bo bashaka.

Mukankusi avuga ko iki gitero cya kabiri nacyo cyamusanze muri Bulinga. Ati “Bagaruka baje ari simusiga kuko bari barabibonye ko hari abantu, nibwo bishe abantu benshi cyane”.

Abacengezi baraje barongera batwika aho Ibiro bya Komini byari byarimuriwe “ubwo hano kuko ibiro bari barabitwitse twari twarimukiye mu tuzu twa polisi ari ho dukorera, ubwo naho baje ariho bareba barahatwika.’’

Nyuma yo kubona ko bitazoroha Mukankusi yahisemo kuzajya akora ataha mu Mujyi wa Gitarama, ubu ni Umujyi wa Muhanga, kubera ko abacengezi bazaga bashaka umuntu ukorana na Leta kandi yari umugenzuzi w’amashuri.

Muri Bulinga abacengezi bahakoreye ubugome bwinshi burimo kwica, gufata ku ngufu no guca abantu ingingo z’umubiri.

Murereramfura avuga ko kugira ngo abacengezi bacike muri Bulinga byasabye ubufatanye bw’ingabo n’abaturage.

Ati “Njye n’uwari ayoboye ingabo muri Bulinga Capt. Rubimbura Moïse, twahise dukoresha inama abaturage umunsi ku wundi nta kintu twakoraga uretse guhura n’abaturage tukabaganiriza.’’

“Muri ibyo byose n’umucengezi wafatwaga yarazaga bakabona ntacyo abaye, ingabo z’igihugu zari hano iyo umucengezi yazaga baramwakiraga noneho abaturage bakabona wa muntu wazaga arwana ingabo z’igihugu cyacu baramwakiriye ugasanga nta kintu babaye.”

Umuyobozi w’agateganyo mu Murenge wa Mushishiro, Gakuba Diogène, avuga ko kuyobora Umurenge nk’uyu wahuye n’ibi bibazo bigoranye cyane ko nubwo muri Bulinga umutekano wagarutse nk’ahandi hose mu gihugu ndetse abaturage baho bakaba bakataje mu kwiyubaka.

Icyakora haracyari ikibazo cy’uko abasezeraniye muri iyi komini batabasha kubona icyangombwa cy’uko bashyingiwe imbere y’amategeko n’ibindi by’irangamerere kubera ko byahahiriye igihe itwikwa.

Abacengezi bateraga muri Bulinga baturukaga muri iyi misozi ya Nyakabanda no mu yahoze ari Kibirira
Aha bahita Kabadaha kamwe mu dusanteri two mu Murenge wa Mushishiro, gakunze kurangwamo n'urujya n'uruza kikaba ari ikimenyetso cy'uko ubu aka gace hari umutekano
Ahahoze aka kabari ubu ni amatongo
Aka kahoze ari akabari gakomeye kazwi nko Ku Munyinya na ko kari mu byangijwe na Jenoside n'ibitero by'Abacengezi
Izi nzu nizo zacumbitsemo abari bahungutse ari naho abacengezi babasanze
Mukeshimana Hillarie avuga ko umuryango we wose wabaga muri iyi nzu wishwe n'abacengezi
Ahahoze Ibiro bya Komini Bulinga byatwitswe kabiri ubu hari Umurenge wa Mushishiro
Iyi nzu iri hafi y'Ibiro by'umurenge ikaba n'imwe mu nzu zari zaratujwemo abarokotse Jenoside yakorewe Abatutsi mu 1994
Iyi nzu yari ifungiwemo abakoze Jenoside, igihe Abacengezi bazaga barayitwitse barabafungura, ubu ni Ibiro bya Polisi mu Murenge wa Mushishiro
Mukankusi Madeleine, wabaye umugenzuzi w'amashuri mu gihe cy'Abacengezi avuga byari ibihe bigoye kubibamo
Mukeshimana Hillarie, ni umwe mu bari muri Bulinga ubwo Komini yatwikwaga
Nyuma yo gutwikwa ibiro byarongeye biravugururwa
Umuyobozi w’agateganyo mu Murenge wa Mushishiro, Gakuba Diogène, avuga ko kuyobora Umurenge nk’uyu wahuye n’ibi bibazo bigoranye cyane

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza